An Chomhairle Iomaíochais, 30/11-01/12/2015, 30 Samhain - 1 Nollaig 2015

Príomhthorthaí

An Limistéar Eorpach Taighde 

Ghlac an Chomhairle conclúidí maidir le sláine taighde, maidir le comhionannas inscne a chur chun cinn i ndáil leis an Limistéar Eorpach Taighde (LET) agus maidir leis an athbhreithniú ar struchtúr comhairleach LET.

• Conclúidí ón gComhairle maidir leis an tsláine taighde
• Conclúidí ón gComhairle maidir leis an gcomhionannas inscne a chur chun cinn sa Limistéar Eorpach Taighde
• Conclúidí ón gComhairle maidir leis an athbhreithniú ar struchtúr comhairleach an Limistéir Eorpaigh Taighde

Tuigimid go maith a thábhachtaí atá sláine taighde chun ardchaighdeán taighde a bhaint amach agus a thábhachtaí atá sé d'ábharthacht shocheacnamaíoch. Marc Hansen, Státrúnaí Ardoideachais agus Taighde Lucsamburg agus Uachtarán na Comhairle

Bhí malartú tuairimí ag na hAirí maidir leis an gcaoi a mbainfí an leas is fearr is féidir as an gCiste Eorpach le haghaidh Infheistíochtaí Straitéiseacha chun taighde agus infheistíocht a spreagadh. 

Bhí an méid a leanas le rá ag Cathaoirleach an chruinnithe Marc Hansen, Státrúnaí Ardoideachais agus Taighde Lucsamburg: 

“Tugadh chun críche inniu an obair dhúshlánanch a tosaíodh an samhradh seo caite. Tuigimid go maith a thábhachtaí atá sláine taighde chun ardchaighdeán taighde a bhaint amach agus a thábhachtaí atá sé d'ábharthacht shocheacnamaíoch. Ar an dara dul síos, tá an t-athrú institiúideach agus cultúrtha faoi chuimsiú LET ríthábhachtach chun comhionannas inscne a chur chun cinn i réimse an taighde. Agus ar an tríú dul síos, tá struchtúr comhairleach LET athbreithnithe againn lena áirithiú gur fearr agus gur éifeachtúla a fheidhmeodh sé.
Is colúin bhunúsacha iad siúd go léir chun margadh inmheánach do chúrsaíocht eolais agus nuálaíochta atá fíor agus éifeachtúil a chur ar bun".

Cigireacht ar an iomaíochas 

Reáchtáil an Chomhairle an dara “cigireacht ar an iomaíochas” mar a ndearna na hAirí plé ar na tosaíochtaí agus ar na saincheisteanna is práinní san fhíorgheilleagar. Bhí an díospóireacht dírithe ar iomaíochas ghnólachtaí an Aontais Eorpaigh sna margaí domhanda, lena n-áirítear in earnálacha atá dian ar fhuinneamh amhail cruach. 

Mar chuid den chigireacht, thíolaic Uachtaránacht Lucsamburg tuarascáil maidir le cur chun feidhme príomhshruthuithe an iomaíochais, ina ndéantar achoimre ar an dul chun cinn a rinneadh le linn na sé mhí a chuaigh thart i dtaca leis an iomaíochas a áireamh níos mó i ngach réimse beartais.

• Tuarascáil ón Uachtaránacht maidir le príomhshruthú a dhéanamh ar an iomaíochas

Thaispeánamar go bhfuil an Chomhairle in ann freagairt thapa a thabhairt ar ghéarchéimeanna, amhail an cor chun donais i dtionscal cruach an Aontais nó scannal na n-astaíochtaí ó ghluaisteáin.” Etienne Schneider, Leas-Phríomh-Aire Lucsamburg agus an tAire Gnóthaí Eacnamaíocha agus Uachtarán na Comhairle

Ag deireadh an chruinnithe bhí an méid a leanas le rá ag Etienne Schneider, Leas-Phríomh-Aire agus Aire Gnóthaí Eacnamaíocha Lucsamburg: "Tá dianobair déanta ag Uachtaránacht Lucsamburg chun bunús a chur leis an bpríomhsruthú iomaíochais. Tá modhanna nuálaíocha oibre curtha le chéile againn chun feabhas a chur ar fheidhmiú na Comhairle Iomaíochais agus an tionchar atá aici a mhéadú. Thaispeánamar go bhfuil an Chomhairle in ann freagairt thapa a thabhairt ar ghéarchéimeanna, amhail an cor chun donais i dtionscal cruach an Aontais nó scannal na n-astaíochtaí ó ghluaisteáin."

An straitéis nua don mhargadh aonair 

Thionóil an Chomhairle an chéad mhalartú tuairimí maidir leis an straitéis nua don mhargadh aonair in earraí agus seirbhísí.  Díríodh sa phlé ar bhearta chun cuidiú le FBManna nuálaíocha a gcuid gníomhaíochtaí a leathnú ar fud an Aontais. Bhí tacaíocht leathan ann don straitéis agus a cuspóir bacainní a laghdú sa mhargadh inmheánach. 

Phléigh an Chomhairle freisin conas úsáid a bhaint as an gclár oibre maidir le rialáil níos fearr chun feidhmiú an mhargaidh aonair a fheabhsú agus chun fás agus poist a chruthú. Léiríodh mian láidir chun a áirithiú go bhfuil an reachtaíocht níos fusa, níos éifeachtúla agus níos spriocdhírithe. 

Údaráis náisiúnta iomaíochais 

Phléigh an Chomhairle an moladh ón gCoimisiún údaráis iomaíochais neamhspleácha a chruthú i ngach Ballstát chun faireachán níos fearr a dhéanamh ar chur chun feidhme na n-athchóirithe struchtúracha. Chuir líon mór toscaireachtaí a n-imní in iúl go gcothódh sé sin ualaí agus moilleanna breise sa chinnteoireacht. 

Astaíochtaí ó ghluaisteáin

Ar deireadh, fuair an Chomhairle nuashonrú maidir leis an obair leantach tar éis an scannail astaíochtaí ó ghluaisteáin agus na forbairtí is déanaí i ndáil le nósanna imeachta fíorthástála astaíochtaí ó thiomáint a thabhairt isteach.

Beoshruth, físeáin agus grianghraif

• Beoshruth na seisiún poiblí agus na n-imeachtaí preasa
• Físeáin agus grianghraif don chruinniú, an Chomhairle Iomaíochais, an 30 Samhain - 1 Nollaig 2015