Kunsill Kompetittività, 29/02/2016, 29 ta' Frar 2016

Riżultati ewlenin

In-negozji għandhom jitħallew joperaw f’suq tassew uniku mingħajr ostakli meta jbigħu l-prodotti u s-servizzi tagħhom...” Henk Kamp, il-Ministru għall-Affarijiet Ekonomiċi tan-Netherlands u l-President tal-Kunsill

Suq uniku għas-servizzi u l-prodotti 

Wara dibattitu, il-Kunsill adotta konklużjonijiet dwar l-istrateġija tas-suq uniku għas-servizzi u l-prodotti li jiffukaw fuq oqsma ewlenin li joħolqu t-tkabbir u l-impjiegi: appoġġ għall-SMEs, negozji ġodda u negozji innovattivi, jintuża l-potenzjal mhux sfruttat fis-servizzi u l-implimentazzjoni effiċjenti, il-konformità u l-infurzar tar-regoli tas-suq uniku.

Il-president tal-Kunsill u l-Ministru Netherlandiż għall-Affarijiet Ekonomiċi, Henk Kamp, ikkummenta hekk: "In-negozji għandhom jitħallew joperaw f'suq uniku mingħajr ostakli meta jbigħu l-prodotti u s-servizzi tagħhom. Dan mhux biss ikun ta' benefiċċju għalihom, iżda fl-istess ħin jibbenefikaw ukoll il-konsumaturi Ewropej minħabba li jkollhom aktar għażla u prezzijiet aktar baxxi.  Dan huwa l-aktar mod rapidu biex l-ekonomija tal-UE ssir aktar dinamika, kompetittiva u orjentata lejn il-futur".

L-industrija tal-azzar 

Il-ministri eżaminaw is-sitwazzjoni tal-kompetittività globali tal-industrija Ewropea b’enfasi fuq l-industriji li jużaw ħafna enerġija. B'mod partikolari, huma indirizzaw is-sitwazzjoni diffiċli tal-industrija tal-azzar. 

Fi tmiem il-laqgħa, il-Presidenza waslet għall-konklużjonijiet li ġejjin:

L-ewwel nett, fuq terminu qasir, jeħtieġ li jitħaffef ir-ritmu tal-miżuri anti-dumping. It-tieni nett, l-industrija tal-azzar għandha tkun tista' tuża finanzjament mill-UE għall-innovazzjoni, proġetti pilota u mudelli ta' negozju ġodda. It-tielet nett, jeħtieġ li nevitaw regolamentazzjoni mhux meħtieġa li tfixkel il-kompetittività tal-industriji tagħna li jużaw ħafna enerġija. Il-kumpaniji tagħna għandhom ikunu jistgħu joperaw b'kondizzjonijiet ekwivalenti ta' kompetizzjoni globali. Henk Kamp, il-Ministru għall-Affarijiet Ekonomiċi tan-Netherlands u l-President tal-Kunsill

Il-Ministru Kamp ikkonkluda li: "Enfasizzajna l-ħtieġa għal soluzzjonijiet immedjati biex nittrattaw il-kriżi kbira fis-settur tal-azzar. Dawn jistgħu jkunu validi għal setturi industrijali oħra billi l-oriġini tal-kriżijiet għandhom ħafna aspetti komuni.
"L-ewwel nett, fuq terminu qasir, jeħtieġ li jitħaffef ir-ritmu tal-miżuri anti-dumping. It-tieni nett, l-industrija tal-azzar għandha tkun tista' tuża finanzjament mill-UE għall-innovazzjoni, proġetti pilota u mudelli ta' negozju ġodda. It-tielet nett, jeħtieġ li nevitaw regolamentazzjoni mhux meħtieġa li tfixkel il-kompetittività tal-industriji tagħna li jużaw ħafna enerġija. Il-kumpaniji tagħna għandhom ikunu jistgħu joperaw b'kondizzjonijiet ekwivalenti ta' kompetizzjoni globali."

Eżami tal-kompetittività: appoġġ għall-SMEs - Ostakli għat-tkabbir u l-investiment 

Il-ministri wettqu “eżami tal-kompetittività” tal-ekonomija reali b’enfasi partikolari fuq kif l-aħjar l-SMEs jiġu megħjuna jkabbru u joħolqu l-impjiegi. 

Huma qasmu bejniethom ukoll fehmiet dwar l-implimentazzjoni tar-rakkomandazzjonijiet speċifiċi għall-pajjiżi fil-qafas tas-Semestru Ewropew, bl-għan li jiġu indirizzati l-ostakli għat-tkabbir u l-investiment fis-settur tas-servizzi.   

Ekonomija ċirkolari

Il-ministri bdew diskussjonijiet dwar il-pakkett tal-ekonomija ċirkolari bil-ħsieb li jiġu identifikati prijoritajiet ewlenin sabiex jiddaħħlu fl-abbozz ta’ konklużjonijiet li għandu jiġi ppreżentat fil-Kunsill Ambjent f’Ġunju.