Rappreżentant Għoli tal-UE għall-Affarijiet Barranin u l-Politika ta' Sigurtà

Ir-Rappreżentant Għoli Kaja Kallas

Ir-Rappreżentant Għoli attwali hija Kaja Kallas, li nħatret għal perjodu ta' 5 snin minn Diċembru 2024.

• Curriculum vitae ta' Kaja Kallas
• It-tim ta' Kaja Kallas
• Ritratti u filmati

Responsabbiltajiet tar-Rappreżentant Għoli

Ir-Rappreżentant Għoli għall-Affarijiet Barranin u l-Politika ta' Sigurtà:

• issawwar u tmexxi l-Politika Estera u ta' Sigurtà Komuni tal-UE (PESK) u l-Politika ta' Sigurtà u ta' Difiża Komuni (PSDK)
• tikkontribwixxi permezz tal-proposti tagħha għall-iżvilupp tal-politika estera u ta' sigurtà komuni tal-UE
• tippresiedi l-Kunsill Affarijiet Barranin
• tiżgura l-implimentazzjoni tad-deċiżjonijiet adottati mill-Kunsill Ewropew u mill-Kunsill tal-UE
• tirrappreżenta lill-UE dwar kwistjonijiet relatati mal-politika estera u ta' sigurtà komuni fil-livell tagħha
• tattendi l-laqgħat tal-Kunsilli Ewropej (filwaqt li mhix formalment membru)
• taġġorna lill-Parlament Ewropew dwar kwistjonijiet ta' politika barranija u ta' sigurtà
• hija responsabbli, flimkien mal-Kunsill, għall-missjonijiet u l-operazzjonijiet tal-PSDK
• tmexxi n-network diplomatiku tal-UE ta' 144 delegazzjoni tal-UE madwar id-dinja
• tmexxi l-Aġenzija Ewropea għad-Difiża u l-Istitut tal-UE għall-Istudji fuq is-Sigurtà

Ir-Rappreżentant Għoli hija wkoll waħda mill-viċi presidenti tal-Kummissjoni Ewropea u tiżgura l-konsistenza tal-azzjoni esterna tal-Unjoni.

Il-Kumitat Politiku u ta' Sigurtà (KPS), li jinkludi l-ambaxxaturi tas-27 pajjiż tal-UE fil-Kunsill, huwa ppresedut minn rappreżentant tar-Rappreżentant Għoli. Il-Kumitat jissorvelja s-sitwazzjoni internazzjonali fl-oqsma koperti mill-PESK u jeżerċita kontroll politiku u direzzjoni strateġika ta' operazzjonijiet ta' maniġġar ta' kriżijiet, taħt ir-responsabbiltà tal-Kunsill u tar-Rappreżentant Għoli.

President tal-Kunsill Affarijiet Barranin

Ir-Rappreżentant Għoli għall-Affarijiet Barranin u l-Politika ta' Sigurtà tippresiedi, tħejji u tmexxi l-Kunsill Affarijiet Barranin (KAB), u tagħti segwitu għad-deċiżjonijiet tiegħu. Il-Kunsill Affarijiet Barranin huwa magħmul mill-ministri għall-affarijiet barranin tal-istati membri kollha tal-UE u normalment jiltaqa' mill-inqas darba fix-xahar.

Il-Kunsill Affarijiet Barranin jiltaqa' wkoll fil-konfigurazzjoni/format tal-ministrigħad-difiża, l-iżvilupp u l-kummerċ, rispettivament.

Meta l-KAB jiddiskuti kwistjonijiet ta' politika kummerċjali komuni, ikun ippresedut mir-rappreżentant tal-istat membru tal-UE li jkollu l-presidenza ta' sitt xhur tal-Kunsill tal-UE.

• Konfigurazzjoni Kunsill Affarijiet Barranin
• Konfigurazzjonijiet oħra tal-Kunsill
• Kumitat Politiku u ta' Sigurtà (KPS)

L-istorja tar-rwol tar-Rappreżentant Għoli

Il-kariga ta' Rappreżentant Għoli oriġinarjament inħolqot fl-1997 skont it-Trattat ta' Amsterdam, għalkemm ir-responsabbiltajiet fil-qasam tal-politiki esterni ġew kondiviżi mal-Kummissarju Ewropew għar-Relazzjonijiet Esterni.

It-Trattat ta' Liżbona, li daħal fis-seħħ f'Diċembru 2009, estenda r-responsabbiltajiet tar-Rappreżentant Għoli billi inkluda l-presidenza tal-Kunsill Affarijiet Barranin u r-rwol ta' Viċi President tal-Kummissjoni.

Bħala Viċi President tal-Kummissjoni Ewropea, ir-Rappreżentant Għoli tiżgura li l-azzjoni esterna ġenerali tal-UE fl-oqsma tal-iżvilupp, il-kummerċ, il-politika tal-viċinat, l-għajnuna umanitarja u r-rispons għall-kriżijiet tkun konsistenti u effettiva.

Ħatra tar-Rappreżentant Għoli

Ir-RGħ tinħatar mill-Kunsill Ewropew li jaġixxi b'maġġoranza kwalifikata, bil-qbil tal-President tal-Kummissjoni Ewropea, għal mandat ta' 5 snin.

Il-ħatra tar-Rappreżentant Għoli hija soġġetta wkoll għal vot ta' approvazzjoni mill-Parlament Ewropew. Dan għaliex ir-Rappreżentant Għoli hija wkoll waħda mill-Viċi Presidenti tal-Kummissjoni Ewropea u l-ħatra tal-Kummissjoni Ewropea kollha kemm hi teħtieġ il-kunsens tal-Parlament Ewropew.

Rappreżentanti Għolja preċedenti

• Josep Borrell Fontelles (2019-2024)

• Federica Mogherini (2014-2019)

• Catherine Ashton (2009-2014)

• Javier Solana (1999-2009)

Servizz Ewropew għall-Azzjoni Esterna

Ir-Rappreżentant Għoli hija assistita fil-qadi ta' dmirijietha mis-Servizz Ewropew għall-Azzjoni Esterna (SEAE) — is-servizz diplomatiku tal-UE.

Is-SEAE ġie stabbilit mit-Trattat ta' Liżbona u jaħdem f'kooperazzjoni mas-servizzi diplomatiċi tal-pajjiżi tal-UE. Dan jinkludi uffiċjali u aġenti mill-UE kif ukoll persunal issekondat mis-servizzi diplomatiċi nazzjonali.

• Servizz Ewropew għall-Azzjoni Esterna (sit web)