An Chomhairle Comhshaoil, 28/02/2017, 28 Feabhra 2017

Na príomhthorthaí

Córas trádála astaíochtaí

Tháinig an Chomhairle ar chomhaontú faoina seasamh caibidlíochta maidir leis an athbhreithniú ar an gcóras trádála astaíochtaí (ETS). Tá ETS ar cheann de na príomhuirlisí le hastaíochtaí gás ceaptha teasa a laghdú. Cuideoidh an t-athbhreithniú le sprioc an Aontais a bhaint amach maidir le hastaíochtaí a laghdú le 40% ar a laghad faoi 2030, mar a gealladh faoi Chomhaontú Pháras maidir leis an athrú aeráide.

“Tá sé seo thar a bheith tábhachtach dúinn féin, don phláinéad seo againn agus do na glúine a thiocfaidh inár ndiaidh. Ba chéim mhór chun cinn é Comhaontú Pháras, ach ní mór dúinn anois beart a dhéanamh de réir ár mbriathar. Beimid in ann astaíochtaí a laghdú tuilleadh le córas éifeachtach trádála astaíochtaí. Tá an tAontas i mbun gnímh mar gur mian leis go mbeadh saol maith i ndán dúinn go léir.”

José A. Herrera, Aire Comhshaoil Mhálta agus Uachtarán na Comhairle

• Athchóiriú ar scéim AE maidir le trádáil astaíochtaí

Forbairt inbhuanaithe

Phléigh na hairí freisin an bealach a gcuirfear i bhfeidhm Clár Oibre 2030 don Fhorbairt Inbhuanaithe, ag díriú go háirithe ar a thábhachtaí atá sé do bheartas comhshaoil an Aontais. Thug siad aghaidh, mar shampla, ar an gcaoi a bhféadfaí saoránaigh agus an earnáil phríobháideach a thabhairt isteach sa phróiseas. Cuirfear an plé sin san áireamh agus na conclúidí á n-ullmhú ag an gComhairle i mí an Mheithimh.

‘Glasú’ an tSeimeastair Eorpaigh - Athbhreithniú ar chur chun feidhme an bheartais comhshaoil

I gcomhthéacs phróiseas an tSeimeastair Eorpaigh, phléigh siad tuairimí éagsúla faoi shuirbhé bliantúil fáis 2017 agus faoin ról atá ag an bhforbairt inbhuanaithe agus ag an gcomhshaol. Phléigh siad freisin an t-athbhreithniú ar chur chun feidhme an bheartais comhshaoil, uirlis nua lena dtabharfar aghaidh ar na bearnaí atá ann maidir le reachtaíocht chomhshaoil agus beartas comhshaoil a chur chun feidhme.