Grupp tal-Euro, 12/09/2014, 12 ta' Settembru 2014

Il-Grupp tal-Euro jkompli bl-aġenda tar-riforma strutturali 

Fil-laqgħa tal-Grupp tal-Euro tat-12 ta' Settembru f'Milan, il-ministri tennew l-impenn tagħhom għal tnaqqis fil-piż tat-taxxa fuq ix-xogħol. L-objettiv huwa li l-ekonomiji taż-żona tal-euro jsiru aktar kompetittivi u li tingħata spinta lill-attività ekonomika u l-impjiegi. 

Biex jintlaħaq dan l-objettiv, il-Grupp tal-Euro qabel dwar sett ta' prinċipji komuni li ser isawru r-riformi tas-sistemi ta' tassazzjoni tal-istati membri.

Dawn il-prinċipji ffokaw fuq l-importanza li: 

• jitnaqqsu t-taxxi fuq l-aktar ċittadini vulnerabbli
• jiġi kkumpensat it-tnaqqis tat-taxxa fuq ix-xogħol b'miżuri ta' kumpens f'oqsma li huma anqas ta' detriment għat-tkabbir
• it-tnaqqis tat-taxxa jseħħ flimkien ma' kwalunkwe riforma neċessarja oħra tas-suq tax-xogħol
• jinkiseb appoġġ politiku u soċjetali wiesa' għar-riformi

L-istati membri ser ikunu mistennija jimplimentaw dawn il-prinċipji meta jfasslu l-abbozzi tal-baġits tagħhom għall-2015. Il-Grupp tal-Euro ser jevalwa l-abbozzi tal-baġits f'Novembru abbażi tal-valutazzjoni tal-Kummissjoni.

Il-Grupp tal-Euro kommess favur il-Patt ta' Stabbiltà u Tkabbir 

Il-Grupp tal-Euro qabel li l-livell baxx ta' tkabbir u l-inflazzjoni mrażżna ta' bħalissa jagħmluha essenzjali li jkun hemm azzjoni deċiżiva fl-oqsma kollha. Jeħtieġ li l-miżuri reċenti ta' politika monetarja mħabbra mill-Bank Ċentrali Ewropew jiġu kkomplimentati b'azzjoni mill-istati membri.

It-twettiq ta' politika fiskali soda, ir-riformi strutturali u l-iffaċilitar tal-investiment jibqgħu l-istrateġija tal-Grupp tal-Euro għat-tkabbir. Il-ministri tennew li din l-istrateġija għandha titwettaq fl-ambitu tar-regoli tal-Patt ta' Stabbiltà u Tkabbir (PST). Kwalunkwe forma ta' flessibbiltà għandha tinstab fl-ambitu tar-regoli tal-PST u għandhom jiġu kkunsidrati r-riformi strutturali li jitwettqu mill-istati membri.

"Ilkoll qbilna li nirrispettaw ir-regoli," qal il-President tal-Grupp tal-Euro J.Dijsselbloem wara l-laqgħa.

Il-laqgħa li jmiss tal-Grupp tal-Euro ser issir fit-13 ta' Ottubru 2014. 

• Ritratti u filmati tal-laqgħa tal-Grupp tal-euro, 12 ta' Settembru 2014