Amlíne – an tSúdáin

Chinn an Chomhairle toirmeasc a thabhairt isteach ar ór ón tSúdáin a cheannach, a allmhairiú nó a aistriú. Cuireadh cosc freisin ar mhearcair agus ciainíd a dhíol, a sholáthar, a aistriú nó a onnmhairiú chuig an tSúdáin. Úsáidtear na ceimiceáin sin go forleathan le haghaidh mianadóireacht óir nó saothrú óir.

Tá na bearta seo ceaptha chun srian a chur le foinsí maoinithe na coinbhleachta agus chun níos mó brú a chur orthu siúd is ciontaí leis an gcogadh.

• An tSúdáin: córas smachtbhannaí an Aontais neartaithe ag an gComhairle trí dhíriú ar thrádáil óir (preaseisiúint, an 13 Iúil 2026)

Iarrann an tAontas ar na Fórsaí Mear-Thacaíochta deireadh a chur láithreach le gach oibríocht mhíleata in El Obeid agus timpeall uirthi a chuireann sibhialtaigh i mbaol.

Iarrann an tAontas ar na páirtithe uile sa choinbhleacht filleadh ar an gcaibidlíocht le haghaidh sos comhraic marthanach, chun rochtain dhaonnúil thapa, shábháilte, gan bhac, phrionsabálta agus mharthanach a chinntiú, chun tacú le próiseas polaitiúil sibhialtach faoi stiúir na Súdáine as a dtiocfaidh athbhunú an rialachais shibhialtaigh, agus chun cuntasacht agus urraim don dlí idirnáisiúnta a athbhunú agus a chaomhnú.

• An tSúdáin: Ráiteas ón Ardionadaí thar ceann an Aontais maidir leis an bhforéigean atá ag dul in olcas in El Obeid (preaseisiúint, an 10 Iúil 2026)

Diúltaíonn an tAontas go láidir d’aon iarracht aontaobhach rialachas comhthreomhar a bhunú a bhfuil riosca ann go bhféadfaí an tír a dheighilt agus tá sé réidh chun tacú le haon tionscnamh síochána inchreidte, aontaithe, lena n-áirítear roghanna chun tacú le sásra faireacháin idirnáisiúnta.

Tá an tAontas tiomanta i gcónaí tacú leis an bhfreagairt dhaonnúil ar riachtanais an phobail agus leanfaidh sé dá chuid oibre maidir le bonneagar criticiúil a chosaint. Athdhearbhaíonn an tAontas go dtacaíonn sé le mianta mhuintir na Súdáine maidir le rialachas daonlathach.

• An tSúdáin: Ráiteas ón Ardionadaí thar ceann an Aontais Eorpaigh agus an tSúdáin 3 bliana i mbun coinbhleachta (preaseisiúint, an 21 Aibreán 2026)

Ghlac an Chomhairle smachtbhannaí i gcoinne seachtar eile atá freagrach as síocháin, cobhsaíocht nó slándáil na Súdáine a chur i mbaol.

De dheasca an ghéaraithe mhóir ar an bhforéigean sa tSúdáin, tá daoine á gcailleadh in Darfur agus ar fud na tíre, agus tá sáruithe á ndéanamh ar an dlí idirnáisiúnta um chearta an duine agus ar an dlí daonnúil idirnáisiúnta.

• An tSúdáin: smachtbhannaí forchurtha ag an gComhairle ar sheachtar i bhfianaise an ghéaraithe mhóir ar an bhforéigean sa tír (preaseisiúint, an 29 Eanáir 2026)

D’eisigh an tAontas ráiteas inar cáineadh go fíorghéar na hainghníomhartha tromchúiseacha atá déanta agus fós á ndéanamh ag na Fórsaí Mear-Thacaíochta sa tSúdáin, urghabháil chathair El Fasher san áireamh.

Is sáruithe tromchúiseacha ar an dlí daonnúil idirnáisiúnta, agus ar an dlí idirnáisiúnta um chearta an duine, iad díriú d’aon ghnó ar shibhialtaigh, marú ar bhonn eitneach, foréigean córasach gnéasach agus inscnebhunaithe, an t-ocras a úsáid mar mhodh cogaíochta agus an rochtain ar chabhair dhaonnúil a dhiúltú. D’fhéadfadh na gníomhartha sin a bheith i gcoireanna cogaidh agus ina gcoireanna in aghaidh na daonnachta.

