Kunsill Ġustizzja u Affarijiet Interni

Il-Kunsill Ġustizzja u Affarijiet Interni (ĠAI) huwa responsabbli għal kwistjonijiet relatati mal-ġustizzja, is-sigurtà interna u l-migrazzjoni.

Mur għall-kalendarju tal-laqgħat

Il-Kunsill Ġustizzja u Affarijiet Interni jaħdem fuq il-politiki u l-leġiżlazzjoni dwar il-ġustizzja, inkluż dwar il-liġi ċivili u kriminali, u dwar l-affarijiet interni, inkluż dwar il-migrazzjoni, il-ġlieda kontra l-kriminalità organizzata, u s-sigurtà u l-kontroll fuq il-fruntieri.

Għandu wkoll l-għan li jipproteġi d-drittijiet fundamentali u taċ-ċittadini.

Illustrazzjoni li turi mara li tippersonifika l-ġustizzja żżomm miżien, grafika ċirkolari b'segmenti kkuluriti, u mappa tal-Ewropa bi stilel, li jirrappreżentaw temi ta' ġustizzja u integrazzjoni Ewropea.

Oqsma ta' ħidma tal-Kunsill Ġustizzja u Affarijiet Interni

Fruntieri u viżi

Il-Kunsill jaħdem fuq it-tisħiħ tal-ġestjoni tal-fruntieri esterni tal-UE u l-armonizzazzjoni tal-politiki dwar il-viża biex tiġi żgurata s-sigurtà.

Migrazzjoni u ażil

Il-Kunsill jiżviluppa u jadotta regoli komuni dwar il-migrazzjoni u l-ażil biex jiżgura kondiviżjoni ġusta tar-responsabbiltà, jipproteġi lil dawk fil-bżonn, u jimmaniġġa l-migrazzjoni b'mod effettiv fl-istati membri kollha.

Ġlieda kontra l-kriminalità

Il-Kunsill jgħin biex tissaħħaħ il-kooperazzjoni ġudizzjarja, filwaqt li jiżgura li ċ-ċittadini u n-negozji jkunu jistgħu jiddependu fuq sistemi tal-ġustizzja ġusti u effettivi fl-istati membri kollha.

Ċibersigurtà

Il-Kunsill jagħti spinta lir-reżiljenza tal-UE għat-theddid ċibernetiku billi jtejjeb il-kooperazzjoni, jimplimenta regoli ewlenin dwar iċ-ċibersigurtà, u jsaħħaħ ir-reazzjonijiet għal inċidenti kbar.

Drittijiet fundamentali u taċ-ċittadini

Il-Kunsill jaħdem biex jissalvagwarda d-drittijiet fundamentali u taċ-ċittadini billi jadotta liġijiet li jipproteġu l-privatezza, il-protezzjoni tad-data, u t-trattament ugwali madwar l-UE.

Kif jaħdem il-Kunsill Ġustizzja u Affarijiet Interni

Skont l-aġenda, il-Kunsill Ġustizzja u Affarijiet Interni (ĠAI) ilaqqa' flimkien il-ministri responsabbli għall-ġustizzja jew l-affarijiet interni mis-27 stat membru kollha tal-UE. Huma jiltaqgħu f'żewġ kompożizzjonijiet.

Ġustizzja

Il-Kunsill ĠAI (Ġustizzja) jiffoka fuq il-kooperazzjoni ġudizzjarja kemm fil-liġi ċivili kif ukoll dik kriminali u fid-drittijiet fundamentali.

Affarijiet Interni

Il-Kunsill ĠAI (Affarijiet Interni) jiffoka fuq il-migrazzjoni, il-ġestjoni tal-fruntieri u l-kooperazzjoni tal-pulizija. Huwa responsabbli wkoll għall-protezzjoni ċivili fl-UE.

Il-ministri normalment jiltaqgħu fil-Kunsill Ġustizzja u Affarijiet Interni mill-inqas erba' darbiet fis-sena. Il-Kummissarji Ewropej rilevanti jipparteċipaw ukoll f'dawn il-laqgħat.

Il-laqgħat tal-Kunsill Ġustizzja u Affarijiet Interni jitħejjew minn gruppi ta' ħidma u kumitati magħmula minn esperti nazzjonali, u mill-Coreper II.

Programm ta' ħidma matul il-presidenza Irlandiża

Permezz tal-Kunsill Ġustizzja u Affarijiet Interni, il-presidenza Irlandiża tippromwovi approċċ komprensiv għall-ażil u l-migrazzjoni li jkun ġust, sod u bbażat fuq ir-regoli.

Fil-qasam tas-sigurtà, il-presidenza tiffoka fuq is-sigurtà tal-fruntieri, il-ġlieda kontra l-kriminalità serja u organizzata u r-rispons għal theddid ġdid u emerġenti.

Prijoritajiet oħra jinkludu l-ħarsien tal-valuri tal-UE, tad-drittijiet fundamentali u tal-istat tad-dritt bl-indirizzar tal-vjolenza domestika, sesswali u abbażi tal-ġeneru, il-ġlieda kontra d-diskriminazzjoni fil-konfront tal-minoranzi, u l-protezzjoni u l-promozzjoni tad-drittijiet tat-tfal.

Programm tal-presidenza Irlandiża