Kunsill Affarijiet Ekonomiċi u Finanzjarji, 07/11/2017, 7 ta' Novembru 2017

Riżultati ewlenin

Il-Ministri ddiskutew regoli tal-VAT imtejba biex jgħinu fl-iffaċilitar tal-kummerċ elettroniku u n-negozji online.

Il-proposti għandhom l-għan li jagħmluha aktar faċli li jinxtraw u jinbiegħu oġġetti u servizzi online. Dawn huma parti mill-istrateġija għal "suq uniku diġitali" tal-UE. L-għan huwa wkoll li jittejjeb il-ġbir tal-VAT fuq servizzi diġitali.

Il-presidenza kkonfermat li d-diskussjonijiet ser ikomplu bil-ħsieb li jintlaħaq qbil qabel tmiem l-2017.

"Għandna bżonn ta' regoli ġodda biex nadattaw is-sistema tagħna tal-VAT għall-era diġitali", qal Toomas Tõniste, Ministru għall-Finanzi tal-Estonja, li bħalissa għandha l-presidenza tal-Kunsill. "Bħalissa qed nersqu lejn qbil u nittamaw li nikkonkludu dalwaqt."

Il-ministri ddiskutew il-proposti bil-għan li tissaħħaħ is-superviżjoni finanzjarja u tiġi mħeġġa l-integrazzjoni tas-suq tal-kapital fl-Ewropa.

L-għan huwa li s-swieq finanzjarji jkunu jistgħu jaħdmu b'mod aktar effettiv u jindirizzaw aħjar l-isfidi l-ġodda. Il-bidliet għar-relazzjonijiet superviżorji ma' pajjiżi mhux tal-UE ser jiżguraw ġestjoni aħjar tar-riskji kollha tas-settur finanzjarju.

Ir-riformi jikkontribwixxu għall-pjan tal-UE biex tiżgura unjoni tas-swieq tal-kapital sa tmiem l-2019, li għalih il-ministri reġgħu esprimew appoġġ qawwi. L-esperti nazzjonali ser ikomplu bil-ħidma dwar il-proposti, u ser jibdew b'emendi mmirati li jindirizzaw in-nuqqasijiet fis-sistema attwali.

Il-Qorti tal-Awdituri ppreżentat ir-rapport annwali tagħha dwar il-ġestjoni tal-baġit tal-UE, li jikkonferma titjib sostnut f'livelli stmati ta' żbalji fil-pagamenti.

Abbażi tar-rapport, ser ikun deċiż jekk tinħariġx kwittanza lill-Kummissjoni għall-implimentazzjoni tal-baġit għall-2016.

Il-Kunsill adotta wkoll konklużjonijiet dwar it-triq 'il quddiem fl-iżvilupp ta' sistemi tal-IT doganali.