Cruinniú urghnách den Chomhairle Iompair, Teileachumarsáide agus Fuinnimh (Fuinneamh), 26 Iúil 2022

Na príomhthorthaí

Tháinig airí fuinnimh an Aontais ar chomhaontú polaitiúil maidir leis an éileamh ar ghás nádúrtha a laghdú 15%, ar bhonn deonach, an geimhreadh seo. Is é is cuspóir don Rialachán sin ón gComhairle gás a choigilt chun ullmhú d'aon chur isteach a d'fhéadfadh a bheith ar sholáthairtí gáis ón Rúis atá ag úsáid soláthairtí fuinnimh go leanúnach mar arm. Foráiltear sa Rialachán go bhféadfadh an Chomhairle ‘Foláireamh ón Aontas’ maidir le slándáil an tsoláthair a ghníomhachtú, agus sa chás sin, bheadh sé éigeantach an t-éileamh ar ghás a laghdú.

Seasann an tAontas le chéile i ndlúthpháirtíocht. Leis an gcinneadh seo, léirítear go soiléir go seasfaidh na Ballstáit an fód i gcoinne aon iarracht a dhéanann an Rúis deighilt a dhéanamh san Aontas trí úsáid a bhaint as soláthairtí fuinnimh mar arm. Toisc gur glacadh an togra maidir le laghdú gáis i bhfad níos luaithe ná mar a rabhthas ag súil leis, níl aon amhras ach gur neartaíodh ár gcomhshlándáil fuinnimh. Cuirfear leis an ullmhacht, ach gás a choigilt anois. Beidh an geimhreadh i bhfad níos saoire agus níos éasca do shaoránaigh agus do thionscal an Aontais. Jozef Síkela, Aire Tionscail agus Trádála na Seicia

• Gealltanas tugtha ag na Ballstáit an t-éileamh ar ghás a laghdú 15% an geimhreadh seo (preaseisiúint, an 26 Iúil 2022)

Bhí malartú tuairimí ag na hairí maidir le staid an fhuinnimh san Eoraip i gcomhthéacs chogadh foghach na Rúise i gcoinne na hÚcráine.

Bhí malartú tuairimí ag na hairí freisin maidir lena mbearta náisiúnta agus a bpleananna teagmhasacha, agus i ndáil le gníomhaíochtaí gearrthéarmacha breise chun slándáil an tsoláthair fuinnimh san Aontas a neartú.

Phléigh na hairí an chaoi is féidir laghdú ar an éileamh ó chustaiméirí faoi chosaint a spreagadh (amhail teaghlaigh agus eintitis chriticiúla) roimh an ngeimhreadh chun an baol ganntanais gáis a laghdú do chustaiméirí criticiúla nach bhfuil cosanta. Bhí malartú tuairimí acu maidir leis na bearta, in éineacht le dea-chleachtais caomhnaithe fuinnimh a chomhroinnt, ar cheart tosaíocht a thabhairt dóibh chun feabhas a chur ar an tslándáil fuinnimh roimh an gcéad gheimhreadh eile agus soláthar cobhsaí fuinnimh á chinntiú do thionscal agus do shaoránaigh.

Phléigh na hairí freisin tionscnaimh an phacáiste ‘Coigil gás i gcomhair geimhreadh sábháilte’ a thíolaic an Coimisiún an 20 Iúil, go háirithe an chaoi a bhfuil sé ar intinn acu úsáid a bhaint as na bearta, chun a chinntiú go gcomhroinnfear na hacmhainní gáis atá ar fáil idir na Ballstáit.

Faoin bpointe ‘gnó eile’, chomhroinn an Ghréig eolas faoin dearadh margaidh cumhachta chun praghsanna leictreachais a dhíchúpláil ó phraghsanna gáis nádúrtha atá ag ardú as cuimse.

Tar éis an chruinnithe, bhí lón neamhfhoirmiúil ag na hairí le haire fuinnimh na hÚcráine, German Galushchenko, chun comhar fuinnimh an Aontais leis an Úcráin a phlé.

Ag an gcruinniú, ghlac an Chomhairle na ‘míreanna A’ a liostaítear thíos gan phlé.

• Praghsanna fuinnimh agus slándáil an tsoláthair (eolas cúlra)
• Tionchar ionradh na Rúise ar an Úcráin ar na margaí: Freagairt an Aontais (eolas cúlra)
• Féach ar an taifeadadh den seisiún poiblí