An Chomhairle Fostaíochta, Beartais Shóisialta, Sláinte agus Gnóthaí Tomhaltóirí (Fostaíocht agus Beartas Sóisialta), 8 Nollaig 2022

Príomhthorthaí

Obair ardáin: Phléigh na hAirí conas dálaí oibre a fheabhsú

Phléigh Airí Fostaíochta an Aontais togra ón Uachtaránacht le haghaidh comhsheasamh na mBallstát maidir le dréachtdlí de chuid an Aontais chun dálaí oibre na ndaoine atá ag obair trí ardáin a fheabhsú. Is é is aidhm do na rialacha atá beartaithe cinneadh ceart stádas fostaíochta na ndaoine a dhéanann obair ardáin a éascú.

Is é croílár na treorach atá beartaithe a áirithiú go dtabharfar an stádas dlíthiúil fostaíochta do dhaoine atá ag obair trí ardáin dhigiteacha saothair, stádas a fhreagraíonn dá socruithe oibre iarbhír. Moltar seicliosta inti chun a mheas an ‘fostóir’ é an t-ardán nó an bhfuil duine féinfhostaithe i ndáiríre.

In ainneoin na caibidlíochta a lean ar aghaidh i rith an lae agus roinnt iarrachtaí ón Uachtaránacht comhréiteach a chur i láthair, ní raibh aon tromlach cáilithe ann chun tacú le cur chuige ginearálta.

Ní mór dálaí oibre níos fearr a bheith ann d’oibrithe seachadta bia, do thiománaithe taistil ar ordú agus dóibh siúd go léir a oibríonn trí ardán digiteach. Earnáil a bhfuil borradh léi is ea geilleagar na n-ardán agus ní mór dúinn a chinntiú go bhfuil an staid fostaíochta atá tuillte acu ag daoine a dhéanann obair ardáin.

Marian Jurečka, Leas-Phríomh Aire agus an tAire Saothair agus Gnóthaí Sóisialta

• Rialacha an Aontais maidir le hobair ardáin (eolas cúlra)

Na Ballstáit tagtha ar chomhsheasamh chun cosaint oibrithe ar rioscaí aispeiste a fheabhsú

Shocraigh na hAirí a seasamh maidir le togra chun reachtaíocht an Aontais lena gcosnaítear oibrithe ar rioscaí aispeiste a dhéanamh níos doichte. Is mian leis an gComhairle leibhéil nochta reatha a ísliú agus comhaireamh snáithíní aispeiste a dhéanamh ar bhonn modh níos nua-aimseartha. Dá gcomhaontófaí iad, chinnteodh na rialacha nua nach nochtfar aon oibrí do thiúchan níos mó ná 0.01 snáithíní aispeiste in aghaidh an cm³. Is laghdú faoi dheich é sin i gcomparáid leis an luach atá i bhfeidhm faoi láthair. Chinn na Ballstáit freisin modh níos nua-aimseartha agus níos íogaire a úsáid chun snáithíní aispeiste a chomhaireamh, is é sin an mhicreascópacht leictreon.

Sula ndéanfar dlí de, ní mór don Chomhairle agus do Pharlaimint na hEorpa teacht ar chomhaontú maidir le seasamh comhpháirteach i ndáil leis an athbhreithniú atá beartaithe.

Ach cosaint níos láidre a thabhairt d’oibrithe ar rioscaí aispeiste, sábhálfar beatha daoine. Ní mór do Bhallstáit an Aontais srian suntasach a chur le nochtadh oibrithe do bhaol na haispeiste agus tá áthas orm go bhfuil siad réidh chun é sin a dhéanamh. Marian Jurečka, Leas-Phríomh Aire agus an tAire Saothair agus Gnóthaí Sóisialta

• Aispeist: An Chomhairle tagtha ar chomhaontú maidir le cosaint oibrithe a fheabhsú (preaseisiúint, an 8 Nollaig 2022)
• Cosaint oibrithe: sláinte agus sábháilteacht ag an obair (eolas cúlra)

