An Chomhairle um Ghnóthaí Ginearálta, 23/07/2014, 23 Iúil 2014

Glacfaidh an Liotuáin an euro mar airgeadra an 1 Eanáir 2015

Ag cruinniú na Comhairle Gnóthaí Ginearálta an 23 Iúil fearadh fáilte roimh an Liotuáin agus í ar tí teacht isteach sa limistéar euro. Phléigh na hairí freisin clár oibre Uachtaránacht na hIodáile agus an t-athbhreithniú meántéarmach ar an straitéis Eoraip 2020.

An 1 Eanáir 2015, beidh an Liotuáin ar an 19ú mBallstát a ghlac an euro mar airgeadra.

"Bhí toradh fónta ar iarrachtaí comhsheasmhacha na Liotuáine: d'fhear an limistéar euro fáilte romhainn inniu", a dúirt Algirdas Butkevičius, Príomh-Aire na Liotuáine, ag an gcruinniú a bhí ag airí an Aontais.

Tá sé an-tábhachtach don limistéar euro ina iomláine go mbeadh an Liotuáin páirteach ann.

"Is léiriú é ar a tharraingtí agus atá togra an airgeadra aonair i gcónaí agus ar a ábhartha agus atá sé do thodhchaí ár gcomhphobail", arsa Sandro Gozi, Státrúnaí na hIodáile do Ghnóthaí Eorpacha agus Uachtarán ar Chomhairle an Aontais Eorpaigh.

Socraíodh gurb é 3.45280 litas na Liotuáine in aghaidh an euro an ráta comhshó.

Clár na hUachtaránachta

Thíolaic Uachtaránacht na hIodáile, i seisiún poiblí, a clár oibre do ré a téarma oifige - Iúil go Nollaig 2014. Tá sé i gceist aici cur leis an díospóireacht atá ar bun faoi láthair maidir le tosaíochtaí an Aontais amach anseo agus a áirithiú go mbainfear leas iomlán as na deiseanna a chruthaíonn na Conarthaí atá ann cheana féin chun na tosaíochtaí sin a bhaint amach.

Athbhreithniú meántéarmach ar an Straitéis Eoraip 2020

Phléigh an Chomhairle an treochlár don athbhreithniú meántéarmach ar straitéis fáis Eoraip 2020. Leagtar síos sa treochlár an bealach chun cinn faoi Uachtaránacht na hIodáile chun ullmhú don athbhreithniú ar an straitéis in 2015.

Conclúidí ón gComhairle Eorpach a chur chun feidhme

Phléigh na hairí an obair leantach a dhéanfar maidir le cur chun feidhme thosaíochtaí an chláir oibre straitéisigh ar thángthas ar chomhaontú ina leith ag cruinniú na Comhairle Eorpaí i mí an Mheithimh.

Ghlac an Chomhairle na gníomhartha reachtacha agus na cinntí a leanas gan iad a phlé:

• rialachán le bainistiú a dhéanamh ar an bhfreagracht airgeadais a bhaineann le himeachtaí chun díospóidí idir infheisteoirí agus stát a réiteach
• treoir atá dírithe ar rochtain ar sheirbhísí bunúsacha íocaíochta a áirithiú agus ar fheabhas a chur ar an bhfaisnéis maidir leis na táillí a bhaineann le cuntais íocaíochta
• treoir maidir le gnóthais le haghaidh comhinfheistíochta in urrúis inaistrithe (GCUIanna), lena dtugtar isteach forálacha sonracha maidir le dualgais na taisclainne i ndáil le cumhdach agus maoirseacht
• rialachán atá dírithe ar fheabhas a chur ar shábháilteacht sa chóras socraíochta urrúis agus ar an margadh a oscailt do sheirbhísí taisclann lárnach urrús (CSDanna)
• seasamh na Comhairle maidir le dréacht-treoir lena dtugtar níos mó solúbthachta do na Ballstáit lena chinneadh an mian leo orgánaigh ghéinmhodhnaithe (OGManna) a shaothrú
• rialachán maidir le haitheantas frithpháirteach a thabhairt do shainaithint leictreonach
• rialachán maidir le maoiniú a dhéanamh ar ghníomhaíochtaí na Gníomhaireachta Eorpaí um Shábháilteacht Mhuirí le truailliú farraige a chomhrac
• treoir ina bhfuil rialacha mionsonraithe maidir le trealamh muirí ar bord longa de chuid an Aontais