Kunsill Affarijiet Ekonomiċi u Finanzjarji, 23/05/2017, 23 ta' Mejju 2017

Riżultati ewlenin

Taxxa doppja - Soluzzjoni tat-tilwim

Il-Kunsill qabel dwar sistema ġdida għas-soluzzjoni tat-tilwim dwar it-taxxa doppja bejn stati membri.

Il-proposta għandha l-għan li ttejjeb il-mekkaniżmi li jintużaw meta jinqala' t-tilwim minħabba l-interpretazzjoni tal-ftehimiet dwar l-eliminazzjoni tat-taxxa doppja.

"Din id-direttiva hija parti importanti mill-pjan tagħna li nsaħħu ċ-ċertezza tat-taxxa u ntejbu l-ambjent kummerċjali fl-Ewropa", qal Edward Scicluna, ministru għall-finanzi ta' Malta, li bħalissa għandha l-presidenza tal-Kunsill.

L-abbozz ta' direttiva jirrikjedi li l-mekkaniżmi għas-soluzzjoni tat-tilwim ikunu obbligatorji u vinkolanti, b'limiti ta' żmien ċari u obbligu li jiksbu riżultati. B’hekk ser isaħħaħ iċ-ċertezza tat-taxxa u l-ambjent li fih joperaw in-negozji.

Bażi komuni għat-taxxa korporattiva

Il-Kunsill iddiskuta proposta għal bażi komuni tat-taxxa korporattiva (BKTK) fl-UE, li għandha l-għan li tnaqqas il-piż amministrattiv tal-kumpaniji multinazzjonali.

It-test jirrevedi proposta tal-2011 li kienet ġiet irtirata u sostitwita bi proposti għal riforma tat-taxxa korporattiva f’żewġ stadji.

Jistabbilixxi ġabra unika tar-regoli dwar il-kalkolu tal-obbligazzjoni tat-taxxa korporattiva għall-kumpaniji.

Il-presidenza kkonfermat li beħsiebha tkompli d-diskussjonijiet dwar l-elementi l-ġodda tal-proposta, u li għandu jiġu previst livell xieraq ta’ flessibilità. Ladarba l-ġabra tar-regoli dwar il-BKTK tiġi approvata, ser tiġi kkunsidrata, mingħajr dewmien, proposta separata dwar il-konsolidazzjoni tat-taxxa (BKKTK).