Moltaí nua: Cúram fadtéarmach agus cúram leanaí agus oideachas

Ghlac an Chomhairle moladh maidir le hoideachas agus cúram na luath-óige. Moltar an méid a leanas ann:

• glacann 45 % ar a laghad de leanaí faoi bhun 3 bliana d’aois páirt in oideachas agus i gcúram na luath-óige (baineann spriocanna sonracha le Ballstáit nach bhfuil spriocanna 2002 bainte amach acu go fóill.)
• 96% ar a laghad de leanaí idir trí bliana d’aois agus an aois tosaigh don bhunoideachas éigeantach, ba cheart dóibh a bheith rannpháirteach in oideachas agus i gcúram na luath-óige.

Glacadh an dara moladh maidir le cúram fadtéarmach inacmhainne ardcháilíochta inniu freisin. Moltar ann gníomhaíochtaí chun cúram a dhéanamh níos inrochtana, níos inacmhainne agus níos fearr ó thaobh caighdeáin de.

Ar deireadh, bhí díospóireacht bheartais ag na hAirí faoin Straitéis Eorpach um Chúram inar thug siad aghaidh go háirithe ar bhealaí chun infhaighteacht, cáilíocht, inrochtaineacht agus inacmhainneacht seirbhísí cúraim a fheabhsú sa chomhthéacs polaitiúil agus eacnamaíoch reatha.

• Moltaí glactha ag airí an Aontais maidir le cúram luath-óige agus cúram fadtéarmach (preaseisiúint, an 8 Nollaig 2022)
• An Straitéis Eorpach um Chúram (an Coimisiún Eorpach)

Thíolaic an Uachtaránacht tuarascáil ar dhul chun cinn maidir le togra le haghaidh Treoir maidir le Comhionannas arb é is aidhm di an chosaint ar idirdhealú ar fhorais reiligiúin nó creidimh, mhíchumais, aoise nó gnéaschlaonta a leathnú go réimsí lasmuigh den fhostaíocht. Tar éis don Choimisiún pacáiste an fhómhair maidir leis an Seimeastar Eorpach a chur i láthair, bhí malartú tuairimí ag na hairí agus rinneadh athbhreithniú ar an moladh ón gComhairle maidir le daoine atá dífhostaithe go fadtéarmach a chomhtháthú i margadh an tsaothair.

D’fhormheas na hAirí dhá chonclúid freisin: maidir le daoine faoi mhíchumas a chuimsiú i margadh an tsaothair agus maidir le comhionannas inscne i ngeilleagair shuaite.

Ar deireadh, tháinig na Ballstáit ar chomhaontú polaitiúil maidir le moladh ón gComhairle maidir le hioncam íosta leordhóthanach.

• An treoir maidir leis an gcóir chomhionann (tuarascáil ar dhul chun cinn)
• Conclúidí maidir le daoine faoi mhíchumas a chuimsiú i margadh an tsaothair
• Conclúidí maidir le comhionannas inscne i ngeilleagair shuaite
• Moladh ón gComhairle maidir le hioncam íosta leordhóthanach lena n-áirithítear cuimsiú gníomhach (comhaontú polaitiúil)

Gnó eile

Chuir an Uachtaránacht na toscaireachtaí ar an eolas faoin staid na himeartha maidir leis an gcinneadh i ndáil le Bliain Eorpach na Scileanna 2023, maidir leis na comhdhálacha a tionóladh le linn a téarma agus maidir le cruinnithe rialtas na Seice san Úcráin.

Chuir an Coimisiún faisnéis ar fáil maidir leis na treoracha atá ar na bacáin maidir le ról agus neamhspleáchas na gcomhlachtaí comhionannais a neartú agus maidir le staid na himeartha i ndáil leis an Ardán Eorpach chun an easpa dídine a chomhrac.

Chuir Uachtaránacht nua na Sualainne a clár oibre i láthair ar deireadh.