Kunsill Kompetittività, 26/05/2014, 26 ta' Mejju 2014

Kunsill jilħaq qbil għall-pożizzjoni tiegħu dwar il-protezzjoni tas-sigrieti kummerċjali

Fil-Kunsill Kompetittività tas-26 ta' Mejju, il-ministri tal-UE adottaw il-pożizzjoni dwar it-titjib fil-protezzjoni tas-sigrieti kummerċjali. Dan iwitti t-triq biex jinbdew in-negozjati mal-Parlament Ewropew.

Il-ministri tal-UE responsabbli għall-kompetittività adottaw approċċ ġenerali dwar l-abbozz ta' direttiva li tipproteġi mis-serq ta' informazzjoni kummerċjali kunfidenzjali.

Il-proposta għandha l-għan li tagħmilha aktar faċli għall-qrati nazzjonali biex jittrattaw is-serq ta' informazzjoni kummerċjali, biex il-vittmi jitolbu kumpens u biex prodotti li jiksru sigrieti kummerċjali jitneħħew mis-suq.

L-approċċ ġenerali adottat mill-Kunsill jistabbilixxi livell minimu ta' armonizzazzjoni tal-liġijiet ċivili fl-UE kollha, filwaqt li l-istati membri jingħataw il-possibbiltà li japplikaw miżuri aktar stretti jekk ikun meħtieġ.

Huwa jistabbilixxi l-perijodu ta' limitu għal azzjoni mill-kwerelant għal sitt snin u jiggarantixxi l-kunfidenzjalità tal-proċeduri legali. Jallinja wkoll il-prinċipji u d-definizzjonijiet legali ma' ftehimiet internazzjonali eżistenti.

Serq ta' sigrieti kummerċjali fl-UE

Skont diversi studji, fl-aħħar għaxar snin wieħed minn kull ħames negozji fl-UE kien il-mira ta' attentat ta' serq ta' sigriet kummerċjali. Fl-2013, 25% tan-negozji rrappurtaw mill-inqas każ wieħed ta' ksib illegali ta' informazzjoni, imqabbel mat-18% fis-sena ta' qabel.

Sigrieti kummerċjali jinkludu diversi tipi ta' informazzjoni, minn għarfien teknoloġiku sa data kummerċjali bħal informazzjoni dwar klijenti, riċerka tas-suq jew pjanijiet ta' attività tan-negozju.

eCall

Il-ministri adottaw ukoll il-pożizzjoni tal-Kunsill dwar ir-rekwiżiti tekniċi għal karozzi ġodda li ser ikollhom installat l-eCall, servizz ta' telefonati ta' emerġenza għall-użu fl-Ewropa kollha. Il-ftehim milħuq mill-Kunsill jippermettilu li jibda negozjati mal-Parlament Ewropew.

Meta tiġi adottata, il-liġi l-ġdida tobbliga lill-manifatturi jinstallaw fil-karozzi l-ġodda kollha teknoloġija li awtomatikament tallerta s-servizz eCall ibbażat fuq in-numru 112 f'każ ta' inċident.

Il-qbil tal-lum isegwi deċiżjoni aktar kmieni dan ix-xahar mill-Kunsill biex tiddaħħal is-sistema obbligatorja tal-eCall li tittratta t-telefonati ta' emerġenza mibgħuta minn karozzi f'każ ta' ħabta.

Il-proposta hija parti mill-isforzi tal-UE biex tiżdied is-sigurtà fit-toroq u jitnaqqas bin-nofs in-numru ta' mwiet fit-toroq sal-2020.

Punti ewlenin oħrajn fuq l-aġenda

Riforma tas-sistema tat-trade marks

Il-ministri skambjaw fehmiet dwar ir-riforma li għaddejja tas-sistema tat-trade mark Komunitarja. Ir-riforma għandha l-għan li timmodernizza s-sistema biex tagħmilha aktar faċli għan-negozji iwettqu innovazzjoni. Biex jinkiseb dan, ser ittejjeb l-effiċjenza tal-protezzjoni tat-trade marks u tagħmilha aktar aċċessibbli għall-SMEs.

Direttiva dwar il-Pakketti tal-Ivvjaġġar

Il-Kunsill sema' preżentazzjoni mill-Presidenza Griega dwar il-progress li sar fid-direttiva dwar il-pakketti tal-ivvjaġġar. Il-leġislazzjoni proposta għandha l-għan li timmodernizza r-regoli għas-suq tal-ivvjaġġar li ġie ttrasformat f'dawn l-aħħar snin, mhux l-inqas minħabba l-influwenza tal-internet.

Riċerka u innovazzjoni

Il-ministri adottaw konklużjonijiet li jappoġġaw l-implimentazzjoni ta' faċilitajiet strateġiċi ta' riċerka pan-Ewropej identifikati mill-Forum Strateġiku Ewropew għall-Infrastrutturi tar-Riċerka (ESFRI). Il-missjoni tal-ESFRI hija li jiġi appoġġat it-tfassil tal-politika dwar l-iżvilupp strateġiku u l-użu aħjar tal-infrastruttura tar-riċerka fl-Ewropa. Huwa jippubblika l-pjan direzzjonali li jelenka proġetti prijoritarji li jwieġbu għall-ħtiġijiet fit-tul ta' riċerkaturi Ewropej fl-oqsma xjentifiċi kollha. 

Il-Kunsill adotta wkoll konklużjonijiet dwar il-ħtieġa li tissaħħaħ il-kooperazzjoni bejn l-Unjoni Ewropea u l-Aġenzija Spazjali Ewropea. 

Il-ministri skambjaw ukoll fehmiet dwar il-passi meħtieġa biex tingħata spinta lill-kooperazzjoni xjentifika u teknoloġika bejn l-UE u l-pajjiżi Mediterranji.

Il-Kunsill adotta l-pakkett tar-riżorsi proprji mingħajr diskussjoni. Il-pakkett huwa sett ta' 3 liġijiet relatati mal-baġit tal-UE 2014-2020. Ir-riżorsi proprji jikkostitwixxu d-dħul tal-UE, li jrid ikopri l-infiq kollu tal-UE.