Kunsill Kompetittività, 25 u 26 ta' Settembru 2014

Il-Kunsill jiddiskuti l-kompetittività industrijali tal-Ewropa

Waqt li ltaqgħu fi Brussell fil-25 u s-26 ta' Settembru, il-ministri inkarigati mill-kompetittività kkunsidraw il-modi kif tissaħħaħ l-industrija fl-UE u ddiskutew l-eżami li jmiss tal-istrateġija Ewropa 2020, li hija l-pjan ta' għaxar snin tal-UE għat-tkabbir u l-kompetittività.

Kompetittività industrijali

Il-ministri kellhom dibattitu ta' orjentazzjoni dwar l-integrazzjoni tal-kompetittività industrijali, li hija proċess li għandu l-għan li jiżgura li l-politiki tal-UE jkollhom impatt pożittiv fuq l-industrija fl-Ewropa.

Id-dibattitu kien strutturat fuq tliet kwistjonijiet:

• l-isfidi għall-kompetittività industrijali tal-Ewropa u l-modi kif jingħelbu
• il-modi kif il-kompetittività industrijali tiġi integrata f'oqsma oħra ta' politika  
• il-modi kif jittejbu l-ġestjoni u l-monitoraġġ ta' riformi strutturali biex tissaħħaħ il-kompetittività tal-Ewropa

Wara d-dibattitu, il-ministri adottaw konklużjonijiet li fihom huma talbu lill-Kummissjoni Ewropea biex tiffoka l-ħidma futura tagħha fuq inizjattivi li jagħtu spinta lill-kompetittività u l-innovazzjoni u li jnaqqsu l-burokrazija żejda u l-piżijiet regolatorji għan-negozji fl-Ewropa.

Huma ssottolinjaw ukoll l-importanza li jsir użu aktar effettiv tal-valutazzjonijiet tal-impatt, li huma dokumenti li jivvalutaw konsegwenzi potenzjali ta' inizjattivi tal-UE proposti mill-Kummissjoni. Il-konklużjonijiet jiddikjaraw li dawn il-valutazzjonijiet għandhom jivvalutaw b'mod debitu l-impatt ta' kull inizjattiva fuq il-kompetittività industrijali u jippermettu li l-partijiet interessati rilevanti kollha jagħtu l-opinjoni tagħhom qabel ma jiġi ppreżentat abbozz ta' leġislazzjoni.   

Strateġija Ewropa 2020

Il-Kunsill kellu dibattitu wkoll dwar l-eżami li jmiss tal-istrateġija Ewropa 2020. L-istrateġija, li tnediet fl-2010, għandha l-għan li tagħti spinta lit-tkabbir ekonomiku, toħloq l-impjiegi u tippromwovi l-inklużjoni soċjali.

Ħafna ministri jaraw l-eżami li jmiss tal-istrateġija bħala opportunità biex jiġi appoġġat l-irkupru ekonomiku u tingħata spinta lill-kompetittività industrijali u t-tkabbir. Meta terġa' titnieda l-istrateġija, huma jridu jikkonċentraw fuq żewġ objettivi relatati mal-kompetittività:

• allinjament aħjar tas-swieq finanzjarji u l-ekonomija reali
• governanza ekonomika aħjar, b'attenzjoni akbar fuq prijoritajiet relatati mas-suq uniku u l-kompetittività industrijali tal-UE 

Fil-kuntest tal-eżami tal-istrateġija l-ministri ddiskutew ukoll modi kif isir investiment fir-riċerka u l-innovazzjoni biex tingħata spinta lit-tkabbir.

Il-Presidenza Taljana beħsiebha teżamina l-implimentazzjoni tal-istrateġija billi torganizza diskussjonijiet f'diversi konfigurazzjonijiet tal-Kunsill matul ix-xhur li ġejjin. Ir-riżultati ta' dawn id-diskussjonijiet ser jiġu inklużi f'rapport li ser jiġi ppreżentat lill-mexxejja tal-UE f'Diċembru.

Ir-rapport ser jagħti gwida lill-Kummissjoni Ewropea dwar it-titjib tal-implimentazzjoni tal-istrateġija.

Il-Kummissjoni nediet konsultazzjoni pubblika dwar l-eżami tal-istrateġija f'Mejju u mistennija tagħmel proposti speċifiċi kmieni fl-2015.

Suġġetti oħra fuq l-aġenda

Żona Ewropea tar-Riċerka

Il-ministri skambjaw fehmiet dwar l-iżvilupp tas-suq uniku għar-riċerka, jew iż-Żona Ewropea tar-Riċerka (ŻER). Id-diskussjoni kienet ibbażata fuq ir-rapport reċenti tal-Kummissjoni li janalizza l-progress li sar fit-tlestija taż-ŻER.

Suġġetti oħrajn diskussi matul il-laqgħa tal-Kunsill inkludew:

• programm konġunt għar-riċerka u l-innovazzjoni fir-reġjun tal-Mediterran (l-inizjattiva PRIMA) 
• pjan ta' investiment għall-Ewropa
• implimentazzjoni tas-sistema ta' protezzjoni tal-privattiva unitarja