An Chomhairle Comhshaoil, 05/03/2018, 5 Márta 2018

Na príomhthorthaí

An geilleagar ciorclach

Bhí malartú tuairimí ag na hairí maidir le dhá thionscnamh ón gCoimisiún faoin bPlean Gníomhaíochta don Gheilleagar Ciorclach: an straitéis Eorpach le haghaidh plaisteach i ngeilleagar ciorclach agus ar an gcomhéadan idir ceimiceáin, táirgí agus dramhaíl. Is é is aidhm do na rialacha nua atá molta tionchar diúltach comhshaoil na bplaisteach agus na gcáithníní micreaphlaisteacha, agus na substaintí ceimeacha guaiseacha, faoi seach, a theorannú. Le linn an phlé, dhírigh na hairí ar bhealaigh chun méadú nach beag ar úsáid plaisteach athchúrsáilte a chur chun cinn agus dramhaíl ina bhfuil substaintí ar údar imní iad a aisghabháil go sábháilte.

Ní mór dúinn an comhshaol a chosaint ar an truailliú plaistigh. Caithfear freisin ár bhfarraigí a chosaint ar cháithníní micreaphlaisteacha. Inniu tá bunchéim an-tábhachtach glactha againn i dtreo gealltanais lena bhféadfaimid ár ngealltanas maidir le cosaint a dhéanamh ar an gcomhshaol agus ar shláinte ár gcuid saoránach a chomhlíonadh. Neno Dimov, Aire Comhshaoil agus Uisce na Bulgáire

Éiceanuálaíocht

Le linn an lóin, bhí malartú tuairimí ag na hairí leis an gCoimisinéir Vella maidir leis an éiceanuálaíocht i gcomhthéacs an gheilleagair chiorclaigh.

An Seimeastar Eorpach a ghlasú

Bhí deis ag na hairí a gcuid tuairimí i ndáil leis an Seimeastar Eorpach a mhalartú. Ina theannta sin phléigh siad na gnéithe den Suirbhé Bliantúil Fáis a bhaineann leis an gcomhshaol. Phléigh na hairí freisin conas a d'fhéadfaí dúshláin an chomhshaoil, forbairt inbhuanaithe agus athrú aeráide a léiriú sa Chreat Airgeadais Ilbhliantúil (CAI) i ndiaidh 2020.

Ag meabhrú an cumas atá ag beartas comhshaoil poist agus fás a chur chun cinn trí infheistíochtaí agus airgeadas atá glas agus inbhuanaithe, chuir na hairí béim ar an ngá atá le hionadaíocht iomchuí a dhéanamh ar dhúshláin chomhshaoil.

Ábhair eile ar an gclár oibre

Le linn seisiún poiblí, d'éist an Chomhairle le cur i láthair ón gCoimisiún maidir leis an togra reachtach a bhaineann leis na caighdeáin CO2 do charranna agus veaineanna. Rinneadh an fhaisnéis ó thoscaireacht na Polainne maidir le COP24 agus gníomhaíochta maidir leis an athrú aeráide lena mbaineann a chraoladh beo.