• An tSúdáin: Ráiteas ón Ardionadaí thar ceann an Aontais Eorpaigh (preaseisiúint, an 20 Samhain 2025)

Cáineann an tAontas go láidir an choinbhleacht leanúnach sa tSúdáin; is coinbhleacht í – atá le breis agus dhá bhliain anuas – ina cúis le bás na mílte agus le hollchruatan do mhuintir na Súdáine trí chéile. Is bagairt thromchúiseach í freisin ar an gcobhsaíocht agus ar an tslándáil sa réigiún máguaird.

Is cúis mhór imní don Aontas aontacht, iomláine chríochach agus cobhsaíocht na Súdáine agus diúltaíonn sé d’aon iarracht an tír a dheighilt.

• An tSúdáin: conclúidí formheasta ag an gComhairle maidir leis an gcoinbhleacht leanúnach (preaseisiúint, an 20 Deireadh Fómhair 2025)

Chomhaontaigh an Chomhairle síneadh – go dtí an 10 Deireadh Fómhair 2026 – a chur le bearta sriantacha an Aontais ina gcoinne siúd atá freagrach as an tSúdáin a dhíchobhsú agus as bac a chur ar aistriú polaitiúil na tíre.

• An tSúdáin: síneadh bliana curtha ag an Aontas leis an gcóras smachtbhannaí (preaseisiúint, an 22 Meán Fómhair 2025)

Smachtbhannaí curtha ag an gComhairle ar bheirt agus ar dhá eintiteas atá freagrach as sáruithe tromchúiseacha ar chearta an duine agus as síocháin, cobhsaíocht agus slándáil na tíre a chur i mbaol.

• An tSúdáin: Smachtbhannaí curtha ag an gComhairle ar dhaoine agus ar eintitis as sáruithe tromchúiseacha ar chearta an duine agus as síocháin, cobhsaíocht agus slándáil na tíre a chur i mbaol (preaseisiúint, an 18 Iúil 2025)

Tá achainí láidir déanta an athuair ag an Aontas ar na páirtithe cogaíochta sos cogaidh marthanach a chur ar bun láithreach. Iarrann sé freisin ar na stáit uile a sholáthraíonn airm agus cistí do páirtithe cogaíochta deireadh a chur lena dtacaíocht láithreach agus teacht le chéile ar son na síochána.

Tathantaíonn an tAontas ar na páirtithe cogaíochta dul i mbun caibidlíochta de mheon macánta ar mhaithe le síocháin inbhuanaithe, ina n-urramófar iomláine chríochach, aontacht agus ceannasacht.

• An tSúdáin: ráiteas ón Ardionadaí thar ceann an Aontais Eorpaigh agus an tSúdáin 2 bhliain i mbun coinbhleachta (preaseisiúint, an 11 Aibreán 2025)

Ghlac an Chomhairle smachtbhannaí i gcoinne ceathrar atá freagrach as síocháin, cobhsaíocht agus slándáil na Súdáine a chur i mbaol.

• An tSúdáin: ceathrar curtha ag an gComhairle le liosta smachtbhannaí an Aontais as síocháin, cobhsaíocht agus slándáil na tíre a chur i mbaol (preaseisiúint, an 16 Nollaig 2024)

Is cúis mhór imní do cheannairí an Aontais an staid dhaonnúil thubaisteach sa tSúdáin agus cáineann siad go géar an chaoi a bhfuiltear ag díriú, go díreach neamh-idirdhealaitheach, ar shibhialtaigh, rud a dhéanann gur measa arís an ghéarchéim dhaonnúil.

Iarrann an tAontas ar na páirtithe uile sa choinbhleacht deireadh a chur láithreach leis an gcogaíocht ar fad agus tacaíonn sé le réiteach inbhuanaithe ar an gcoinbhleacht trí idirphlé.

• An Chomhairle Eorpach, an 17 Deireadh Fómhair 2024

Chinn an Chomhairle síneadh a chur leis na smachtbhannaí go dtí an 10 Deireadh Fómhair 2025. Dírítear orthu siúd atá freagrach as an mbonn a bhaint de chobhsaíocht agus d’aistriú polaitiúil na Súdáine.

• An tSúdáin: síneadh bliana curtha le córas smachtbhannaí an Aontais (preaseisiúint, an 8 Deireadh Fómhair 2024)

Ghlac an Chomhairle bearta sriantacha i gcoinne seisear atá freagrach as gníomhaíochtaí a bhaineann an bonn de chobhsaíocht agus d’aistriú polaitiúil na Súdáine.

