Spjegazzjoni tal-laqgħat tal-Kunsill
Kunsill wieħed, 10 konfigurazzjonijiet
Il-Kunsill tal-UE huwa entità legali waħda. Madankollu, fil-prattika, il-ministri jiltaqgħu fil-Kunsill fi gruppi tematiċi differenti, magħrufa bħala "konfigurazzjonijiet tal-Kunsill".
L-għaxar konfigurazzjonijiet tal-Kunsill huma organizzati skont l-oqsma ta' politika. Il-ministri nazzjonali li jkollhom il-portafoll fil-livell nazzjonali li jikkorrispondi għal qasam ta' politika ta' konfigurazzjoni tal-Kunsill jingħaqdu flimkien biex jiddiskutu politiki u jadottaw leġiżlazzjoni f'dak il-qasam speċifiku.
Hemm laqgħat tal-Kunsill dwar l-affarijiet ekonomiċi u finanzjarji, l-ambjent, l-enerġija, il-ġustizzja u l-bqija – li kull wieħed minnhom ilaqqa' flimkien il-ministri nazzjonali tal-istati membri tal-UE responsabbli għall-qasam ta' politika inkwistjoni.
Min jieħu sehem fil-laqgħat tal-Kunsill
Ministri mill-istati membri kollha tal-UE
Għal-laqgħat tal-Kunsill jattendu rappreżentanti fil-livell ministerjali mill-gvern ta' kull stat membru tal-UE. Dawn jistgħu jkunu ministri jew segretarji tal-istat.
Pereżempju, il-ministri għall-ġustizzja jieħdu sehem fil-Kunsill Ġustizzja u Affarijiet Interni u l-ministri għall-finanzi fil-Kunsill Ekonomija u Affarijiet Finanzjarji.
Bħala rappreżentanti tal-gvernijiet tal-istati membri, huma jistgħu jieħdu impenji f'isem il-gvern tagħhom u jivvutaw fil-laqgħat tal-Kunsill.
Presidenza: presidenza b'rotazzjoni
Il-laqgħat tal-konfigurazzjonijiet tal-Kunsill huma ppreseduti mill-ministru responsabbli tal-istat membru li jkollu l-presidenza b'rotazzjoni tal-Kunsill ta' sitt xhur.
Dan japplika għall-laqgħat kollha tal-Kunsill, ħlief għall-Kunsill Affarijiet Barranin, li għandu president permanenti – ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà.
Il-presidenza tal-Kunsill tistabbilixxi wkoll il-programm ta' ħidma ġenerali tal-konfigurazzjonijiet u torganizza laqgħat informali tal-ministri fil-kuntest tal-attivitajiet tagħha.
Kummissarji Ewropej u mistednin oħra
Il-Kummissarji Ewropej responsabbli għall-oqsma ta' politika koperti mill-konfigurazzjonijiet huma mistiedna wkoll għal-laqgħat tal-Kunsill.
Rappreżentanti ta' istituzzjonijiet oħra tal-UE, bħall-Bank Ċentrali Ewropew jew aġenziji, rappreżentanti ta' pajjiżi mhux tal-UE jew ta' organizzazzjonijiet internazzjonali jew mistednin oħra jistgħu jiġu mistiedna jieħdu sehem f'laqgħa tal-Kunsill.
X'jiġri fil-laqgħat tal-Kunsill
Matul il-laqgħat tal-Kunsill, il-ministri nazzjonali minn kull stat membru jinnegozjaw u jadottaw il-liġijiet tal-UE, jikkoordinaw il-politiki, u jiżviluppaw il-politika barranija.
Xogħol il-ministri hu li jippruvaw isibu soluzzjonijiet għal problemi komuni fil-livell tal-UE, filwaqt li jqisu l-interessi partikolari tal-pajjiżi individwali tagħhom. Ħafna drabi dan jirrikjedi flessibbiltà u kompromess.
Deċiżjonijiet fil-Kunsill
Kull laqgħa tal-Kunsill għandha aġenda tal-laqgħat li telenka l-punti li għandhom jiġu diskussi jew deċiżi.
Minħabba li Kunsill huwa entità ġuridika waħda, kwalunkwe waħda mill-għaxar konfigurazzjonijiet tiegħu tista' tadotta att tal-Kunsill li jaqa' fil-kompetenza ta' qasam ta' politika ieħor.
Il-Kunsill jieħu d-deċiżjonijiet permezz ta' vot. L-eżiti tal-laqgħat tal-Kunsill jistgħu jkunu deċiżjonjiet li huma leġiżlattivi, politiċi jew amministrattivi.
Adozzjoni tal-liġijiet tal-UE
Diskussjoni jew vot dwar proposta għal att leġiżlattiv. Dan jinkludi l-hekk imsejjaħ "approċċ ġenerali" (pożizzjoni tal-Kunsill).
Konklużjonijiet u riżoluzzjonijiet
Konklużjonijiet, rakkomandazzjonijiet, dikjarazzjonijiet, riżoluzzjonijiet li jistabbilixxu impenji jew pożizzjonijiet politiċi.
Atti oħrajn
Nomini u ħatriet għal pożizzjonijiet uffiċjali tal-UE, ftehimiet interistituzzjonali.
Tista' ssib ir-riżultati ewlenin tal-laqgħat tal-Kunsill fil-kalendarju tal-laqgħat passati. Ir-riżultati tal-voti tal-Kunsill isiru pubbliċi awtomatikament meta l-Kunsill jaġixxi biex jadotta liġijiet tal-UE.
