Kunsill Affarijiet Ekonomiċi u Finanzjarji, 21/03/2017, 21 ta' Marzu 2017

Riżultati ewlenin

Politika ekonomika u fiskali

Il-Kunsill iddiskuta l-implimentazzjoni tar-rakkomandazzjonijiet speċifiċi għall-pajjiżi skont is- “Semestru Ewropew”, b’fokus fuq l-esperjenzi tar-riforma f’dan il-qasam fl-istati membri. Dan irriżulta fi skambju ta’ fehmiet dwar kif dawn l-esperjenzi ħallew impatt fuq l-ambjent tan-negozju.

“L-uniku mod biex il-pajjiżi jegħlbu l-'għeja mir-riformi’ hu li jkun hemm feedback minn stati membri oħra dwar kif irnexxielhom jiġġestixxu r-riformi b’mod aktar pożittiv”, qal Edward Scicluna, ministru għall-finanzi ta’ Malta, li bħalissa għandha l-presidenza tal-Kunsill. “Il-preżentazzjonijiet fil-Kunsill ta’ llum laħqu dan l-objettiv”.

Laqgħa tal-G20

Il-ministri ddiskutew l-eżitu ta’ laqgħa tal-ministri tal-finanzi u l-gvernaturi tal-banek ċentrali tal-G20 li saret f’Baden-Baden fis-17 u t-18 ta’ Marzu 2017, wara li ngħataw aġġornament mill-Presidenza Maltija, il-Kummissjoni u l-pajjiż ospitanti tal-ministri għall-finanzi tal-G20, il-Ġermanja.

Matul il-laqgħa saru diskussjonijiet dwar l-ekonomija globali, patt mal-Afrika, l-istituzzjonijiet finanzjarji internazzjonali, it-tassazzjoni, ir-regolamentazzjoni finanzjarja, ir-rimessi u l-azzjonijiet kontra l-ħasil tal-flus.

Din kienet l-ewwel minn żewġ laqgħat ta' dan it-tip qabel is-summit tal-G20 ta’ Lulju f’Hamburg.

Taxxa fuq il-valur miżjud

Il-Kunsill iddiskuta proposta li tawtorizza rati mhux standard tal-VAT għal pubblikazzjonijiet elettroniċi u proposta li tippermetti inverżjoni ġeneralizzata iżda temporanja tar-responsabbiltà bħala mezz ta' prevenzjoni tal-frodi tal-VAT.

L-ewwel proposta tipprevedi l-possibbiltà ta' allinjament tar-regoli għal pubblikazzjonijiet elettroniċi - li bħalissa qed jiġu intaxxati bir-rata standard tal-VAT - ma' dawk għal pubblikazzjonijiet 'fiżiċi’, li jibbenifikaw minn rati mnaqqsa varji. Hija parti minn sforz usa’ biex il-VAT tiġi modernizzata skont il-pjan tas-‘suq uniku diġitali’ tal-UE.

It-tieni proposta hija risposta għal talba mill-istati membri partikolarment affettwati mill-frodi tal-VAT. Il-'mekkaniżmu tar-reverse charge ġeneralizzat' jinvolvi t-trasferiment tar-responsabbiltà għall-ħlasijiet tal-VAT mill-fornitur għall-klijent għal provvisti domestiċi li jaqbżu limitu speċifikat.

Il-ħidma ser tkompli fid-dawl tal-kummenti mill-ministri, bl-għan li jintlaħaq ftehim dwar iż-żewġ proposti.