Kunsill Ambjent, 05/03/2018, 5 ta' Marzu 2018

Riżultati ewlenin

Ekonomija Ċirkolari

Il-ministru kellhom skambju ta' fehmiet dwar żewġ inizjattivi tal-Kummissjoni taħt il-Pjan ta' Azzjoni għall-Ekonomija Ċirkolari: l-istrateġija Ewropea għall-plastiks f'ekonomija ċirkolari u l-interfaċċja bejn il-kimiċi, il-prodotti u l-iskart. Ir-regoli ġodda proposti għandhom l-għan li jillimitaw l-impatt ambjentali negattiv ta' plastiks u ta' partiċelli tal-mikroplastik, kif ukoll sustanzi kimiċi perikolużi, rispettivament. Fid-diskussjonijiet tagħhom, il-ministri kkonċentraw fuq approċċi biex jippromwovu żieda sostanzjali fl-użu ta' plastiks riċiklati, kif ukoll l-irkupru sikur ta' skart li fih sustanzi ta' tħassib.

Jeħtieġ li nipproteġu l-ambjent tagħna mit-tniġġis mill-plastik. Jeħtieġ li nipproteġu wkoll l-ibħra tagħna mill-partiċelli tal-mikroplastik. Illum għamilna pass inizjali importanti ħafna lejn impenji li jippermettulna nwettqu l-wegħda tagħna li nipproteġu l-ambjent u s-saħħa taċ-ċittadini tagħna. Neno Dimov, il-Ministru Bulgaru għall-Ambjent u l-Ilma

Ekoinnovazzjoni

Matul l-ikla ta' nofsinhar il-ministri kellhom skambju ta' fehmiet mal-Kummissarju Vella dwar l-ekoinnovazzjoni fil-kuntest tal-ekonomija ċirkolari.

Ekoloġizzazzjoni tas-Semestru Ewropew

Il-ministri kellhom l-opportunità li jkollhom skambju ta' fehmiet dwar il-proċess tas-Semestru Ewropew. Iddiskutew ukoll l-aspetti relatati mal-ambjent tal-Istħarriġ Annwali dwar it-Tkabbir. Il-ministri ddiskutew ukoll dwar kif l-isfidi ambjentali, l-iżvilupp sostenibbli u t-tibdil fil‑klima jistgħu jiġu riflessi fil-Qafas Finanzjarju Pluriennali (QFP) tal-UE wara l-2020.

Filwaqt li fakkru fil-potenzjal, li hemm prova tiegħu, tal-politika ambjentali biex tippromwovi l-impjiegi u t-tkabbir permezz ta' investimenti u finanzi ekoloġiċi sostenibbli, il-ministri ssottolinjaw il-ħtieġa ta' rappreżentazzjoni adatta tal-isfidi ambjentali fil-QFP.

Suġġetti oħra fuq l-aġenda

F'sessjoni pubblika, il-Kunsill kellu l-opportunità jisma' preżentazzjoni mill-Kummissjoni rigward il-proposta leġislattiva dwar l-istandards tas-CO2 għall-karozzi u l-vannijiet. L-informazzjoni mid-delegazzjoni Pollakka dwar il-COP24 u azzjonijiet relatati dwar it-tibdil fil‑klima xxandret direttament ukoll.