Kunsill Kompetittività, 20/02/2014, 20 ta' Frar 2014

Il-Kunsill jadotta direttiva dwar id-drittijiet tal-awtur u l-aċċess għall-mużika online

Imlaqqgħin fil-Kunsill Kompetittività, il-ministri adottaw l-immaniġġar kollettiv ġdid tad-Direttiva dwar id-drittijiet tal-awtur u kellhom ukoll diskussjonijiet dwar kwistjonijiet ewlenin inkluża l-kompetittività industrijali

Id-Direttiva l-ġdida, adottata mill-Kunsill fl-20 ta' Frar, għandha l-għan li ttejjeb l-immaniġġar tad-drittijiet tal-awtur u ħruġ transkonfinali ta' liċenzji ta' mużika online. Minflok ikollhom jiksbu liċenzja tad-drittijiet tal-awtur f'kull Stat Membru tal-UE, il-bejjiegħa bl-imnut online u s-servizzi tal-istreaming tal-mużika jkunu jistgħu jiksbuha minn organizzazzjonijiet ta' maniġġar kollettiv li joperaw bnadi oħra.

Id-Direttiva għandha għaldaqstant tipprovdi lill-konsumaturi għażla aktar wiesgħa ta' mużika xi jniżżlu jew jagħmlu streaming online tagħha. Għandha tiżgura wkoll li d-drittjiet tal-artisti jiġu protetti aħjar u li r-royalties tagħhom jitħallsu iktar malajr.

Ladarba d-direttiva tidħol fis-seħħ, l-istati membri jkollhom sentejn biex jinkorporawha fil-liġi nazzjonali.

Il-ministri kellhom ukoll dibattitu dwar il-kompetittività industrijali, bi tħejjija għal-laqgħa tal-Kunsill Ewropew li jmiss f'Marzu. Il-ministri analizzaw kwistjonijiet bħall-politiki u l-azzjonijiet ewlenin għat-titjib tal-kompetittività industrijali tal-UE, il-kompetittività tal-industriji intensivi fl-enerġija flimkien ma' objettivi ta' politika ġodda dwar l-enerġija u t-tibdil fil-klima, u l-integrazzjoni potenzjali ta' kwistjonijiet dwar il-kompetittività industrijali fl-oqsma kollha ta' politika.

L-eżitu ta' dan id-dibattitu ser jikkontribwixxi għal diskussjonijiet dwar il-politika industrijali fil-Kunsill Ewropew ta' Marzu, li ser isir fl-20 u l-21 ta' Marzu.

Maniġġar tad-drittijiet tal-awtur tal-mużika

L-immaniġġar kollettiv tad-drittijiet tal-awtur isir l-iktar minn organizzazzjonijiet ta' maniġġar kollettiv. Huma:

• jagħtu liċenzji lil utenti kummerċjali, bħall-istazzjonijiet tat-TV, l-istazzjonijiet tar-radju, il-fornituri tas-servizzi tal-mużika online
• jiġbru royalties u jqassmuhom lid-detentur/i tad-drittijiet tal-awtur

L-utenti kummerċjali jistgħu jiksbu drittijiet għal għadd kbir ta' kanzunetti permezz tal-organizzazzjonijiet ta' maniġġar kollettiv. Mingħajrhom, huma jkollhom jinnegozjaw individwalment mal-kompożituri u l-artisti.

Suġġetti oħra fuq l-aġenda

Il-ministri ħadu nota wkoll tal-qbil politiku li ntlaħaq dwar:

• fatturar-elettroniku fl-akkwist pubbliku, li hu parti mill-pakkett tal-UE dwar l-aġenda diġitali
• l-istabbiliment ta' servizz Ewropew ta' sorveljanza u traċċar għall-ispazju, biex jikkontribwixxi għas-sikurezza tal-infrastrutturi spazjali, bħas-satelliti

Il-ministri kellhom ukoll diskussjonijiet dwar numru ta' suġġetti oħra, inkluż:

• l-Istħarriġ Annwali dwar it-Tkabbir għall-2014 tal-Kummissjoni, u r-rapport li jakkumpanjah dwar il-qagħda tal-integrazzjoni tas-Suq Uniku, li jibda l-proċess tas-Semestru Ewropew
• progress fl-implimentazzjoni taż-Żona Ewropea tar-Riċerka (il-Ministri adottaw ukoll il-konklużjonijiet)
• relazzjonijiet bejn l-UE u l-Aġenzija Spazjali Ewropea