• An tSúdáin: seisear curtha ag an gComhairle le liosta smachtbhannaí an Aontais toisc gur bhaineadar an bonn den chobhsaíocht agus den aistriú polaitiúil (preaseisiúint, an 24 Meitheamh 2024)

Agus bliain caite i mbun coinbhleachta, tá achainí láidir déanta an athuair ag an Aontas ar na páirtithe cogaíochta sos cogaidh marthanach láithreach a chur ar bun, chomh maith le sásraí faireacháin a bhunú.

Meabhraíonn an tAontas do na páirtithe cogaíochta go bhfuil sé d’oibleagáid orthu sibhialtaigh a chosaint faoin dlí daonnúil idirnáisiúnta. Sárú soiléir ar an dlí idirnáisiúnta is ea rochtain ar bhia a dhiúltú, mar aon le cúram sláinte agus earraí faoisimh a dhiúltú, rudaí a d’fhéadfadh a bheith ina gcoireanna cogaidh.

• An tSúdáin: ráiteas ón Ardionadaí thar ceann an Aontais Eorpaigh agus bliain caite i mbun coinbhleachta (preaseisiúint, an 12 Aibreán 2024)

Ghlac an Chomhairle smachtbhannaí i gcoinne sé eintiteas atá freagrach as tacú le gníomhaíochtaí lena mbaintear an bonn de chobhsaíocht agus d’aistriú polaitiúil na Súdáine.

• An tSúdáin: sé eintiteas curtha ag an gComhairle le liosta smachtbhannaí an Aontais (preaseisiúint, an 22 Eanáir 2024)

Athdhearbhaíonn an tAontas Eorpach agus na Ballstáit go gcáineann siad go láidir an troid leanúnach idir Fórsaí Armtha na Súdáine agus na Fórsaí Mear-Tacaíochta agus na mílístí.

Is olc leis an Aontas gur tháinig géarú suntasach ar an bhforéigean agus gur cailleadh daoine in Darfur agus ar fud na tíre, agus is olc leis na sáruithe ar an dlí idirnáisiúnta um chearta an duine agus ar an dlí daonnúil idirnáisiúnta.

• An tSúdáin: ráiteas ón Ardionadaí thar ceann an Aontais Eorpaigh maidir lena bhfuil tite amach le déanaí (preaseisiúint, an 27 Samhain 2023)

Ghlac an Chomhairle córas tiomnaithe smachtbhannaí i bhfianaise gníomhaíochtaí lena mbaintear an bonn de chobhsaíocht agus d’aistriú polaitiúil daonlathach na Súdáine.

• Cinneadh ón gComhairle a bhaineann le bearta sriantacha i bhfianaise gníomhaíochtaí lena mbaintear an bonn de chobhsaíocht agus d’aistriú polaitiúil na Súdáine (Iris Oifigiúil an Aontais Eorpaigh)

Cáineann an tAontas Eorpach go géar an troid leanúnach sa tSúdáin, chomh maith le diúltú leanúnach na bpáirtithe sa choinbhleacht iarrachtaí a dhéanamh teacht ar réiteach síochánta.

Is olc leis an Aontas an bás agus na mórsháruithe ar an dlí idirnáisiúnta, lena n-áirítear an dlí idirnáisiúnta um chearta an duine agus an dlí daonnúil idirnáisiúnta. Is cúis imní ar leith don Aontas iad na tuairiscí ar ionsaithe mórscála ar shibhialtaigh agus ar limistéir shibhialtacha.

• An tSúdáin: ráiteas ón Ardionadaí thar ceann an Aontais Eorpaigh maidir leis an gcoinbhleacht armtha (preaseisiúint, an 5 Iúil 2023)

Cáineann an tAontas Eorpach agus na Ballstáit go láidir an comhrac atá ag leanúint ar aghaidh idir Fórsaí Armtha na Súdáine agus na Fórsaí Mear-Thacaíochta, comhrac a chuireann sábháilteacht agus slándáil mhuintir na Súdáine i mbaol chomh maith le haontacht agus cobhsaíocht na tíre.

Is olc leis an Aontas an bás agus na mórsháruithe ar an dlí idirnáisiúnta, lena n-áirítear an dlí idirnáisiúnta um chearta an duine agus an dlí daonnúil idirnáisiúnta.

• An tSúdáin: ráiteas ón Ardionadaí thar ceann an Aontais Eorpaigh maidir lena bhfuil tite amach le déanaí (preaseisiúint, an 19 Aibreán 2023)