An Chomhairle Fostaíochta, Beartais Shóisialta, Sláinte agus Gnóthaí Tomhaltóirí (Sláinte), 14 Meitheamh 2022

Na príomhthorthaí

Spás Eorpach Sonraí Sláinte

Bhí plé ag an gComhairle i ndáil leis an togra le haghaidh Rialachán maidir leis an Spás Eorpach Sonraí Sláinte.

Is colún riachtanach d’Aontas Sláinte na hEorpa é an togra seo le haghaidh Rialacháin, a ghlac an Coimisiún Eorpach an 3 Bealtaine 2022. Is é is aidhm dó éascaíocht a dhéanamh d’othair rochtain a fháil ar a gcuid sonraí sláinte i bhfoirm leictreonach agus éascaíocht a dhéanamh na sonraí sin a roinnt le gairmithe sláinte san Aontas. Is é is aidhm dó freisin cead a thabhairt do thaighdeoirí, d’údaráis tionsclaíochta agus d’údaráis phoiblí na sonraí sin a athúsáid, i dtimpeallacht shlán agus faoi choinníollacha dochta.

Ba dhíol sásaimh do na hairí an togra le haghaidh Rialacháin lena gcuirfear creat dlíthiúil cobhsaí ar fáil, a luaithe a ghlacfar é, chun malartú sonraí sláinte laistigh den Aontas a éascú, lena bhféadfar, inter alia, earnáil an chúraim sláinte a dhéanamh níos éifeachtúla agus an taighde eolaíoch a chur chun cinn. Mar sin féin, thug siad dá n-aire na saincheisteanna íogaire a eascraíonn as an togra seo, amhail slándáil agus cosaint sonraí agus an gá atá le réimse muiníne a fhorbairt ar mhaithe le cách.

• Spás Eorpach Sonraí Sláinte (an Coimisiún Eorpach)

Athbhreithniú ar straitéis sláinte domhanda an Aontais

Phléigh airí sláinte an Aontais straitéis sláinte domhanda an Aontais. I bhfianaise a bhfuil tarlaithe le déanaí – lena n-áirítear paindéim COVID-19 agus an ghéarchéim sláinte agus dhaonnúil mar thoradh ar an gcogadh san Úcráin – is cosúil nach mór nuashonrú a dhéanamh ar an straitéis reatha atá ann ón mbliain 2010 i leith.

An 19 Bealtaine 2022, d’fhógair an Coimisiún go seolfaí próiseas chun straitéis sláinte dhomhanda nua de chuid an Aontais a fhorbairt.

Ba dhíol sásaimh do na hairí an cinneadh tús a chur leis an bpróiseas athbhreithnithe. Leag siad béim ar an tábhacht a bhaineann leis an straitéis sin maidir le tosaíochtaí sláinte domhanda an AE a athshainiú, amhail córais sláinte a neartú, ullmhú do ghéarchéimeanna sláinte agus freagairt dóibh agus cur chuige na hAon Sláinte Amháin a chur chun cinn. D’iarr na hairí freisin go neartófaí an tionchar atá ag an Aontas ar an tsláinte ar an leibhéal idirnáisiúnta agus go ndéanfaí comhordú idir gníomhaithe ábhartha an Aontais.

• I dtreo Straitéis Dhomhanda Sláinte nua an Aontais (an Coimisiún Eorpach)

Na dúshláin atá le teacht maidir le straitéis vacsaínithe COVID-19 AE

Le linn malartú neamhfhoirmiúil, phléigh na hairí na dúshláin atá le teacht maidir le straitéis vacsaínithe COVID-19 AE, ó thaobh vacsaíní a fháil ar an leibhéal Eorpach agus ó thaobh dlúthpháirtíocht idirnáisiúnta de.

Gnó eile

Chuir Uachtaránacht na Fraince na toscaireachtaí ar an eolas faoin dul chun cinn atá déanta sa chaibidlíocht idir an Chomhairle agus Parlaimint na hEorpa d’fhonn teacht ar chomhaontú maidir le dréachtrialachán maidir le bagairtí trasteorann thromchúiseacha ar shláinte.

Tá eolas curtha ar fáil ag an gCoimisiún Eorpach faoi chur chun feidhme na rialachán maidir le feistí leighis agus maidir le measúnú ar theicneolaíocht sláinte.

Chuir an Coimisiún na hairí ar an eolas freisin faoi bhagairtí sláinte atá ag teacht chun cinn (cásanna mór heipitítis agus an bolgach moncaí i bpáistí), chomh maith leis an staid sláinte agus daonnúil san Úcráin (go háirithe maidir leis an aslonnú leighis agus an tacaíocht sláinte don Úcráin).

Phléigh toscaireachtaí na Beilge, na hÍsiltíre, Lucsamburg, na hOstaire agus na hÉireann an iontráil sa mhargadh san Eoraip do dhrugaí, lena n-áirítear bearnaí san fhianaise agus réitigh a d’fhéadfadh a bheith ann.

Chuir toscaireachtaí na Bulgáire, na Cróite, na hEastóine, na hUngáire, na Laitvia, na Liotuáine, na Polainne, na Rómáine, na Slóvaice agus na Slóivéine an Chomhairle ar an eolas faoina litir chomhpháirteach chuig an gCoimisiún Eorpach maidir le forálacha na gconarthaí le haghaidh vacsaíní COVID-19 a cheannach.

Ar deireadh, chuir Uachtaránacht inteachta na Seice faisnéis ar fáil faoina clár oibre.

• Aontas Sláinte Eorpach: cosaint a thabhairt do mhuintir na hEorpa ar bhagairtí trasteorann ar shláinte (eolas cúlra)
• Measúnú ar theicneolaíochtaí sláinte (eolas cúlra)