An Chomhairle Comhshaoil, 25/06/2018, 25 Meitheamh 2018

Na príomhthorthaí

Geilleagar Ciorclach a bhaint amach

Ar an 25 Meitheamh, ghlac an Chomhairle Comhshaoil conclúidí maidir le cur i gcrích phlean gníomhaíochta an Aontais don gheilleagar ciorclach. D’athdhearbhaigh an Chomhairle an cumas atá ag an ngeilleagar ciorclach fás inbhuanaithe a bhaint amach agus spleáchas an Aontais ar amhábhair phríomha neamh-inathnuaite a laghdú, go háirithe trí níos mó táirgí plaisteacha a athchúrsáil. Leag sí béim ar an ngá le breithniú a dhéanamh athuair ar nósanna tomhaltais agus le húsáid neamhriachtanach plaistigh a sheachaint. Chuir sí i bhfios go láidir go bhfuil na geallsealbhóirí go léir freagrach as dul i mbun na gníomhaíochta atá riachtanach don athrú, maidir le dearadh, le húsáid agus le tomhaltas táirgí. Leag sí béim freisin ar a thábhachtaí atá bainistiú fónta ar shubstaintí ar díol imní iad i dtáirgí agus i ndramhaíl i ndáil le timthriallta ábhair neamhthocsainigh a shocrú.

Is é an geilleagar ciorclach an éacht is mó a baineadh amach lenár linn. Táim thar a bheith sásta gur tháinig na hairí ar chomhaontú inniu maidir le gníomhaíochtaí comhchoiteanna chun plean gníomhaíochta an Aontais maidir leis an ngeilleagar ciorclach a chur chun feidhme. Caithfimid go léir athbhreithniú a dhéanamh ar an mbealach a úsáidimid agus a ídímid plaisteach. Neno Dimov, Aire Comhshaoil agus Uisce na Bulgáire

Uisce óil

Bhí díospóireacht bheartais, a rinneadh a bheoshruthú, ag na hairí comhshaoil i dtaca leis an treoir maidir le huisce óil, rud a tharla go díreach mar thoradh ar an gcéad tionscnamh rathúil riamh ó na saoránaigh. Leis an treoir maidir le huisce óil cuirtear feabhas ar chaighdeáin an uisce óil, tugtar isteach cur chuige riosca-bhunaithe i ndáil le faireachán a dhéanamh ar uisce agus déantar an fhaisnéis atá ar fáil faoi cháilíocht an uisce mar aon le seirbhísí do thomhaltóirí a chomhchuibhiú.

Caighdeáin CO2 do ghluaisteáin agus do veaineanna

San iarnóin, rinne an Chomhairle díospóireacht bheartais, i ndáil leis an rialachán maidir le caighdeáin astaíochtaí CO2 do ghluaisteáin agus do veaineanna, a bheoshruthú. Phléigh na hairí na cuspóirí laghdaithe astaíochtaí CO2 a bheartaítear de 15% ó 2025 agus 30% ó 2030 le haghaidh gluaisteáin nua agus veaineanna nua. Rinne na hairí anailís freisin ar an sásra dreasachta a bheartaítear maidir le feithiclí astaíochtaí ísle agus astaíochtaí nialasacha.

Ábhair eile ar an gclár oibre

Le linn seisiún poiblí, bhí an deis ag an gComhairle éisteacht le cur i láthair ón gCoimisiún i ndáil lena thograí reachtacha nua maidir le caighdeáin CO2 d’fheithiclí tromshaothair, LIFE, athúsáid uisce, plaistigh aonúsáide agus oibleagáidí maidir le tuairisciú comhshaoil a ailíniú. Thug an Coimisiún tuarascáil freisin maidir le tionscnamh an Aontais faoi phailneoirí arb é is aidhm dó beacha meala, beacha fiáine agus feithidí fiáine, ar pailneoirí iad agus atá i mbaol a ndíothaithe, a chosaint.