Comhairle na nGnóthaí Eacnamaíocha agus Airgeadais, 06/10/2015, 6 Deireadh Fómhair 2015

Na príomhthorthaí

Is céim chinntitheach í seo chun níos mó trédhearcachta i gcúrsaí cánach a bheith ann” Pierre Gramegna, Aire Airgeadais Lucsamburg agus Uachtarán na Comhairle

Rialuithe maidir le cáin trasteorann  

Tháinig an Chomhairle ar chomhaontú polaitiúil i ndáil le dréacht-treoir lena ndírítear ar thrédhearcacht a mhéadú maidir leis na ráthaíochtaí a thug na Ballstáit do chuideachtaí trasteorann faoin mbealach ina ríomhfar a gcánacha.

Tá an treoir ar cheann de roinnt tionscnamh atá dírithe ar chosc a chur le seachaint cánach corparáide. Leis an treoir, ceanglófar ar na Ballstáit faisnéis maidir le réamhrialuithe cánacha trasteorann, chomh maith le réamhshocruithe praghsála, a mhalartú go huathoibríoch. Beidh na Ballstáit a fhaigheann an fhaisnéis in ann faisnéis bhreise a iarraidh i gcás inarb iomchuí. Agus forbróidh an Coimisiún eolaire ceannais slán, i gcás ina mbeadh an fhaisnéis a mhalartófar á stóráil.  

“Is céim chinntitheach í seo chun níos mó trédhearcachta i gcúrsaí cánach a bhaint amach,” arsa Pierre Gramegna, Aire Airgeadais Lucsamburg agus Uachtarán na Comhairle. “D’éirigh leis an Uachtaránacht an comhaontú sin a fháil go pras. Tá an Eoraip ag léiriú méine láidre le haghaidh tuilleadh cothromais i gcúrsaí cánacha i ngnólachtaí ar fud an domhain.”  

Aontas na Margaí Caipitil  

Phléigh an Chomhairle plean gníomhaíochta lena ndírítear ar Aontas na Margaí Caipitil a bhunú san Aontas Eorpach faoi dheireadh 2019.  

Sa phlean, a mhol an Coimisiún an 30 Meán Fómhair 2015, leagtar amach bearta éagsúla chun margaí caipitil a neartú ionas go meallfar níos mó infheistíochta, lena n-áirítear infheistíocht eachtrach, do chuideachtaí Eorpacha agus do thionscadail bonneagair. Ceann de na príomhaidhmeanna is ea rochtain ar mhaoiniú a fheabhsú do FBManna agus gnólachtaí nuathionscanta na hEorpa, go háirithe sna tionscail nuálacha.  

Chuir an Uachtaránacht in iúl go gcuirfí tús láithreach leis an obair maidir le togra i ndáil le hurrúsú, ceann de na príomhbhearta atá beartaithe.

• Toradh an chruinnithe