An Chomhairle Gnóthaí Ginearálta, 20/11/2017, 20 Samhain 2017

Na príomhthorthaí

Chuir an Chomhairle tús leis an ullmhúchán do Chomhairle Eorpach mhí na Nollag trí phlé a dhéanamh ar chlár oibre sealadach. Ag an gcruinniú sin, táthar ag súil go dtabharfaidh ceannairí an Aontais aghaidh ar shaincheisteanna cosanta agus go nglacfaidh siad conclúidí maidir le cúrsaí sóisialta, oideachais agus cultúir. Faoi Chlár Oibre na gCeannairí, déanfaidh na Ceannairí plé téamach maidir leis an mbeartas imirce.

Phléigh na hAirí freisin staid chur chun feidhme na gconclúidí ón gComhairle Eorpach i mí Dheireadh Fómhair agus go háirithe cistiú sciar na hAfraice Thuaidh de Chiste Iontaobhais an Aontais Eorpaigh.

Mar chuid den phróiseas pleanála reachtach bliantúil, bhí malartú tuairimí ag na hairí maidir le clár oibre an Choimisiúin don bhliain 2018. Táthar ag súil go ndéanfaidh an Chomhairle Gnóthaí Ginearálta i mí na Nollag dearbhú comhpháirteach maidir le tosaíochtaí reachtacha an Aontais don bhliain 2018, a shíneoidh uachtaráin na dtrí institiúidí ar imeall Chomhairle Eorpach mhí na Nollag.

Rinne an Chomhairle an dul chun cinn a mheas i ndáil le cur chun feidhme comhaontaithe idirinstitiúideach maidir le reachtóireacht níos fearr.

Mar ullmhúchán don Seimeastar Eorpach 2018, thíolaic Uachtaránacht na hEastóine, i gcomhar le huachtaránacht nua na Bulgáire, an treochlár don Seimeastar Eorpach 2018, ina leagtar amach conas a thabharfar obair chun cinn go dtí deireadh na bliana 2017 agus sa chéad leath den bhliain 2018.

Ghlac an Chomhairle conclúidí maidir leis an gcibearshlándáil san Aontas Eorpach a fheabhsú. "Tá an chibearchoireacht féin agus cibearghníomhaíochtaí státurraithe mailíseacha ar na bagairtí is mó ar domhan ar ár sochaithe agus ar ár ngeilleagair. Cailltear thart ar EUR 400 billiún ar fud an domhain gach bliain de dheasca na gcibearionsaithe cheana féin. Cuirtear i bhfios go soiléir leis sin gur gá don Aontas úsáid a bhaint as na huirlisí atá ar fáil chun an chobhsaíocht a mhéadú sa chibearspás agus chun freagairt ar chibeartheagmhais mhórscála. “I mbeagán focal, caithfidh an tAontas bheith ina cheannródaí,” arsa Matti Maasikas, Leas-Aire Gnóthaí Eorpacha na hEastóine agus cathaoirleach chruinniú Chomhairle an lae inniu. “Is gá cur leis na hiarrachtaí agus leis an infheistíocht atá á ndéanamh againn sa chibearshlándáil má táimid le margadh aonair digiteach atá láidir agus iontaofa a thógáil dár saoránaigh,” a dúirt Maasikas freisin.

• Neart á chur leis an gcibearshlándáil ag an Aontas Eorpach

Ghlac an Chomhairle conclúidí maidir le Digitiú don Fhorbairt. Déantar foráil ansin do phríomhshruthú an digitithe sa ghné sheachtrach, go háirithe trí chomhar an Aontais um fhorbairt, mar tugann an digitiú deiseanna nua don fhás i dtíortha atá i mbéal forbartha. Tá na Ballstáit ag tnúth le céimeanna nithiúla i ndáil le cur chun feidhme an digitithe don fhorbairt, lena n-áirítear trí na spriocanna insoláthartha i gcomhthéacs Chruinniú Mullaigh Chomhpháirtíocht an Oirthir ar an 24 Samhain agus Chruinniú Mullaigh AE-An Afraic a bheidh ar siúl ar an 29 go dtí an 30 Samhain.

• Digitiú don fhorbairt - conclúidí

Ghlac an Chomhairle freisin rialacháin chun córas dul isteach-imeachta a chruthú chun faisnéis a bhaineann le náisiúnaithe tríú tír a chlárú nuair a thrasnaíonn siad teorainneacha seachtracha limistéar Schengen. “Rannchuideofar, leis an gcóras dul isteach-imeachta, le teorainneacha seachtracha a fheabhsú, rófhantóirí a shainaithint ar bhealach níos fearr agus an comhrac i gcoinne na sceimhlitheoireachta a neartú.” arsa Andres Anvelt, Aire Gnóthaí Baile na hEastóine.

• Córas dul isteach-imeachta: arna ghlacadh go críochnaitheach ag an gComhairle

An chibearshlándáil

Meastar go ndéanfaidh an Chomhairle conclúidí a ghlacadh, gan phlé, maidir leis an gcibearshlándáil.

• An Chomhairle Eorpach, 14-15 Nollaig

• An Seimeastar Eorpach