Kunsill Kompetittività, 04-05/12/2014, 4 u 5 ta' Diċembru 2014

Il-Kunsill jiddiskuti azzjoni biex jissaħħaħ is-suq uniku 

Waqt il-laqgħa fi Brussell fl-4 u l-5 ta' Diċembru, il-ministri tal-UE għall-kompetittività qablu dwar x'jeħtieġ isir biex jiġi żviluppat is-suq uniku u tingħata spinta lill-integrazzjoni ekonomika tal-Ewropa. 

Suq uniku

Matul id-dibattitu ta' orjentazzjoni dwar l-azzjonijiet meħtieġa biex jiġi żviluppat aktar is-suq uniku, il-ministri ffokaw fuq oqsma li x'aktarx jiġġeneraw investiment u tkabbir. Dawn jinkludu:

• it-tlestija tas-suq uniku tal-enerġija, it-trasport u dak diġitali
• l-implimentazzjoni effettiva tad-direttiva dwar is-servizzi
• l-eliminazzjoni ta' burokrazija żejda
• it-tisħiħ tal-kummerċ online
• il-ħolqien ta' ambjent li jiffavorixxi n-negozji żgħar u ta' daqs medju

Wara d-dibattitu, il-ministri adottaw konklużjonijiet dwar regolamentazzjoni intelliġenti u ġestjoni tar-riskju doganali, li t-tnejn huma importanti ħafna għal funzjonament aħjar tas-suq uniku.

F'konklużjonijiet dwar ir-regolamentazzjoni intelliġenti, il-ministri tal-UE insistew dwar il-ħtieġa li r-regoli Ewropej ikunu trasparenti, sempliċi u li jwasslu għat-tkabbir. Huma kienu favur soluzzjonijiet li jgħinu lin-negozji u lill-konsumatur jevitaw li jkollhom jiffaċċjaw l-ispejjeż tat-28 suq nazzjonali. F'dokument dwar il-ġestjoni tar-riskju doganali, il-ministri appoġġaw strateġija tal-UE maħsuba biex issaħħaħ il-kummerċ filwaqt li żżid is-sigurtà tal-katina tal-provvista.  

Pakketti tal-ivvjaġġar fl-Ewropa fl-2011

• 23% tat-turisti fl-Ewropa xtraw vaganzi personalizzati
• 23% minnhom għażlu pakketti tradizzjonali organizzati minn qabel
• 35% tal-bejgħ kollu relatat mal-ivvjaġġar sar online 

Pakketti tal-ivvjaġġar

Il-Kunsill qabel dwar pożizzjoni dwar ir-riforma tar-regoli tal-UE dwar il-pakketti tal-ivvjaġġar.   

'Pakketti tal-ivvjaġġar' tirreferi għal kombinazzjonijiet ta' servizzi tal-ivvjaġġar li tipikament jinkludu t-trasport, il-lukanda u xi servizzi oħra, bħall-karozza tal-kiri. Ir-regoli attwali dwar il-pakketti tal-ivvjaġġar imorru lura għall-1990 meta l-internet kien għadu ma jeżistix, il-linji tal-ajru ma kinux liberalizzati u s-suq tal-ivvjaġġar kien joffri l-aktar pakketti ta' vaganzi u ġiti organizzati minn qabel.

L-abbozz ta' leġislazzjoni jfittex li jestendi l-protezzjoni attwali tal-pakketti tal-ivvjaġġar tradizzjonali li jitħejjew mill-operaturi tal-ivvjaġġar jew l-aġenziji tal-ivvjaġġar biex tinkludi l-pakketti tal-ivvjaġġar li jiġu kkombinati fuq talba tal-konsumatur. 

Il-qbil milħuq mill-Kunsill jippermettilu jiftaħ negozjati mal-Parlament Ewropew dwar l-abbozz ta' leġislazzjoni.

Punti oħra fuq l-aġenda

Standards ta' sigurtà

Il-ministri qablu dwar pożizzjoni dwar l-abbozz ta' regoli li jimmodernizzaw ir-rekwiżiti ta' sigurtà għal tagħmir u oġġetti ta' protezzjoni personali li jużaw kejbils għat-trasport, bħall-funikulari u ċ-chairlifts. L-għan hu li l-kontrolli jsiru aktar stretti mingħajr ma jinħolqu piż jew spejjeż kbar għall-industrija.

Il-Kunsill issa ser jiftaħ negozjati dwar l-abbozz ta' regoli mal-Parlament Ewropew. 

Politika dwar l-ispazju

Il-ministri ddiskutew il-kompetittività tas-settur spazjali Ewropew u r-rwol tiegħu biex isaħħaħ l-ekonomija Ewropea. Wara d-dibattitu kien hemm l-adozzjoni ta' konklużjonijiet fejn il-Kunsill stabbilixxa l-prijoritajiet għall-politika Ewropea dwar l-ispazju u l-mezzi biex dawn jinkisbu. Huwa appella wkoll għal aktar riċerka spazjali u għal aktar kooperazzjoni bejn l-UE, l-Aġenzija Spazjali Ewropea u l-istati membri.    

Żona Ewropea tar-Riċerka

Il-Kunsill adotta konklużjonijiet dwar il-progress lejn iż-Żona Ewropea tar-Riċerka (ŻER), li stiednu lill-Kummissjoni Ewropea biex ittejjeb il-mekkaniżmu ta' monitoraġġ f'kooperazzjoni mal-pajjiżi tal-UE. Intqal ukoll li ŻER li tiffunzjona bis-sħiħ tkun teħtieġ governanza effettiva "bi rwol imsaħħaħ tal-istati mambri".