Kunsill Affarijiet Ekonomiċi u Finanzjarji, 16/06/2017, 16 ta' Ġunju 2017

Riżultati ewlenin

Banek

Il-Kunsill qabel dwar il-pożizzjoni tiegħu dwar parti minn pakkett ta’ proposti mmirati biex inaqqsu r-riskju fl-industrija bankarja.

It-testi huma dwar il-gradi għall-istrumenti ta’ dejn mhux garantit fi proċedimenti ta’ insolvenza u arranġamenti transizzjonali għall-introduzzjoni gradwali tal-impatt fuq il-kapital regolatorju tal-istandard internazzjonali tal-kontabilità IFRS 9.

It-testi jipprevedu wkoll it-tneħħija gradwali ta’ dispożizzjonijiet dwar it-trattament ta’ skoperturi kbar ta’ dejn tas-settur pubbliku denominati f’valuti mhux domestiċi fl-UE.

"Dawn il-proposti huma stabbiliti biex jgħinu lill-banek tagħna jsiru aktar reżiljenti għal xokkijiet fid-dawl ta’ standards prudenzjali ġodda miftehmin fil-livell internazzjonali. Iddeċidejna li nagħmlu dawn it-testi prijorità u nittamaw li l-Parlament ikun jista’ jibda n-negozjati sal-aħħar ta’ din is-sena", qal Edward Scicluna, ministru għall-finanzi ta’ Malta, li bħalissa għandha l-presidenza tal-Kunsill.

Proċedura ta’ defiċit eċċessiv - Politiki ekonomiċi u fiskali

Il-Kunsill għalaq il-proċeduri ta’ defiċit eċċessiv għall-Kroazja u l-Portugall, waqt li kkonferma li d-defiċits tagħhom niżlu għal taħt il-valur ta’ referenza tal-UE ta’ 3 % tal-PDG.

B'konsegwenza, huma biss erbgħa mit-28 stat membru tal-UE li ser jibqgħu soġġetti għall-proċeduri ta’ defiċit eċċessiv, b’hekk tkompli x-xejra pożittiva li bdiet fl-2011.

Il-Kunsill approva wkoll ir-rakkomandazzjonijiet speċifiċi għall-pajjiżi tal-2017 li għamel għall-istati membri dwar il-politiki ekonomiċi u fiskali tagħhom.