Kunsill Affarijiet Ekonomiċi u Finanzjarji, 10/10/2017, 10 ta' Ottubru 2017

Riżultati ewlenin

Il-Kunsill adotta direttiva li tintroduċi sistema ġdida għas-soluzzjoni tat-tilwim dwar it-taxxa doppja bejn l-istati membri. Id-direttiva ssaħħaħ il-mekkaniżmi użati għas-soluzzjoni tat-tilwim bejn l-istati membri li jirriżulta mill-interpretazzjoni ta' ftehimiet dwar l-eliminazzjoni tat-taxxa doppja.

"Din is-sistema l-ġdida hija ħafna aħjar. Hija ser tinkoraġġixxi l-investiment billi toħloq ambjent fiskali aktar favorevoli u tnaqqas l-ispejjeż għan-negozji," qal Toomas Tõniste, ministru għall-finanzi tal-Estonja, li attwalment għandha l-presidenza tal-Kunsill.

Il-Kunsill adotta konklużjonijiet li jistabbilixxu l-pożizzjoni tal-UE dwar it-tibdil fil-klima qabel il-konferenza li jmiss tal-partijiet għall-konvenzjoni tan-NU dwar it-tibdil fil-klima, li ser issir f'Bonn f'Novembru 2017. Il-konklużjonijiet ser iservu bħala mandat għan-negozjaturi tal-UE dwar l-aspetti finanzjarji tat-tibdil fil-klima. Il-konferenza ta' Bonn hija parti mis-segwitu għall-ftehim globali li ntlaħaq f'Pariġi f'Diċembru 2015.

L-UE u l-istati membri tagħha ħadu l-impenn li jżidu l-kontribuzzjonijiet finanzjarji pubbliċi tagħhom matul snin li ġejjin. Il-konklużjonijiet jappellaw għall-parteċipazzjoni ta' firxa usa' ta' kontributuri, filwaqt li jħeġġu lil pajjiżi żviluppati oħra biex jonoraw l-impenji tagħhom u biex jimmobilizzaw il-finanzjament privat.

Il-ministri evalwaw il-proċess ta' monitoraġġ tal-politika tas-'Semestru Ewropew' tal-2017 bl-għan li l-eżerċizzju jkun mingħajr xkiel u aktar effettiv. Huma ddiskutew it-tħejjijiet għal-laqgħat tal-G20 u tal-FMI li ser isiru f'Washington f'nofs Ottubru. U l-Kummissjoni ppreżentat pakkett ta' proposti biex tirriforma s-sistema tal-VAT tal-UE, kif ukoll l-approċċ ta' politika ssuġġerit min-naħa tagħha dwar it-tassazzjoni tal-ekonomija diġitali.