"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Riċerka u spazju), 2 ta' Diċembru 2022
Riżultati ewlenin
Riċerka
Parir xjentifiku għal deċiżjonijiet politiċi aħjar
Il-ministri ddiskutew ir-rwol tax-xjenza fit-tfassil tal-politika tal-istati membri, fejn huma rriflettew dwar kif jista' jittejjeb l-użu tal-parir xjentifiku għal deċiżjonijiet politiċi.
Matul l-interventi tagħhom, il-ministri esprimew interess fil-ħolqien u l-iżvilupp ta' pjattaformi ta' konsulenti xjentifiċi fil-ministeri settorjali differenti tagħhom, u ssottolinjaw li huwa utli li jiġu kkoordinati approċċi nazzjonali fil-livell tal-UE.
Il-ministri, barra minn hekk, qablu li l-Kummissjoni għandu jkollha rwol ewlieni fl-għoti ta' koordinazzjoni, għarfien espert, u appoġġ għall-iżvilupp tal-politika fl-UE.
Il-Kunsill adotta żewġ settijiet ta' konklużjonijiet li jsaħħu l-pożizzjoni tal-UE fil-qasam tar-riċerka u l-innovazzjoni: dwar l-Aġenda għall-Innovazzjoni Ġdida u dwar l-infrastrutturi tar-riċerka.
L-adozzjoni tal-konklużjonijiet tal-lum tibgħat messaġġ qawwi lill-komunità Ewropea tar-riċerka u l-innovazzjoni: l-UE qed taħdem qatigħ biex tibqa' l-mexxej globali f'dan il-qasam. Aħna nibqgħu għajnejna fuq teknoloġiji ġodda u nsegwu mill-qrib mewġiet ġodda ta' innovazzjoni, sabiex l-UE u l-istati membri jkunu jistgħu jiżviluppaw approċċ komuni għar-riċerka u l-innovazzjoni.
Vladimír Balaš, Ministru Ċek għall-Edukazzjoni, iż-Żgħażagħ u l-Isport
Il-konklużjonijiet dwar l-infrastrutturi ta' riċerka (IR) huma pedament għall-iżvilupp taż-Żona Ewropea tar-Riċerka (ŻER). Il-konklużjonijiet jirrikonoxxu l-ħtieġa li l-IR ikomplu jissaħħu u li jiġi ffaċilitat aċċess usa' għalihom, billi dawn jistgħu jikkontribwixxu bil-kbir għall-kompetittività tal-ekonomija Ewropea.
Il-konklużjonijiet dwar l-Aġenda għall-Innovazzjoni Ġdida jistabbilixxu politika ta' innovazzjoni biex l-UE tikseb il-pożizzjoni ta' mexxejja globali. L-innovazzjoni għandha rwol kruċjali fil-kompetittività tal-Ewropa, fil-kisba tat-tranżizzjoni ekoloġika u diġitali, u fl-indirizzar tal-isfidi tas-soċjetà u fl-iżgurar tal-benesseri taċ-ċittadini tagħha.
Rakkomandazzjoni tal-Kunsill dwar il-prinċipji gwida għall-valorizzazzjoni tal-għarfien
Il-ministri adottaw rakkomandazzjoni tal-Kunsill dwar il-prinċipji gwida għall-valorizzazzjoni tal-għarfien.
Il-valorizzazzjoni tal-għarfien hija l-proċess li joħloq valur soċjali u ekonomiku mill-għarfien, billi jgħaqqad oqsma u setturi differenti u jittrasforma d-data u r-riżultati tar-riċerka fi prodotti u soluzzjonijiet li jkunu ta' benefiċċju għas-soċjetà.
Ir-rakkomandazzjoni tal-Kunsill taġġorna r-rakkomandazzjoni tal-Kummissjoni Ewropea mill-2008 billi twessa' l-kamp ta' applikazzjoni tal-atturi u l-attivitajiet, b'enfasi fuq l-ekosistema kollha tar-riċerka u l-innovazzjoni, u twessa' l-kamp ta' applikazzjoni għall-ġestjoni tal-assi intellettwali.
Taħt affarijiet oħra, il-ministri ġew infurmati mill-Kummissjoni Ewropea dwar il-KKI l-ġdida għall-Kultura u l-Kreattività tal-EIT u dwar konsultazzjoni pubblika dwar il-passat, il-preżent u l-futur tal-programmi qafas Ewropej għar-riċerka u l-innovazzjoni 2014-2027.
L-istati membri ġew infurmati mid-delegazzjoni Spanjola dwar PRIMA - is-Sħubija għar-Riċerka u l-Innovazzjoni fiż-Żona tal-Mediterran - kif ukoll dwar il-programm tal-presidenza Żvediża li jmiss.
Waqt ikla informali, il-ministri ddiskutew l-infrastrutturi tat-teknoloġija.
Spazju
Sfruttament tad-data spazjali tal-UE
Il-ministru kellu dibattitu ta' orjentazzjoni dwar l-isfruttament tad-data spazjali tal-UE.
L-UE għandha aċċess għal riżerva kbira ta' data spazjali, iżda ma tużax il-potenzjal sħiħ tagħha. Biex ilaħħqu mas-servizzi emerġenti bħall-IA u t-teknoloġiji kwantistiċi, l-istati membri jridu jingħaqdu flimkien u jaħdmu flimkien lejn sfruttament aħjar tad-data spazjali tal-UE. Dan ser isaħħaħ il-kompetittività tal-UE.
Martin Kupka, Ministru Ċek għat-Trasport
Il-ministri ddiskutew kif jista' jiżdied l-użu tad-data u l-applikazzjonijiet spazjali fl-UE f'segmenti differenti tas-suq. Matul l-interventi tagħhom, l-istati membri ffukaw fuq dak li diġà ġie implimentat u żviluppat fil-livell nazzjonali biex isir użu aħjar mill-isfruttament tad-data spazjali.
Huma rriflettew dwar ostakli possibbli li jxekklu l-adozzjoni tas-servizzi spazjali tal-UE fil-livelli Ewropej u nazzjonali, fejn identifikaw soluzzjonijiet possibbli biex jitneħħew tali ostakli, b'enfasi fuq ir-rwol tal-edukazzjoni u s-sensibilizzazzjoni, l-iskambju tal-aħjar prattiki fost l-utenti u bejn is-setturi spazjali u mhux spazjali, kif ukoll is-setturi pubbliċi u privati u l-aċċess għall-finanzjament għal soluzzjonijiet innovattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-adozzjoni tal-konklużjonijiet tal-lum tibgħat messaġġ qawwi lill-komunità Ewropea tar-riċerka u l-innovazzjoni: l-UE qed taħdem qatigħ biex tibqa' l-mexxej globali f'dan il-qasam. Aħna nibqgħu għajnejna fuq teknoloġiji ġodda u nsegwu mill-qrib mewġiet ġodda ta' innovazzjoni, sabiex l-UE u l-istati membri jkunu jistgħu jiżviluppaw approċċ komuni għar-riċerka u l-innovazzjoni.
L-UE għandha aċċess għal riżerva kbira ta' data spazjali, iżda ma tużax il-potenzjal sħiħ tagħha. Biex ilaħħqu mas-servizzi emerġenti bħall-IA u t-teknoloġiji kwantistiċi, l-istati membri jridu jingħaqdu flimkien u jaħdmu flimkien lejn sfruttament aħjar tad-data spazjali tal-UE. Dan ser isaħħaħ il-kompetittività tal-UE.