Segwi laqgħa tal-Kunsill f'xandira diretta: seduti pubbliċi
Is-seduti tal-Kunsill jixxandru pubblikament meta l-Kunsill jiddiskuti jew jivvota dwar proposta għal att leġiżlattiv ("deliberazzjoni leġiżlattiva"). L-ewwel deliberazzjoni dwar proposti importanti mhux leġiżlattivi hija pubblika wkoll.
Barra minn hekk, il-Kunsill jorganizza dibattiti pubbliċi regolarment dwar kwistjonijiet importanti li jaffettwaw l-interessi tal-UE u ċ-ċittadini tagħha. Dawn ukoll jistgħu jiġu segwiti f'xandira diretta online.
Id-dibattitu dwar il-programm ta' 18-il xahar tal-Kunsill Affarijiet Ġenerali, kif ukoll il-prijoritajiet tal-konfigurazzjonijiet l-oħra tal-Kunsill, u d-dibattitu dwar il-programm ta' ħames snin tal-Kummissjoni, huma dejjem disponibbli għall-pubbliku online.
Meta seduta tkun pubblika tista' tiġi segwita online fuq is-sit web tal-Kunsill.
Kif jitħejjew il-laqgħat tal-Kunsill
Il-laqgħat tal-Kunsill jitħejjew mill-ambaxxaturi għall-UE tal-istati membri kollha fil-Coreper (kumitat ta' rappreżentanti permanenti) u uffiċjali u esperti nazzjonali oħra f'diversi gruppi ta' ħidma u kumitati. F'dawn il-laqgħat, huma jħejju l-bażi għad-deċiżjonijiet kollha tal-Kunsill.
-
1
Gruppi ta' ħidma
Kull proposta leġiżlattiva jew impenn politiku l-ewwel tiġi eżaminata fil-livell tekniku minn esperti nazzjonali mill-istati membri kollha fi gruppi ta' ħidma speċjalizzati.
-
2
Coreper
Filwaqt li jaħdmu taħt struzzjonijiet mill-gvern tagħhom, l-ambaxxaturi għall-UE jħarsu lejn l-aġenda tal-laqgħat tal-Kunsill u jfittxu bażi komuni fejn jistgħu jaqblu.
Dan huwa stadju finali essenzjali li jippermetti l-organizzazzjoni bla xkiel tal-laqgħat tal-Kunsill.
-
3
Kunsill
Fl-aħħar nett, il-ministri jieħdu deċiżjonijiet fil-laqgħat tal-Kunsill. Għall-kwistjonijiet politiċi l-aktar sensittivi, huma jistgħu jiddiskutu wkoll u jilħqu qbil fil-Kunsill.
Din l-istruttura f'diversi livelli, li tinvolvirappreżentanti ta' kull stat membru tal-UE f'kapaċitajiet differenti, tippermetti d-diskussjoni u l-eżami ta'proposti leġiżlattivi bl-għan aħħari li tgħin lill-Kunsill jadotta leġiżlazzjoni tal-UE u jieħu deċiżjonijiet.
Kif tkun l-aġenda ta' laqgħa tal-Kunsill?
L-aġenda tal-laqgħat tal-Kunsill hija maqsuma f'punti "A" u punti "B". Kull taqsima jista' jkun fiha kemm deliberazzjonijiet leġiżlattivi kif ukoll attivitajiet mhux leġiżlattivi.
Il-punti "A" huma punti li ma jeħtiġux diskussjoni fil-laqgħa tal-Kunsill.
Ġeneralment, madwar żewġ terzi tal-punti fuq l-aġenda tal-Kunsill huma punti "A". Jekk il-Coreper ikun irnexxielu jiffinalizza d-diskussjonijiet dwar proposta, din issir punt "A" fuq l-aġenda tal-Kunsill, li jfisser li jkun mistenni qbil mingħajr dibattitu. Madankollu, id-diskussjonijiet dwar dawn il-punti jistgħu jerġgħu jinfetħu jekk stat membru wieħed jew aktar jitolbu dan.
Punt "A" jista' jiġi adottat minn kwalunkwe konfigurazzjoni tal-Kunsill, irrispettivament mis-suġġett.
Il-punti "B" huma punti li jimplikaw diskussjoni fil-laqgħa tal-Kunsill. Il-punti "B" fuq l-aġenda tal-Kunsill jinkludu punti:
- li jkun baqa' minn laqgħat preċedenti tal-Kunsill
- li ma ntlaħaqx qbil dwarhom fil-livell tal-Coreper jew tal-grupp ta' ħidma
- li jkunu politikament sensittivi wisq biex jissolvew f'livell inferjuri
L-aġendi tal-laqgħat tal-Kunsill jiġu ppubblikati minn qabel u jistgħu jinstabu wkoll fil-kalendarju tal-laqgħat tal-Kunsill.
Meta u fejn isiru l-laqgħat tal-Kunsill
Il-laqgħat tal-Kunsill isiru regolarment. Xi konfigurazzjonijiet tal-Kunsill jiltaqgħu kull xahar, madwar tlieta sa erba' darbiet fis-sena, u xi wħud fuq bażi ad hoc. Kull sena jsiru bejn 70 u 80 laqgħa tal-Kunsill.
Il-biċċa l-kbira tal-laqgħat idumu ġurnata sħiħa, għalkemm xi wħud huma sessjonijiet ta' nofstanhar u xi wħud ta' jumejn.
Il-laqgħat tal-Kunsill isiru fi Brussell, ħlief fix-xhur ta' April, Ġunju u Ottubru, meta jsiru fil-Lussemburgu.
