"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza tal-ministri għas-suq intern u l-industrija, 18 ta' Settembru 2020
Riżultati ewlenin
Il-ministri kellhom skambju ta' fehmiet permezz ta' vidjokonferenza dwar l-azzjonijiet ta' prijorità meħtieġa biex jiġi restawrat u mtejjeb il-funzjonament tas-suq uniku bil-ħsieb li jiġi żgurat l-irkupru rapidu tal-ekonomija tal-UE wara l-kriżi tal-COVID-19.
Id-diskussjonijiet tal-lum identifikaw azzjonijiet essenzjali meħtieġa bħala kwistjoni ta' prijorità sabiex jinkiseb suq uniku li jiffunzjona b'mod sħiħ, aktar integrat u reżiljenti. Dan huwa prerekwiżit kruċjali għall-irkupru rapidu tal-ekonomija tal-UE hekk kif toħroġ mill-kriżi tal-COVID-19.
Peter Altmaier, Ministru Federali tal-Ġermanja għall-Affarijiet Ekonomiċi u l-Enerġija
Kien hemm rikonoxximent wiesa' tal-ħtieġa li tiġi restawrata malajr l-integrità tas-suq uniku billi jitneħħew id-derogi temporanji kollha stabbiliti mill-istati membri individwali matul il-kriżi tal-COVID-19. It-task force għall-infurzar fis-suq uniku (SMET) issemmiet bħala l-għodda ewlenija għall-identifikazzjoni ta' ostakli bla bżonn għaċ-ċirkolazzjoni libera transfruntiera tal-prodotti u s-servizzi.
Il-ministri appellaw lill-Kummissjoni biex sal-15 ta' Jannar 2021 tippreżenta rapport strateġiku annwali bħala għodda għall-identifikazzjoni u t-tneħħija ta' ostakli mhux iġġustifikati, il-valutazzjoni tar-reżiljenza tas-suq uniku u jittieħed kont tal-istat ta' implimentazzjoni tal-pjan ta' azzjoni dwar l-infurzar tal-2020.
Il-ministri rrikonoxxew li l-implimentazzjoni tal-azzjonijiet li jinsabu fil-pakkett ta' Marzu 2020 tal-Kummissjoni tibqa' essenzjali għall-funzjonament tas-suq uniku. Huma saħqu wkoll fuq l-importanza ta' kooperazzjoni mill-qrib bejn l-istati membri u l-Kummissjoni fir-rigward ta' tali azzjonijiet.
Diversi ilħna enfasizzaw l-importanza li jiġi esplorat il-potenzjal mhux sfruttat tas-suq uniku, speċjalment fil-qasam tas-servizzi.
Għadd ta' ministri esprimew appoġġ għal riformi strutturali, fejn meħtieġ, għat-tranżizzjoni lejn ekonomija ekoloġika u diġitali kompetittiva, sostenibbli u inklużiva. Tali riformi għandhom jiġu ffaċilitati permezz ta' qafas regolatorju konsistenti, effiċjenti, diġitali b'mod awtomatiku u li jibqa' validu fil-futur fil-livell tal-UE. Fl-istess kuntest, kien hemm rikonoxximent wiesa' tal-ħtieġa għal ambjent tan-negozju abilitanti li jippermetti li n-negozji, speċjalment l-intrapriżi żgħar u ta' daqs medju (SMEs), jisfruttaw il-benefiċċju sħiħ tas-suq uniku.
Kien hemm appoġġ wiesa' għal suq uniku aktar reżiljenti, li kapaċi jirreżisti kriżijiet bħal dik ikkawżata mill-pandemija tal-COVID-19. F'ambjent internazzjonali dejjem aktar diffiċli, il-ministri tkellmu favur it-tisħiħ tar-reżiljenza ekonomika u soċjali tal-UE u l-awtonomija strateġika fis-setturi teknoloġiċi sensittivi u ewlenin, filwaqt li żammew il-prinċipji ta' ekonomija miftuħa u kummerċ ħieles, ġust u sostenibbli.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-diskussjonijiet tal-lum identifikaw azzjonijiet essenzjali meħtieġa bħala kwistjoni ta' prijorità sabiex jinkiseb suq uniku li jiffunzjona b'mod sħiħ, aktar integrat u reżiljenti. Dan huwa prerekwiżit kruċjali għall-irkupru rapidu tal-ekonomija tal-UE hekk kif toħroġ mill-kriżi tal-COVID-19.
