An Chomhairle um Ghnóthaí Ginearálta, 15/03/2016, 15 Márta 2016

Na príomhthorthaí

Tacaíocht éigeandála don Ghréig

Ghlac an Chomhairle rialachán lena mbunaítear sásra tacaíochta éigeandála Aontais chun cabhrú leis an nGréig agus leis na Ballstáit eile atá ag streachailt siocair go bhfuil cuid mhór dídeanaithe ag teacht chucu. Cuirtear gealltanas a thug an Chomhairle Eorpach i ngníomh leis sin. Leis an rialachán, cuirtear ar chumas an Aontais freagairt thráthúil, éifeachtach a thabhairt ar an gcás fíorchasta atá ag forbairt go gasta ar an láthair. Agus deireadh ag teacht leis na sreafaí neamhrialta imirceach feadh bhealach na mBalcán Thiar, tá níos mó ná 35 000 dídeanaí sa Ghréig faoi láthair. 

Léirítear leis an gcinneadh seo ón gComhairle go seasann an tAontas leis an nGréig ag an am deacair seo. Déanfaidh Uachtaránacht na hÍsiltíre an oiread agus is féidir léi lena chinntiú go gcuirfear na cistí riachtanacha ón Aontas ar fáil chomh gasta agus is féidir. Bert Koenders, Aire Gnóthaí Eachtracha na hÍsiltíre 

Tá an chabhair a chuirtear ar fáil faoin ionstraim nua bunaithe ar riachtanais agus tá sí dírithe ar bheatha daoine a chaomhnú, angar daoine a chosc agus dínit an duine a chothabháil. Áirítear bia, dídean, uisce, cógais leighis agus riachtanais bhunúsacha eile ar an gcabhair sin. Is é an Coimisiún nó eagraíochtaí comhpháirtíochta a roghnaíonn an Coimisiún i dlúthchomhar le húdaráis na Gréige a chuireann an chabhair ar fáil.

• Teacht ar réitigh i ndáil leis an mbrú imirce (cúlra faisnéise)

Ullmhúchán do Chomhairle Eorpach mhí Márta

Rinne an Chomhairle an obair ullmhúcháin don chéad chruinniú eile den Chomhairle Eorpach trí scrúdú a dhéanamh ar na dréachtchonclúidí. Tiocfaidh ceannairí an Aontais Eorpaigh le chéile sa Bhruiséil ar an 17 agus 18 Márta 2016 le plé a dhéanamh faoi na bearta breise a d'fhéadfaí a dhéanamh chun dul i ngleic le géarchéim na himirce agus faoi na tosaíochtaí do Sheimeastar Eorpach 2016. 

• An Chomhairle Eorpach, 17-18 Márta 2016

Comhaontú maidir le reachtóireacht níos fearr

Ghlac an Chomhairle an comhaontú idirinstitiúideach maidir le reachtóireacht níos fearr. Dírítear sa chomhaontú ar an gcomhar idir an Chomhairle, an Pharlaimint agus an Coimisiún a neartú le feabhas a chur ar an mbealach ina ritheann an tAontas dlíthe agus chun a áirithiú gur fearr a fhónfaidh dlíthe an Aontais do na saoránaigh agus do ghnólachtaí.

"Ní bhaineann an comhaontú seo leis an mbealach ina bhfeidhmíonn institiúidí an Aontais amháin, beidh saoránaigh agus cuideachtaí in ann tairbhe fhuaimintiúil a bhaint as. Beidh sé níos éasca dlíthe a thuiscint agus a chur chun feidhme. Déanfaidh sin cúrsaí níos fusa do shaoránaigh, do ghnólachtaí agus don riarachán," a dúirt Bert Koenders.

• Comhaontú maidir le reachtóireacht níos fearr