Kunsill Affarijiet Ġenerali, 15/03/2016, 15 ta' Marzu 2016

Riżultati ewlenin

Appoġġ ta’ emerġenza għall-Greċja

Il-Kunsill adotta regolament li jistabbilixxi mekkaniżmu ta’ appoġġ ta’ emerġenza tal-UE biex jgħin lill-Greċja u lil stati membri oħra li jinsabu f’diffikultà minħabba l-wasla ta’ għadd kbir ta’ refuġjati. Dan iqiegħed fil-prattika l-impenn tal-Kunsill Ewropew. Huwa jippermetti li l-UE tipprovdi rispons f'waqtu u effettiv għas-sitwazzjoni diffiċli ħafna li qed tiżviluppa b'mod rapidu fuq il-post. Hekk kif ġew fi tmiemhom il-flussi irregolari ta’ migranti tul ir-rotta tal-Balkani tal-Punent, bħalissa hemm aktar minn 35 000 refuġjat fil-Greċja. 

Din id-deċiżjoni tal-Kunsill turi li l-UE tappoġġa lill-Greċja f’dan iż-żmien diffiċli. Il-presidenza Netherlandiża ser tagħmel dak kollu li tista’ biex tiżgura li l-fondi meħtieġa tal-UE jiġu mobilizzati malajr kemm jista’ jkun. Bert Koenders, il-Ministru għall-Affarijiet Barranin tan-Netherlands 

L-għajnuna mogħtija skont l-istrument il-ġdid hija bbażata fuq il-ħtiġijiet u hija mmirata lejn il-protezzjoni tal-ħajja, il-prevenzjoni tas-sofferenza umana, u l-preservazzjoni tad-dinjità umana. Din tinkludi ikel, kenn, ilma, mediċini u bżonnijiet bażiċi oħra. Hija tiġi pprovduta mill-Kummissjoni jew minn organizzazzjonijiet sħab magħżula mill-Kummissjoni b’kooperazzjoni mill-qrib mal-awtoritajiet Griegi.

• It-tiftix ta’ soluzzjonijiet għal pressjonijiet migratorji (informazzjoni ġenerali)

Tħejjija għall-Kunsill Ewropew ta' Marzu

Il-Kunsill ħejja għall-Kunsill Ewropew li jmiss billi eżamina l-abbozz ta' konklużjonijiet. Il-mexxejja tal-UE ser jiltaqgħu fi Brussell fis-17 u t-18 ta' Marzu 2016 biex jiddiskutu passi ulterjuri biex tiġi indirizzata l-kriżi tal-migrazzjoni, u l-prijoritajiet għas-semestru Ewropew 2016. 

• Kunsill Ewropew, 17-18 ta' Marzu 2016

Ftehim dwar tfassil aħjar tal-liġijiet

Il-Kunsill adotta l-ftehim interistituzzjonali dwar tfassil aħjar tal-liġijiet. Il-ftehim għandu l-għan li jsaħħaħ il-kooperazzjoni bejn il-Kunsill, il-Parlament u l-Kummissjoni biex itejbu l-mod kif l-UE tilleġisla u jiżguraw li l-liġijiet tal-UE jaqdu aħjar liċ-ċittadini u n-negozji.

“Dan il-ftehim mhuwiex biss dwar kif jaħdmu l-istituzzjonijiet tal-UE, huwa verament ser jipprovdi benefiċċji reali ħafna għaċ-ċittadini u l-kumpaniji. Il-liġijiet ser ikunu aktar sempliċi biex jinftiehmu u biex jiġu implimentati. Dan ser jiffaċilita l-ħajja taċ-ċittadini, in-negozji u ser jagħmel l-amministrazzjoni aktar faċli," qal Bert Koenders.

• Ftehim dwar it-tfassil aħjar tal-liġijiet