Kunsill Affarijiet Ekonomiċi u Finanzjarji, 05/12/2017, 5 ta' Diċembru 2017

Riżultati ewlenin

Il-Kunsill approva u ppubblika lista tal-UE ta' ġurisdizzjonijiet li ma jikkooperawx fi kwistjonijiet ta' tassazzjoni, bil-għan li tiġi promossa l-governanza tajba madwar id-dinja.

Il-lista hija maħsuba biex tikkontribwixxi għall-isforzi ta' prevenzjoni tal-frodi tat-taxxa u tal-evażjoni tat-taxxa. Il-ħidma tal-Kunsill fuq il-lista saret b'mod parallel mal-OECD.

"Din l-inizjattiva diġà qed turi x’issarraf, billi għadd ġmielu ta’ pajjiżi għamlu ħilithom biex jieħdu impenji, abbażi tal-kriterji tagħna, qabel l-iskadenza", qal Toomas Tõniste, ministru għall-finanzi tal-Estonja, li attwalment għandha l-presidenza tal-Kunsill. "Iżda huwa wkoll importanti li nissorveljaw mill-qrib l-implimentazzjoni tal-impenji meħuda mis-sħab tagħna madwar id-dinja."

"Dan mhuwiex sempliċement proċess ta' darba", kompla s-Sur Tõniste. "Ser nirrieżaminaw u naġġornaw regolarment il-lista fis-snin li ġejjin. L-għan tagħna huwa li niżguraw li governanza tajba tat-taxxi ssir in-norma l-ġdida."

Il-Kunsill qabel ukoll dwar il-kontribut tal-UE fid-diskussjonijiet fil-livell internazzjonali dwar it-"tassazzjoni diġitali". Il-konklużjonijiet tiegħu ser iservu wkoll bħala referenza għal aktar ħidma fil-livell tal-UE, inkluż bil-ħsieb tal-proposti leġislattivi tal-Kummissjoni mistennija kmieni fl-2018.

L-azzjoni hija meħtieġa peress li l-ekonomija diġitali hija ta' sfida għall-kunċetti maqbula tar-regoli internazzjonali dwar it-taxxa. Ir-regoli attwali dwar it-taxxa kienu tfasslu għall-ekonomija tradizzjonali u ma japplikawx għal attivitajiet li ma jeħtieġu l-ebda preżenza fiżika fil-pajjiż fejn jinbiegħu l-oġġetti u s-servizzi.

Il-Kunsill adotta regoli ġodda dwar il-VAT fuq il-kummerċ elettroniku. Il-proposti, li huma parti mill-istrateġija tal-UE għal "suq uniku diġitali", għandhom l-għan li jagħmluha aktar faċli għan-negozji li joperaw online biex jikkonformaw mal-obbligi tal-VAT. Huma ser jiffaċilitaw ukoll il-ġbir tal-VAT meta l-konsumaturi jixtru oġġetti u servizzi online, inkluż minn pajjiżi terzi.

Il-Kunsill irrieżamina l-ħidma fuq pakkett ta' miżuri bil-għan li jnaqqsu r-riskji fl-industrija bankarja, u fuq proposta għal skema Ewropea ta' assigurazzjoni tad-depożiti.

U l-Kummissjoni rrapportat dwar il-ħidma biex jiġi implimentat il-pjan ta' azzjoni tal-Kunsill ta' Lulju 2017 dwar is-self improduttiv fis-settur bankarju.

Sar progress fil-pakkett bankarju, u ntlaħaq qbil preliminari dwar firxa wiesgħa ta' kwistjonijiet. Madankollu, għad fadal għadd ta' kwistjonijiet politiċi li jridu jiġu solvuti u dawn huma identifikati biċ-ċar fir-rapport ta' progress tal-presidenza.

Il-Kunsill għalaq proċedura ta' defiċit eċċessiv għar-Renju Unit u sab li r-Rumanija naqset milli tieħu azzjoni effettiva biex tikkoreġi devjazzjoni baġitarja sinifikanti.

Huwa ħareġ rakkomandazzjoni riveduta lir-Rumanija taħt il-"proċedura ta' devjazzjoni sinifikanti".

Tnejn biss mit-28 stat membru tal-UE ser jibqgħu soġġetti għall-proċeduri ta' defiċit eċċessiv, b'hekk tkompli x-xejra pożittiva li bdiet fl-2011.