Kunsill Affarijiet Ekonomiċi u Finanzjarji, 23/01/2018, 23 ta' Jannar 2018

Riżultati ewlenin

Il-Kunsill neħħa 8 ġurisdizzjonijiet mil-lista tal-UE ta' ġurisdizzjonijiet li ma jikkooperawx għal finijiet ta' tassazzjoni, wara l-impenji meħuda f'livell politiku għoli biex jirrimedjaw x'qed iħasseb lill-UE.

Barbados, l-Emirati Għarab Magħquda, Grenada, ir-Repubblika tal-Korea, ir-Reġjun Amministrattiv Speċjali tal-Macao, il-Mongolja, il-Panama u t-Tuneżija tmexxew għal kategorija separata ta' ġurisdizzjonijiet soġġetti għal monitoraġġ mill-qrib.

"Il-proċess ta' elenkar tagħna diġà qed juri xi jsarraf", qal Vladislav Goranov, ministru għall-finanzi tal-Bulgarija, li bħalissa għandha l-presidenza tal-Kunsill. "Il-ġurisdizzjonijiet tad-dinja ħadmu qatigħ biex jieħdu impenji għar-riforma tal-politiki tat-tassazzjoni tagħhom. L-għan tagħna huwa li nippromwovu kriterji tal-governanza tajba fil-qasam tat-taxxa b'mod globali."

Id-deċiżjoni tħalli 9 ġurisdizzjonijiet fuq il-lista ta' ġurisdizzjonijiet li ma jikkooperawx mis-17 li tħabbru fil-bidu fil-5 ta' Diċembru 2017.

Il-ministri ddiskutew miżuri biex jiġi indirizzat is-self improduttiv fis-settur bankarju.

Il-Kummissjoni qed tippjana miżuri għall-implimentazzjoni tal-pjan ta' azzjoni tal-Kunsill ta' Lulju 2017 dwar is-self improduttiv.

Il-Kunsill iddiskuta l-prospetti ta' tkabbir u l-iżbilanċi makroekonomiċi fil-qafas tas-"Semestru Ewropew", il-proċess annwali ta' monitoraġġ tal-politika tal-UE.

Huwa adotta konklużjonijiet u approva abbozz ta' rakkomandazzjoni dwar il-politiki ekonomiċi taż-żona tal-euro.

Il-ministri ddiskutew ukoll l-iżvilupp ulterjuri tal-unjoni ekonomika u monetarja tal-UE, kif ukoll il-prijoritajiet tal-presidenza Bulgara fir-rigward tal-affarijiet ekonomiċi u finanzjarji.