Kunsill Affarijiet Ġenerali, 18/07/2019, 18 ta' Lulju 2019

Riżultati ewlenin

Il-qafas finanzjarju pluriennali li jmiss

Il-presidenza infurmat lill-ministri dwar il-pjanijiet tagħha rigward il-ħidma fuq il-qafas finanzjarju pluriennali (QFP) għall-2021-2027.

Fil-konklużjonijiet tiegħu ta’ Ġunju 2019, il-Kunsill Ewropew appella lill-presidenza Finlandiża biex tkompli l-ħidma fuq il-QFP u tiżviluppa l-Kaxxa ta' Negozjar. Fuq dik il-bażi, il-mexxejja tal-UE ser ikollhom skambju ta' fehmiet f'Ottubru, bil-għan li jintlaħaq ftehim qabel tmiem is-sena.

Bi tħejjija għall-iskambji bejn il-mexxejja, il-presidenza ser tkompli d-diskussjonijiet tematiċi fil-livell tekniku f'Lulju u Settembru. Barra minn hekk, il-presidenza ħejjiet kwestjonarju għad-delegazzjonijiet biex iwieġbuh matul il-perijodu ta' waqfien tas-sajf. Barra minn hekk, ser isiru laqgħat bilaterali fil-livell ministerjali qabel il-laqgħa tal-Kunsill Affarijiet Ġenerali f'Settembru.

B'mod parallel, il-Presidenza ser tfittex li tagħmel l-akbar progress possibbli fin-negozjati dwar il-proposti settorjali relatati mal-QFP.

Il-presidenza Finlandiża hija impenjata bis-sħiħ biex tilħaq l-iskeda ta' żmien stabbilita mill-mexxejja tal-UE u biex tiffaċilita l-istadji finali tan-negozjati dwar il-QFP. Lesti li naħdmu ħafna u ser nsarrfu n-negozjati f'ċifri. Għalina, l-aktar kompitu importanti huwa li nipproduċu bażi bilanċjata għall-mexxejja tagħna. Tytti Tiupurinen, Ministru għall-Affarijiet Ewropej tal-Finlandja

Implimentazzjoni tal-aġenda strateġika

Il-ministri skambjaw fehmiet dwar l-implimentazzjoni tal-aġenda strateġika 2019-2024. Id-dibattitu sar f'sessjoni pubblika.

L-aġenda strateġika, li ntlaħaq qbil dwarha mill-mexxejja tal-UE f'Ġunju, hija maħsuba biex tiggwida l-ħidma tal-istituzzjonijiet tal-UE matul il-ħames snin li ġejjin. Hija tiffoka fuq erba' prijoritajiet ewlenin:

• il-ħarsien taċ-ċittadini u tal-libertajiet
• l-iżvilupp ta' bażi ekonomika soda u vibranti
• il-bini ta' Ewropa b'effett newtrali fuq il-klima, ekoloġika, ġusta u soċjali
• il-promozzjoni tal-interessi u l-valuri Ewropej fix-xena globali

Il-Finlandja hija l-ewwel presidenza li tintegra fil-ħidma tal-Kunsill il-prijoritajiet il-ġodda tal-aġenda strateġika għall-2019-2024. Il-ministri ddiskutew l-aħjar mod kif dan jista' jsir, b'kont meħud tal-isfidi u l-opportunitajiet multidimensjonali quddiemna. Huma indirizzaw ukoll il-metodi ta' ħidma tal-Kunsill u l-prinċipji trasversali tal-aġenda strateġika, bħat-trasparenza.

Id-diskussjoni kienet ibbażata fuq dokument li fih il-presidenza pprovdiet indikazzjoni tentattiva dwar meta u f'liema konfigurazzjoni tal-Kunsill ser jiġu eżaminati l-kwistjonijiet ewlenin.

Matul id-dibattitu, il-ministri enfasizzaw l-importanza li jinkisbu riżultati tanġibbli. L-UE għandha twieġeb għall-aspettattivi taċ-ċittadini. Barra minn hekk, komunikazzjoni ċara u attiva kienet meqjusa kruċjali.

Il-Kunsill Affarijiet Ġenerali huwa mistenni jerġa' lura għall-implimentazzjoni tal-aġenda strateġika fil-laqgħat tiegħu f'Ottubru u Diċembru. Il-Kunsill Ewropew ser jiddiskuti wkoll is-segwitu għall-aġenda strateġika matul il-laqgħa tiegħu f'Ottubru 2019.

Stat tad-Dritt

Il-presidenza infurmat lill-ministri dwar il-pjanijiet tagħha għat-tisħiħ tar-rispett għall-istat tad-dritt fl-UE. Il-presidenza ser tiffoka fuq l-iżvilupp tal-istrumenti tal-UE dwar l-istat tad-dritt, inkluż id-djalogu tal-Kunsill dwar l-istat tad-dritt, u t-tisħiħ tas-sinerġiji bejniethom.

Il-Kummissjoni ppreżentat il-komunikazzjoni tagħha dwar it-tisħiħ tal-istat tad-dritt fl-UE, adottata fis-17 ta' Lulju.

Il-ministri mistennija jerġgħu lura għal dan is-suġġett fil-laqgħa tagħhom f'Settembru.

Il-Kunsill evalwa wkoll is-sitwazzjoni attwali tal-istat tad-dritt fil-Polonja fid-dawl ta' żviluppi reċenti, notevolment is-sentenza tal-Qorti tal-Ġustizzja tal-Unjoni Ewropea rigward il-liġi tal-Polonja dwar il-Qorti Suprema.

Mingħajr diskussjoni, il-Kunsill approva l-modalitajiet standard għal seduti ta' smigħ skont il-proċeduri tal-Artikolu 7(1) TUE. Wara l-esperjenza miksuba mill-proċeduri kontinwi tal-Artikolu 7(1) TUE, l-għan ta' dan it-test huwa li tiżdied il-prevedibbiltà u tingħata struttura aktar solida lis-seduti ta' smigħ.

L-istat tad-dritt huwa parti essenzjali mill-bażi tal-valur komuni tagħna. Dan huwa xi ħaġa li tgħaqqadna. Għalhekk, il-Finlandja tagħti importanza partikolari lit-tisħiħ tal-istat tad-dritt fl-UE. Bħala presidenza, irridu nindirizzaw dan id-dibattitu fi spirtu pożittiv u kostruttiv. L-għan huwa li jinstabu modi aħjar u aktar effiċjenti biex jiġi żgurat ir-rispett għall-valuri komuni tal-UE fl-istati membri. Tytti Tiupurinen, Ministru għall-Affarijiet Ewropej tal-Finlandja

Prijoritajiet tal-presidenza Finlandiża

Il-Kunsill sema' wkoll preżentazzjoni dwar il-prijoritajiet tal-presidenza Finlandiża għas-sitt xhur li ġejjin.

Il-prijoritajiet ġenerali tal-presidenza Finlandiża huma: it-tisħiħ tal-valuri komuni u l-istat tad-dritt, li l-UE ssir aktar kompetittiva u soċjalment inklużiva, it-tisħiħ tal-pożizzjoni tal-UE bħala mexxejja globali fl-azzjoni klimatika, u l-protezzjoni tas-sigurtà taċ-ċittadini b'mod komprensiv.

Fit-tieni nofs tal-2019, il-ministri fil-Kunsill Affarijiet Ġenerali ser jiffokaw, b'mod partikolari, fuq is-suġġetti li ġejjin:

• il-qafas finanzjarju pluriennali
• l-istat tad-dritt
• it-tkabbir
• it-theddid ibridu