Kunsill Kompetittività, 29-30/05/2017, 29 u 30 ta' Mejju 2017

Riżultati ewlenin

Suq intern u industrija - 29 ta' Mejju

Ir-riforma tal-approvazzjoni tat-tip u s-sorveljanza tas-suq tal-karozzi

Il-Kunsill qabel dwar approċċ ġenerali għar-riforma tas-sistema ta' approvazzjoni tat-tip u s-sorveljanza tas-suq għall-vetturi bil-mutur.

Din ir-riforma prinċipali ser timmodernizza s-sistema attwali u ttejjeb it-testijiet ta' kontroll fuq id-data tal-emissjonijiet tal-karozzi.

''Is-saħħa pubblika, il-kwalità tal-arja u l-innovazzjoni huma fil-qalba ta' dan il-ftehim. L-uniku mod biex terġa' tinkiseb u tiżdied il-fiduċja fl-industrija tal-karozzi Ewropea huwa billi tingħata għajnuna biex jiġu żviluppati teknoloġiji nodfa u sikuri. Testijiet affidabbli ta' kontroll għall-karozzi ser jiġu stabbiliti sabiex l-irregolaritajiet tal-emissjonijiet li seħħew fil-passat ma jkunux jistgħu jseħħu mill-ġdid fil-futur''

Chris Cardona, President tal-Kunsill u Ministru għall-Ekonomija, Investiment u Intrapriżi Żgħar ta' Malta.

L-għan huwa li jinkiseb livell għoli ta’ sikurezza u prestazzjoni ambjentali tal-vetturi bil-mutur u li jiġu indirizzati n-nuqqasijiet ewlenin identifikati fis-sistema eżistenti tal-approvazzjoni tat-tip.

• Link għall-istqarrija għall-istampa

Pakkett tas-servizzi: forniment ta' servizzi u mobilità ta' professjonisti

Il-Kunsill qabel dwar approċċi ġenerali dwar iż-żewġ proposti tal-''Pakkett tas-Servizzi'' biex is-suq intern isir aktar effettiv:

- abbozz ta' direttiva mmirata lejn it-titjib tal-proċedura ta' notifika fis-settur tas-servizzi, u

- abbozz ta' direttiva mmirata lejn il-mobbiltà transfruntiera ta' professjonisti fl-Unjoni Ewropea

''In-negozji u l-professjonisti għadhom qiegħdin iħabbtu wiċċhom ma' regolamentazzjoni sproporzjonata meta jipprovdu servizzi transfruntiera. Il-Pakkett tas-Servizzi huwa għodda essenzjali biex jiġi ffaċilitat il-moviment ta' persuni u servizzi. Kumpaniji, professjonisti u konsumaturi ser jibbenefikaw b'mod konsiderevoli minn aċċess aħjar għal attivitajiet u servizzi professjonali differenti''

Chris Cardona, President tal-Kunsill u Ministru għall-Ekonomija, Investiment u Intrapriżi Żgħar ta' Malta.

• Link għall-istqarrija għall-istampa

Politika industrijali fl-Ewropa

Il-Kunsill kellu dibattitu dwar il-politika industrijali. Huwa adotta wkoll konklużjonijiet li jappellaw lill-Kummissjoni biex tippreżenta strateġija tal-UE dwar il-politika industrijali għall-futur fil-ħin għal-laqgħa tal-Kunsill Ewropew tar-rebbiegħa 2018.

''Dan is-suġġett huwa tal-ogħla rilevanza politika għall-Ewropa, minħabba l-isfidi ewlenin li qed tiffaċċa l-industrija tagħna. L-Ewropa teħtieġ li ssir aktar proattiva u tersaq lejn politika olistika industrijali tal-UE biex tlaħħaq mal-bidla teknoloġika u tiżgura l-kompetittività globali tal-ekonomija tagħna. Id-diġitalizzazzjoni, il-mudelli ġodda tan-negozju, l-investiment fil-ħiliet u aċċess aħjar għall-finanzi ser ikunu essenzjali biex tiġi żgurata l-kompetittività industrijali tal-Ewropa''

Chris Cardona, President tal-Kunsill u Ministru għall-Ekonomija, Investiment u Intrapriżi Żgħar ta' Malta.

• Link għall-konklużjonijiet

Riċerka u Spazju - 30 ta’ Mejju

Strateġija Spazjali għall-Ewropa

Il-Kunsill kellu dibattitu ta' orjentazzjoni dwar l-implimentazzjoni tal-istrateġija dwar l-ispazju għall-Ewropa u adotta konklużjonijiet li jistabbilixxu l-prijoritajiet tagħha.

''Il-konklużjonijiet tal-Kunsill ser jikkontribwixxu għall-implimentazzjoni ta' oqsma ta' prijorità tal-istrateġija dwar l-ispazju. Il-programmi dwar l-ispazju Galileo u Copernicus huma eżempji li rnexxew tal-benefiċċji u l-vantaġġi li l-integrazzjoni Ewropea tista' twassal mhux biss għaċ-ċittadini Ewropej, iżda għad-dinja kollha.''

Chris Agius, Segretarju Parlamentari għar-Riċerka, Innovazzjoni, Żgħażagħ u Sport ta' Malta

• Konklużjonijiet dwar strateġija spazjali għall-Ewropa (stqarrija għall-istampa, 30/05/2017)

Monitoraġġ u rappurtar tar-riċerka u l-innovazzjoni (R&I)

Il-Kunsill adotta konklużjonijiet dwar "Razzjonalizzazzjoni tal-ambjent tal-monitoraġġ u r-rappurtar tal-R&I''.

• Konklużjonijiet dwar ir-razzjonalizzazzjoni tal-ambjent tal-monitoraġġ u r-rappurtar tar-riċerka u l-innovazzjoni

Huwa kellu wkoll skambju ta' fehmiet dwar il-ġustifikazzjoni ekonomika għall-finanzjament pubbliku tal-R&I u l-impatt tiegħu.

Sħubija UE-Mediterran għal proġetti tar-riċerka (PRIMA)

Il-Kunsill ħa nota tat-tħejjijiet għall-implimentazzjoni tas-Sħubija għar-Riċerka u l-Innovazzjoni fiż-Żona tal-Mediterran (PRIMA), wara l-konklużjoni b'suċċess tad-diskussjonijiet leġislattivi dwar il-PRIMA taħt il-Presidenza Maltija tal-Kunsill.

''Il-PRIMA mistennija tibni l-ħiliet u tisfrutta l-finanzjament għar-riċerka u l-innovazzjoni fis-setturi tal-agroalimentazzjoni u l-ilma fiż-żona tal-Mediterran. Dan għandu jikkontribwixxi lejn l-indirizzar ta' xi wħud mill-kawżi primarji tal-migrazzjoni u jsaħħaħ il-kooperazzjoni Ewro-Mediterranja.''

Chris Agius, Segretarju Parlamentari għar-Riċerka, Innovazzjoni, Żgħażagħ u Sport ta' Malta