Kunsill Affarijiet Ekonomiċi u Finanzjarji, 06/10/2015, 6 ta' Ottubru 2015

Riżultati ewlenin

Dan huwa pass deċiżiv lejn aktar trasparenza fi kwistjonijiet ta’ taxxa” Pierre Gramegna, Ministru għall-Finanzi tal-Lussemburgu u president tal-Kunsill

Deċiżjonijiet transfruntieri dwar it-taxxa  

Il-Kunsill laħaq qbil politiku dwar abbozz ta' direttiva maħsuba biex ittejjeb it-trasparenza fl-assigurazzjonijiet mogħtija mill-istati membri lill-kumpaniji dwar kif jinħadmu t-taxxi tagħhom.

Id-direttiva hija waħda minn għadd ta' inizjattivi maħsuba biex iwaqqfu l-evitar tat-taxxa fuq il-kumpaniji. Ser tobbliga lill-istati membri jiskambjaw informazzjoni awtomatikament dwar deċiżjonijiet transfruntieri minn qabel dwar it-taxxa, kif ukoll arranġamenti minn qabel dwar il-prezzijiet. L-istati membri li jirċievu informazzjoni ser ikunu jistgħu jitolbu aktar informazzjoni fejn ikun meħtieġ. U l-Kummissjoni ser tiżviluppa direttorju ċentrali sigur, fejn tkun tista' tinħażen l-informazzjoni skambjata.  

“Dan huwa pass deċiżiv lejn aktar trasparenza fi kwistjonijiet ta’ taxxa,” qal Pierre Gramegna, Ministru għall-Finanzi tal-Lussemburgu u president tal-Kunsill. “Il-presidenza rnexxielha tikseb dan il-ftehim fi żmien rekord. L-Ewropa qed tibgħat sinjal qawwi favur sistema aktar ġusta ta' tassazzjoni tan-negozji madwar id-dinja.”  

Unjoni tas-swieq kapitali  

Il-Kunsill iddiskuta pjan ta’ azzjoni maħsub biex jistabbilixxi unjoni tas-swieq kapitali fl-UE sa tmiem l-2019.  

Il-pjan, propost mill-Kummissjoni fit-30 ta’ Settembru 2015, jinkludi għadd ta' miżuri varji sabiex isaħħu s-swieq kapitali u b'hekk jattiraw aktar investiment, inkluż investiment barrani, għal kumpaniji u proġetti infrastrutturali Ewropej. Wieħed mill-għanijiet prinċipali hu li jitjieb l-aċċess għall-finanzi għall-SMEs u negozji ġodda Ewropej, speċjalment fl-industriji innovattivi.  

Il-presidenza indikat li ser tibda minnufih ħidma fuq proposta dwar it-titolizzazzjoni, waħda mill-miżuri prinċipali maħsuba.

• Riżultat tal-laqgħa