An Chomhairle Comhshaoil, 05/03/2019, 5 Márta 2019

Na príomhthorthaí

Straitéis aeráide an Aontais do 2050

Bhí díospóireacht bheartais ag na hairí comhshaoil maidir le fís straitéiseach fhadtéarmach an Aontais chun geilleagar rachmasach, nua-aimseartha, iomaíoch atá neodrach ó thaobh na haeráide de a bhaint amach, bunaithe ar chásanna éagsúla chun astaíochtaí gás ceaptha teasa a laghdú san fhadtéarma faoi 2050 i gcomhréir le Comhaontú Pháras.

Bhí plé againn inniu faoina thábhachtaí atá sé straitéis fhadtéarmach a fhorbairt le chéile don Aontas chun astaíochtaí gás ceaptha teasa a laghdú. Ag féachaint ar aghaidh i dtreo 2050 dúinn, tá a fhios againn gur gá dúinn na dreasachtaí atá riachtanach don chlaochlú sin a chur ar fáil, agus beidh orainn deimhin a dhéanamh de go gcuirfimid sainiúlachtaí réigiúnacha agus dálaí éagsúla socheacnamaíocha san áireamh. Beidh sé dúshlánach ár n-astaíochtaí gás ceaptha teasa a laghdú tuilleadh ach is iontach na deiseanna a bhaineann leis dár ngeilleagair agus dár saoránaigh. Grațiela Leocadia Gavrilescu, Leas-Phríomh-Aire agus Aire Comhshaoil na Rómáine

Uisce óil

Tháinig na hairí ar chomhaontú i dtaca leis an nuashonrú a mholtar ar an treoir maidir le huisce óil. Chomhaontaigh siad an seasamh ón gComhairle maidir leis an téacs lenar foráladh do rialacha níos déine i gcomhair uisce buacaire, lena n-áirítear nós imeachta nua lena leagtar amach ceanglais shláinteacha le haghaidh ábhair a bhíonn i dteagmháil le huisce buacaire amhail píopaí. Is é an aidhm atá ann cáilíocht na n-ábhar sin a fheabhsú chun a chinntiú go ndéanfar sláinte an duine a chosaint agus nach dtarlóidh aon éilliú.

An Seimeastar Eorpach a ghlasú

Bhí deis ag na hairí a gcuid tuairimí i ndáil le próiseas an tSeimeastair Eorpaigh a mhalartú. Phléigh siad an tábhacht a bhaineann le hinfheistíochtaí inbhuanaithe a chur chun cinn agus a chinntiú go mbainfidh saoránaigh an Aontais tairbhí sóisialta astu siúd. Ina theannta sin, phléigh na hairí na hathchóirithe comhshaoil agus riaracháin is fearr a d’fhéadfadh an t-aistriú chuig geilleagar níos glaise a éascú.

Suaiteoirí inchríneacha

Bhí díospóireacht bheartais sa Chomhairle maidir le suaiteoirí inchríneacha. Bhí malartú tuairimí ag na hairí le féachaint faoin gcur chuige is fearr a d’fhéadfadh a bheith ann chun creat comhleanúnach de chuid an Aontais i ndáil le suaiteoirí inchríneacha a fhorbairt. Chuir na hairí i bhfios gur ábhar imní don phobal iad substaintí lena mbaineann airíonna ar suaiteoirí inchríneacha iad a bhfuil tionchar acu ar an gcomhshaol agus atá nasctha le fadhbanna sláinte an duine.