Kunsill Kompetittività, 30/11-01/12/2015, 30 ta' Novembru - 1 ta' Diċembru 2015

Riżultati ewlenin

Żona Ewropea tar-Riċerka 

Il-Kunsill adotta konklużjonijiet dwar l-integrità tar-riċerka, dwar l-avvanz tal-ugwaljanza bejn is-sessi fiż-Żona Ewropea tar-Riċerka (ŻER) u dwar ir-reviżjoni tal-istruttura konsultattiva taż-ŻER.

• Konklużjonijiet tal-Kunsill dwar l-integrità tar-riċerka
• Konklużjonijiet tal-Kunsill dwar l-avvanz tal-ugwaljanza bejn is-sessi fiż-Żona Ewropea tar-Riċerka
• Konklużjonijiet tal-Kunsill dwar ir-reviżjoni tal-istruttura konsultattiva taż-Żona Ewropea tar-Riċerka

L-Integrità tar-Riċerka hija rikonoxxuta bħala element ewlieni għall-eċċellenza fir-riċerka u r-rilevanza soċjoekonomika. Marc Hansen, Segretarju tal-Istat għall-Edukazzjoni Għolja u r-Riċerka tal-Lussemburgu u President tal-Kunsill

Il-ministri kellhom skambju ta’ fehmiet dwar kif jista’ jsir l-aħjar użu possibbli tal-Fond Ewropew għall-Investimenti Strateġiċi biex jistimola r-riċerka u l-innovazzjoni. 

Il-president tal-laqgħa Marc Hansen, Segretarju tal-Istat għall-Edukazzjoni Għolja u r-Riċerka tal-Lussemburgu, għamel id-dikjarazzjoni li ġejja: 

"Ix-xogħol diffiċli li beda s-sajf li għadda twettaq illum. L-Integrità tar-Riċerka hi rikonoxxuta bħala element ewlieni għall-eċċellenza fir-riċerka u r-rilevanza soċjoekonomika. It-tieni nett, it-tibdil istituzzjonali u kulturali fil-qafas taż-ŻER huwa kruċjali għall-promozzjoni tal-ugwaljanza bejn is-sessi fir-riċerka. U t-tielet, irrevedejna l-istruttura konsultattiva taż-ŻER biex niżguraw funzjonament aħjar u aktar effiċjenti.
Dawn kollha huma pilastri fundamentali li jagħmlu suq intern ġenwin u effiċjenti għaċ-ċirkolazzjoni tal-għarfien u l-innovazzjoni".

Eżami tal-kompetittività 

Il-Kunsill kellu t-tieni edizzjoni tal-"eżami tal-kompetittività" fejn il-ministri ddiskutew il-prijoritajiet u l-aktar kwistjonijiet urġenti fl-ekonomija reali. Id-dibattitu ffoka fuq il-kompetittività tan-negozji tal-UE fis-swieq globali, inklużi s-setturi li jużaw ħafna enerġija bħalma hu l-azzar. 

Bħala parti minn dan l-eżami, il-Presidenza Lussemburgiża ppreżentat rapport dwar l-implimentazzjoni tal-integrazzjoni tal-kompetittività, li tiġbor fil-qosor il-progress miksub matul l-aħħar sitt xhur biex titqies aħjar il-kompetittività fl-oqsma kollha tal-politika.

Aħna wrejna li l-Kunsill huwa kapaċi jirreaġixxi malajr għall-kriżijiet, bħal pereżempju t-tnaqqis fir-ritmu tal-industrija tal-azzar tal-UE jew l-iskandlu tal-emissjonijiet tal-karozzi.” Etienne Schneider, Viċi Prim Ministru u Ministru għall-Affarijiet Ekonomiċi tal-Lussemburgu u President tal-Kunsill

Fi tmiem il-laqgħa, Etienne Schneider, Viċi Prim Ministru u Ministru għall-Affarijiet Ekonomiċi tal-Lussemburgu, ikkummenta li: "Il-Presidenza Lussemburgiża ħadmet ħafna biex tagħti sustanza lill-integrazzjoni tal-kompetittività. Daħħalna fis-seħħ metodi ta’ ħidma innovattivi biex itejbu l-funzjonament u jżidu l-influwenza tal-Kunsill Kompetittività. Urejna li l-Kunsill huwa kapaċi jirreaġixxi malajr għall-kriżijiet, bħal pereżempju t-tnaqqis fir-ritmu tal-industrija tal-azzar tal-UE jew l-iskandlu tal-emissjonijiet tal-karozzi."

Strateġija ġdida tas-suq uniku 

Il-Kunsill kellu l-ewwel skambju ta’ fehmiet dwar l-istrateġija ġdida għas-suq uniku tal-prodotti u s-servizzi.  Id-diskussjoni ffokat fuq miżuri li għandhom jgħinu lill-SMEs innovattivi jespandu l-attivitajiet tagħhom fl-UE kollha. Kien hemm appoġġ wiesa’ għall-istrateġija u l-objettiv tagħha li jitnaqqsu l-ostakoli fis-suq intern 

Il-Kunsill iddiskuta wkoll dwar kif għandu jsir użu mill-aġenda l-ġdida ta' regolamentazzjoni aħjar biex jittejjeb il-funzjonament tas-suq uniku u jinħolqu t-tkabbir u l-impjiegi. Kien hemm xewqa qawwija li jiġi żgurat li l-leġislazzjoni tkun ta' inqas piż, aktar effiċjenti u aktar iffokata. 

Awtoritajiet nazzjonali tal-kompetittività 

Il-Kunsill kellu dibattitu dwar ir-rakkomandazzjoni tal-Kummissjoni biex jinħolqu awtoritajiet tal-kompetittività indipendenti f’kull Stat Membru biex ikun hemm sorveljanza aħjar tal-implimentazzjoni tar-riformi strutturali. Għadd kbir ta’ delegazzjonijiet esprimew tħassib li dawn joħolqu piżijiet addizzjonali u dewmien fit-teħid tad-deċiżjonijiet. 

Emissjonijiet mill-karozzi

Fl-aħħar nett, il-Kunsill ingħata tagħrif dwar is-segwitu għall-iskandlu tal-emissjonijiet tal-karozzi u l-iżviluppi reċenti dwar l-introduzzjoni ta’ proċeduri ta’ ttestjar tal-emissjonijiet reali waqt is-sewqan.

Streaming dirett, filmati u ritratti

• Streaming dirett ta’ sessjonijiet pubbliċi u okkażjonijiet għall-istampa
• Filmati u ritratti tal-laqgħa, Kunsill Kompetittività, 30 ta’ Novembru - 1 ta' Diċembru 2015