Kunsill Ambjent, 25/06/2018, 25 ta' Ġunju 2018

Riżultati ewlenin

Ekonomija Ċirkolari

Fil-25 ta' Ġunju, il-Kunsill Ambjent adotta konklużjonijiet dwar it-twettiq tal-pjan ta' azzjoni tal-UE għall-ekonomija ċirkolari. Il-Kunsill ikkonferma mill-ġdid il-potenzjal tal-ekonomija ċirkolari biex jinkiseb it-tkabbir sostenibbli u titnaqqas id-dipendenza tal-UE fuq materja prima mhux rinnovabbli, b'mod partikolari permezz ta' żieda fir-riċiklaġġ ta' prodotti tal-plastik. Huwa ssottolinja l-ħtieġa li jiġu kkunsidrati mill-ġdid id-drawwiet tal-konsum u jiġi evitat l-użu mhux meħtieġ tal-plastik. Huwa enfasizza li l-partijiet ikkonċernati kollha għandhom ir-responsabbiltà li jieħdu l-azzjoni meħtieġa għall-bidla, rigward id-disinn, l-użu u l-konsum ta' prodotti. Issottolinja wkoll l-importanza tal-ġestjoni tajba ta' sustanzi potenzjalment riskjużi fil-prodotti u l-iskart biex jiġu stabbiliti ċikli ta' materjali mhux tossiċi.

L-ekonomija ċirkolari hija l-akbar kisba ta' żminijietna. Ninsab kuntent ħafna li llum il-ministri qablu dwar azzjonijiet komuni biex jimplimentaw il-pjan ta' azzjoni tal-UE dwar l-ekonomija ċirkolari. Jeħtieġ li lkoll nikkunsidraw mill-ġdid kif nużaw u nikkonsmaw il-plastik. Neno Dimov, il-Ministru għall-Ambjent u l-Ilma tal-Bulgarija

L-ilma tax-xorb

Il-ministri għall-ambjent kellhom dibattitu ta' orjentazzjoni, imxandar direttament permezz ta' streaming, dwar id-direttiva dwar l-ilma tax-xorb li hija riżultat dirett tal-ewwel inizjattiva taċ-ċittadini Ewropej li qatt kellha suċċess. Id-direttiva dwar l-ilma tax-xorb ittejjeb l-istandards tal-kwalità tal-ilma, tintroduċi approċċ ibbażat fuq ir-riskju għall-monitoraġġ tal-ilma, u tarmonizza l-informazzjoni disponibbli dwar il-kwalità tal-ilma kif ukoll is-servizzi għall-konsumaturi.

Standards ta' CO2 għall-karozzi u l-vannijiet

Waranofsinhar, il-Kunsill kellu dibattitu ta' orjentazzjoni, imxandar direttament permezz ta' streaming, rigward ir-regolament dwar l-istandards tal-emissjonijiet ta' CO2 għall-karozzi u l-vannijiet. Il-ministri ddiskutew il-miri tat-tnaqqis tal-emissjonijiet ta' CO2 proposti ta' 15% mill-2025 u 30% mill-2030 għal karozzi u vannijiet ġodda. Il-ministri analizzaw ukoll il-mekkaniżmu ta' inċentivi propost għal vetturi b'emissjonijiet żero u emissjonijiet baxxi.

Suġġetti oħra fl-aġenda

F'sessjoni pubblika, il-Kunsill kellu l-opportunità jisma' preżentazzjoni mill-Kummissjoni dwar il-proposti leġislattivi ġodda tagħha dwar standards ta' CO2 għal vetturi heavy-duty, il-Programm għall-Ambjent u l-Azzjoni Klimatika (LIFE), l-użu mill-ġdid tal-ilma, plastiks b'użu wieħed u dwar l-allinjament tal-obbligi ta' rappurtar ambjentali. Il-Kummissjoni rrappurtat ukoll dwar l-inizjattiva tal-pollinaturi tal-UE li għandha l-għan li tipproteġi n-naħal tal-għasel, in-naħal selvaġġ u insetti pollinaturi selvaġġi li jkunu mhedda bl-estinzjoni.