Kunsill Affarijiet Ekonomiċi u Finanzjarji, 10/11/2015, 10 ta' Novembru 2015

Riżultati ewlenin

Tibdil fil-klima

Il-Kunsill adotta konklużjonijiet qabel il-21 konferenza tal-partijiet għall-konvenzjoni qafas tan-NU dwar it-tibdil fil-klima.

• Konklużjonijiet tal-Kunsill dwar il-finanzjament għall-klima

B'mandat ambizzjuż għall-konferenza ta' Pariġi, l-Unjoni Ewropea qed tassumi r-rwol tagħha bħala waħda mill-forzi ewlenin wara ftehim ġdid dwar il-klima Pierre Gramegna, Ministru għall-Finanzi tal-Lussemburgu

Il-konferenza, li ser issir f'Pariġi mit-30 ta' Novembru sal-11 ta' Diċembru 2015, ser tieħu l-impenn li tapprova ftehim ġdid tan-NU dwar il-klima għall-perijodu ta' wara l-2020. L-għan huwa li tiġi llimitata ż-żieda medja fit-temperatura globali sa massimu ta' 2°C meta mqabbla mal-livelli ta' qabel l-industrijalizzazzjoni, u li jkun garantit finanzjament suffiċjenti pubbliku u privat għal dan.

"B'mandat ambizzjuż għall-konferenza ta' Pariġi, l-Unjoni Ewropea qed tassumi r-rwol tagħha bħala waħda mill-forzi ewlenin wara ftehim ġdid dwar il-klima", qal Pierre Gramegna, ministru għall-finanzi tal-Lussemburgu u president tal-Kunsill. "Aħna lesti wkoll li nipprovdu kontribuzzjoni qawwija għall-finanzjament tal-ħtiġijiet tal-ġlieda kontra t-tibdil fil-klima".

Il-konklużjonijiet tal-Kunsill jiffokaw fuq il-kontribuzzjonijiet għall-finanzjament tal-ġlieda kontra t-tibdil fil-klima mill-UE għall-$100 biljun fis-sena mwiegħda mill-pajjiżi żviluppati sal-2020, u fuq it-tbassir tal-kontribuzzjonijiet għall-finanzjament tal-ġlieda kontra t-tibdil fil-klima. Dawn jindirizzaw l-aspetti tal-finanzjament ta' ftehim ġdid tan-NU dwar il-klima għall-perjodu ta' wara l-2020.

Ser ikunu meħtieġa riżorsi sinifikanti biex jgħinu lill-pajjiżi li qed jiżviluppaw jittrattaw b'mod adegwat it-tibdil fil-klima, kemm biex inaqqsu l-emissjonijiet ta' gass b'effett ta' serra u biex jadattaw għall-konsegwenzi tat-tibdil fil-klima. Il-$100 biljun fis-sena mwiegħda mill-pajjiżi żviluppati sal-2020 ser jiġu minn firxa wiesgħa ta' sorsi: pubbliċi u privati, bilaterali u multilaterali kif ukoll sorsi alternattivi ta' finanzjament.

Unjoni tas-swieq kapitali

Il-Kunsill adotta konklużjonijiet li jilqgħu b'sodisfazzjoni l-pjan ta' azzjoni tal-Kummissjoni għall-iżvilupp ta' unjoni tas-swieq kapitali.

Il-pjan għandu l-għan li jistabbilixxi unjoni tas-swieq kapitali tal-UE li tiffunzjona b'mod sħiħ sa tmiem l-2019. Għadd ta' miżuri varji huma ppjanati biex isaħħu s-swieq kapitali sabiex jattiraw aktar investiment, inkluż investiment barrani, lejn kumpaniji u proġetti infrastrutturali Ewropej.

Wieħed mill-għanijiet ewlenin hu li jitjieb l-aċċess għall-finanzi għal SMEs u negozji ġodda, speċjalment f'industriji innovattivi.

"Diġà bdejna naħdmu fuq proposta għal titolizzazzjoni sempliċi, trasparenti u standardizzata, bil-għan li naslu għal ftehim politiku mill-aktar fis possibbli u forsi anke qabel tmiem din is-sena", qal is-Sur Gramegna. "Qegħdin ukoll nistennew proposta dwar il-prospetti, li ser ikunu importanti biex jiffaċilitaw l-aċċess għall-kreditu għal intrapriżi żgħar u ta' daqs medju, sabiex inkunu nistgħu nibdew naħdmu fuq dik ukoll."

• Konklużjonijiet tal-Kunsill dwar il-Pjan ta' Azzjoni tal-Kummissjoni għall-bini ta' Unjoni tas-Swieq Kapitali

Revoka tad-direttiva dwar it-tassazzjoni fuq it-tfaddil

Id-Direttiva 2003/48/KE, li mill-2005 ippermettiet aċċess aħjar lill-amministrazzjonijiet tat-taxxa għal informazzjoni dwar min ifaddal f'kontijiet privati, ġiet revokata mill-Kunsill.

Dan isegwi t-tisħiħ fil-miżuri biex jipprevjenu l-evażjoni tat-taxxa. Kienet żviluppat sovrapożizzjoni sinifikanti ma' leġislazzjoni oħra f'dan il-qasam, u r-revoka telimina dik is-sovrapożizzjoni.

• Revokata d-direttiva dwar it-tassazzjoni fuq it-tfaddil

• Riżultati tal-laqgħa tal-Kunsill