L-istorja bil-fomm
L-intervisti jikkonċentraw fuq il-punti ewlenin tal-esperjenzi professjonali tagħhom u fuq il-funzjonament u l-prattiki tal-Kunsill u tas-Segretarjat Ġenerali. B'dan il-proġett, is-servizz tal-arkivji tal-Kunsill qed jimxi fil-passi tas-servizzi tal-arkivji ta' istituzzjonijiet oħra tal-UE billi joħloq programmi tal-istorja bil-fomm.
Annalisa Giannella
Annalisa Giannella ngħaqdet mal-Kunsill fl-1972 u ddedikat il-ħajja professjonali kollha tagħha għall-istituzzjonijiet tal-UE. Kienet fost l-ewwel uffiċjali li ngħaqdu mas-servizz tal-politika estera u ta' sigurtà komuni fil-ħolqien tiegħu, fl-1994. Laħqet Direttur għall-Politika ta' Sigurtà u ta' Difiża fl-1999. Fl-2003 ġiet innominata rappreżentant personali tar-Rappreżentant Għoli Javier Solana dwar kwistjonijiet ta' nonproliferazzjoni u diżarm. Kienet Deputat Segretarju Ġenerali tal-Konvenzjoni Ewropea.
Fl-intervista, Annalisa Giannella tiggwidana tul l-iżvilupp tal-Kunsill tal-UE u s-Segretarjat Ġenerali tiegħu. Permezz tal-esperjenzi tagħha tal-ewwel tkabbir tal-UE, it-Trattat ta' Maastricht, l-iżvilupp tal-politika estera u ta' sigurtà komuni, u l-Konvenzjoni Ewropea, tiżvela xi wħud mill-ħidmiet interni tal-Kunsill, u l-persuni ewlenin involuti fit-tfassil tiegħu.
Pierre de Boissieu
Pierre de Boissieu, persunaġġ emblematiku tad-diplomazija Franċiża u Ewropea, iddedika l-karriera tiegħu għall-funzjonijiet ewlenin fl-Unjoni Ewropea.
Din l-intervista tagħti għarfien uniku dwar is-snin ta' servizz tiegħu, ir-rwol tiegħu bħala Segretarju Ġenerali tal-Kunsill, fejn issorvelja fajls kruċjali, iżda wkoll dwar l-esperjenza tiegħu fil-Coreper. Hu u jirrakkontalna l-istorja tiegħu, Pierre de Boissieu jeħodna wara l-kwinti tal-laqgħat ta' livell għoli, tan-negozjati u tad-diplomazija. Huwa jtina wkoll il-viżjoni personali tiegħu tal-Unjoni Ewropea u jaqsam il-ħsibijiet tiegħu dwar l-iżvilupp tal-passat u tal-futur tagħha.
Lil hinn mis-snin tiegħu fil-Kunsill, Pierre de Boissieu jitkellem dwar l-involviment deċiżiv tiegħu fin-negozjati dwar it-Trattat ta' Maastricht, mument storiku għall-Unjoni Ewropea fejn sar l-arkitett tal-istruttura tal-pilastri, u b'hekk sawwar l-organizzazzjoni istituzzjonali tal-Unjoni Ewropea.
Dan l-iskambju jagħtina fehim aħjar tal-isfidi u l-ostakli li ffaċċja u l-influwenza diskreta iżda deċiżiva tiegħu fuq l-integrazzjoni Ewropea.
Liliane Simon
Il-karriera ta' Liliane Simon tirrifletti d-deċennji formattivi tal-integrazzjoni Ewropea. Mill-bidu tagħha fil-KEFA u l-Euratom sal-vjaġġ twil tagħha fil-Kunsill, dejjem sabet ruħha f'salib it-toroq ta' trasformazzjonijiet istituzzjonali.
L-ewwel bħala segretarja ta' tliet Segretarji Ġenerali, imbagħad bħala uffiċjal tal-istampa, rat b'għajnejha l-kriżijiet, it-tkabbir u n-negozjati li sawru l-Ewropa.
Ix-xhieda tagħha toffri għarfien rari dwar il-ħidma ta' kuljum u d-dimensjoni umana tat-teħid tad-deċiżjonijiet Ewropej.
Jim Cloos
Jim Cloos ingħaqad mas-Segretarjat Ġenerali tal-Kunsill tal-UE fl-2001 bħala Direttur għar-Relazzjonijiet Transatlantiċi. Wara li fl-2006 sar Direttur għall-Kwistjonijiet ta' Politika Ġenerali, fl-2010 ħa l-kariga ta' Direttur Ġenerali għall-Politika Ġenerali u Istituzzjonali.
Bħala attur ewlieni wara l-kwinti, Jim Cloos ikkoordina u appoġġa l-laqgħat tal-Kunsill Ewropew għal 15-il sena u kien wieħed mill-ftit impjegati taċ-ċivil preżenti fis-sala matul is-sessjonijiet.
Charles Elsen
Charles Elsen sar l-ewwel Direttur Ġenerali tad-Direttorat Ġenerali għall-Ġustizzja u l-Affarijiet Interni tal-Kunsill tal-Unjoni Ewropea fis-7 ta' Frar 1994.
Żamm din il-kariga sal-2004 u kompla jwettaq xi kompiti fl-ewwel nofs tal-2005, waqt il-presidenza Lussemburgiża tal-UE.
L-aħħar reviżjoni: 28 ta' Mejju 2026