Kunsill Affarijiet Ekonomiċi u Finanzjarji, 11/07/2017, 11 ta' Lulju 2017

Riżultati ewlenin

Settur bankarju - Self improduttiv

Il-Kunsill approva pjan ta' azzjoni biex tiġi indirizzata l-problema ta' self improduttiv (non-performing loans - NPLs) fis-settur bankarju.

Iddeskriva taħlita ta' azzjonijiet ta' politika biex jgħinu biex jitnaqqsu l-istokkijiet ta' NPLs, li għadhom f'livelli għoljin fl-UE, u biex jipprevjenu li jitfaċċaw fil-futur.

“Is-self improduttiv huwa problema għall-industrija bankarja li s-soluzzjonijiet għalih sa issa ġew prinċipalment iddefiniti fil-livell nazzjonali”, qal Toomas Tõniste, il-ministru għall-finanzi tal-Estonja, li bħalissa għandha l-presidenza tal-Kunsill. “Jeħtieġ li nagħmlu lil dawn ir-riżorsi disponibbli, nagħmlu s-sistema finanzjarja tagħna aktar reżiljenti u nipprevjenu lill-kwistjonijiet tal-NPLs milli jerġgħu jitfaċċaw fil-futur."

Fuq il-bażi ta’ rapport espert, il-Kunsill enfasizza l-ħtieġa għal azzjoni fir-rigward ta’:

• superviżjoni tal-banek
• ir-riforma tal-oqfsa tal-insolvenza u tal-irkupru tad-dejn
• l-iżvilupp ta’ swieq sekondarji għall-NPLs
• ir-ristrutturar tal-industrija bankarja.

Qabel li jerġa' lura għall-kwistjoni regolarment.

Unjoni tas-swieq kapitali - Rieżami ta' nofs it-terminu

Il-Kunsill adotta konklużjonijiet dwar ir-rieżami mill-Kummissjoni tal-pjan ta’ azzjoni tal-UE għal unjoni tas-swieq kapitali.

Il-Kunsill ġedded l-impenn tiegħu għall-pjan ta' azzjoni, li huwa mmirat lejn l-assigurazzjoni ta' unjoni tas-swieq kapitali vera u proprja sa tmiem l-2019. Huwa appoġġa għadd ta' inizjattivi prijoritarji li għamlet il-Kummissjoni.

Enfasizza l-progress tajjeb li sar s'issa, bi kważi żewġ terzi tal-azzjonijiet diġà mwettqa. Madankollu feġġew għadd ta' sfidi, u magħhom inħasset il-ħtieġa li l-pjan jissaħħaħ.

"L-ekonomija Ewropea sejra għall-aħjar b'ritmu tajjeb. Dak li għandna bżonn l-aktar huwa iżjed investiment. Huwa għalhekk li l-unjoni tas-swieq kapitali hija fuq quddiem fl-aġenda Estonjana", qal is-Sur Tõniste. "Biex jiġi żgurat tkabbir ekonomiku sostenibbli fit-tul, huwa essenzjali li titwessa' l-firxa ta' sorsi disponibbli għall-finanzjament, b'mod partikolari għal kumpaniji żgħar u innovattivi."

Programm tal-presidenza

Il-Kunsill iddiskuta l-prijoritajiet tal-presidenza Estonjana f'dak li jirrigwarda l-affarijiet ekonomiċi u finanzjarji.

Il-punt ta' attenzjoni tal-attivitajiet sa tmiem l-2017 ser ikun:

• l-unjoni bankarja u l-unjoni tas-swieq kapitali tal-UE
• it-tassazzjoni, b'enfasi fuq l-ekonomija diġitali u l-modernizzazzjoni tal-VAT
• il-baġit tal-UE
• il-governanza ekonomika
• il-futur u l-finanzjament tal-UE u l-unjoni ekonomika u monetarja tagħha.