An Chomhairle um Ghnóthaí Ginearálta, 29 Meán Fómhair 2014

Straitéis an Aontais Eorpaigh don Réigiún Adriadach Iónach

An 29 Meán Fómhair, ghlac an Chomhairle Gnóthaí Ginearálta conclúidí maidir le Straitéis an Aontais Eorpaigh don Réigiún Adriadach Iónach. Phléigh na hairí freisin an t-ullmhúchán don chruinniú mullaigh a bheidh go luath ag an gComhairle Eorpach. 

Ghlac na hAirí straitéis mhacrairéigiúnach faoina dtugtar le chéile 8 dtír sa réigiún Adriadach Iónach, chun cur leis an gcomhar le haghaidh fáis agus fostaíochta.

Cuirfidh na tíortha sin atá rannpháirteach - an Chróit, an Ghréig, an Iodáil, an tSlóivéin, an Albáin, an Bhoisnia agus an Heirseagaivéin, Montainéagró agus an tSeirbia - treise leis an gcomhar eatarthu i dtaca leis an ngeilleagar muirí, le caomhnú na timpeallachta muirí, leis an mbonneagair iompair agus fuinnimh agus le turasóireacht inbhuanaithe.
Tá an cinneadh faoi réir fhormhuiniú na Comhairle Eorpaí.

An t-ullmhúchán atá ar bun do chruinniú na Comhairle Eorpaí i mí Dheireadh Fómhair

Phléigh na hAirí freisin an clár oibre don chéad chruinniú eile a bheidh ag an gComhairle Eorpach an 23 agus an 24 Deireadh Fómhair.

Tá sé beartaithe go bpléifeadh ceannairí an Aontais an méid a leanas

• an aeráid agus fuinneamh d'fhonn cinneadh críochnaitheach a dhéanamh maidir leis an gcreat nua beartais don aeráid agus don fhuinneamh
• saincheisteanna eacnamaíochta
• saincheisteanna sonracha maidir leis an gcaidreamh eachtrach

Cur chun feidhme na gconclúidí ón gComhairle Eorpach

Ar bhonn na tuarascála a d'ullmhaigh Uachtaránacht na hIodáile, bhreathnaigh Airí an Aontais freisin ar bhealaí a bhféadfaí dlús a chur le cur chun feidhme na dtosaíochtaí ar thángthas ar chomhaontú ina leith ag cruinniú na Comhairle Eorpaí i mí an Mheithimh.

Ag féachaint don chomhdháil ar fhostaíocht in Milano an 8 Deireadh Fómhair, phléigh siad bearta atá dírithe ar fhás, ar fhostaíocht agus ar an iomaíochas san Eoraip a chothú.

"Tar éis sraith de dhíospóireachtaí míosúla, cuirfimid isteach tuarascáil chuimsitheach, ag deireadh na hUachtaránachta, maidir le céim thosaigh chur chun feidhme an chláir oibre straitéisigh" a dúirt Sandro Gozi, Státrúnaí na hIodáile do Ghnóthaí Eorpacha agus Uachtarán na Comhairle.

Ábhair eile ar an gclár oibre

Feidhmiú an Aontais Eorpaigh a fheabhsú

Thug an Uachtaránacht fógra don Chomhairle faoin gceathrú cruinniú a bhí ag Meitheal Chairde na hUachtaránachta an 25 Meán Fómhair 2014 maidir le feidhmiú an Aontais Eorpaigh a fheabhsú.

Ghlac an Chomhairle na gníomhartha reachtacha agus na cinntí seo a leanas, gan iad a phlé:

• feidhmiú sealadach an chomhaontaithe saorthrádála leis an Úcráin a chur siar go dtí an 1 Eanáir 2016  
• tús a chur an 1 Samhain le feidhmiú sealadach an chuid eile den chomhaontú leis an Úcráin maidir le ceartas, saoirse agus slándáil, agus comhar méadaithe maidir le cúrsaí eacnamaíochta agus airgeadais
• treoir maidir le faisnéis neamhairgeadais agus éagsúlachta a bheith á nochtadh ag cuideachtaí móra áirithe
• leathnú ar shainordú mhisean "smacht reachta" an Aontais Eorpaigh don Chosaiv (EULEX Kosovo) chun tacú le nósanna imeachta breithiúnacha a athlonnaíodh
• dhá rialachán nua maidir leis an stádas agus an maoiniú a dheonaítear do pháirtithe polaitiúla Eorpacha agus dá bhfondúireachtaí cleamhnaithe
• treoir maidir le bonneagar íosta a fhorbairt do bhreoslaí malartacha ar fud an Aontais
• rialachán maidir le tabhairt isteach agus leathadh speiceas coimhthíoch ionrach a chosc agus a bhainistiú