Kunsill Ambjent, 19/06/2017, 19 ta' Ġunju 2017

Riżultati ewlenin

Ftehim ta' Pariġi

Il-Kunsill iddiskuta f’seduta pubblika l-aħħar żviluppi fil-qasam tat-tibdil fil-klima fil-livell internazzjonali. Il-ministri għall-ambjent esprimew il-fehmiet tagħhom dwar id-deċiżjoni unilaterali tal-amministrazzjoni tal-Istati Uniti biex tirtira mill-Ftehim ta’ Pariġi u laqgħu b’mod unanimu l-konklużjonijiet adottati dwar dan is-suġġett fil-Kunsill Affarijiet Barranin fl-istess jum.

Il-ministri kienu uniti biex jerġgħu jikkonfermaw l-impenn sod tagħhom għall-implimentazzjoni rapida u sħiħa ta’ dan il-ftehim globali legalment vinkolanti. Il-ġlieda kontra t-tibdil fil-klima teħtieġ tmexxija globali responsabbli u l-UE u l-istati membri tagħha huma lesti li jassumu dak ir-rwol. Il-Kunsill Ewropew ser jiddiskuti wkoll dan is-suġġett waqt il-laqgħa ppjanata din il-ġimgħa fit-22 u t-23 ta’ Ġunju 2017.

“F'dak li jirrigwarda l-azzjoni kontra t-tibdil fil-klima ma nistgħux noqogħdu nerġgħu naħsbuha. Il-futur tagħna għandu bżonn pjaneta nadifa u sostenibbli. Il-kollegi tiegħi u jien illum tennejna l-fehmiet tal-ministri għall-affarijiet barranin tagħna sabiex jiġi riaffermat li l-Ftehim ta’ Pariġi huwa adattat għall-iskop maħsub u ma jistax jerġa' jiġi nnegozjat. L-UE u l-istati membri tagħha qed jaħdmu ferm biex iħejju l-konferenza COP 23 f'Bonn f'Novembru li ġej, u issa aħna qegħdin fil-proċess li nimplimentaw bis-sħiħ il-Ftehim ta' Pariġi. Nappellaw lis-sħab globali kollha biex jagħmlu l-istess."  

Dott. José A. Herrera, Ministru ta’ Malta għall-iżvilupp sostenibbli, l-ambjent u t-tibdil fil-klima 

L-UE hija impenjata li tnaqqas l-emissjonijiet ta' gass b'effett ta' serra b'mill-inqas 40% sal-2030 meta mqabbel mal-livelli tal-1990. Din il-mira ġiet ippreżentata f'Marzu 2015 bħala l-kontribut maħsub determinat fil-livell nazzjonali tal-UE u l-istati membri tagħha għall-Ftehim ta’ Pariġi. Sabiex nilħqu l-mira, it-tnaqqis ser jammonta għal 43 % fis-setturi koperti mill-iskema tal-iskambju ta' kwoti tal-emissjonijiet (is-setturi li jaqgħu taħt l-ETS) u 30 % fis-setturi li ma jaqgħux taħt l-ETS, fiż-żewġ każijiet sal-2030 meta mqabbel mal-2005. L-UE bħalissa qed taħdem biex tiġi stabbilita l-leġislazzjoni ġdida adatta.

• Tibdil fil-klima: il-Kunsill jafferma mill-ġdid li l-Ftehim ta' Pariġi huwa adattat għall-iskop maħsub għalih u ma jistax jiġi nnegozjat mill-ġdid.
• Kronoloġija - il-Ftehim ta’ Pariġi
• Infografika - Tibdil fil-klima: l-UE kif ser tagħti riżultati?

Setturi li ma jaqgħux taħt l-ETS: il-kondiviżjoni tal-isforzi u l-LULUCF

Il-Kunsill kellu dibattitu dwar iż-żewġ proposti leġislattivi għat-tnaqqis tal-emissjonijiet f'setturi mhux koperti mill-iskema għall-iskambju ta' kwoti tal-emissjonijiet: ir-regolament dwar il-kondiviżjoni tal-isforzi u r-regolament dwar l-użu tal-art, it-tibdil fl-użu tal-art u l-forestrija (LULUCF).

Il-ministri evalwaw il-progress li sar s’issa u qasmu l-opinjonijiet tagħhom dwar il-kwistjonijiet pendenti ewlenin tal-proposti, filwaqt li ffokaw fuq iż-żieda ta’ riżerva ġdida dwar is-sikurezza fir-regolament dwar il-kondiviżjoni tal-isforzi u fuq l-iffissar ta' livelli referenzjarji għall-foresti fir-regolament tal-LULUCF.

Id-delegazzjonijiet ipprovdew gwida politika utli dwar it-triq ’il quddiem rigward dawn iż-żewġ aspetti. Fuq din il-bażi, ser titkompla ħidma fil-Kunsill bil-ħsieb li jintlaħaq qbil dwar pożizzjoni ta’ negozjar qabel l-aħħar tas-sena.

“Matul il-presidenza Maltija għamilna progress sinifikanti rigward il-fajls li ma jaqgħux taħt l-ETS. Nemmen li m'aħniex 'il bogħod milli nilħqu ftehim, iżda jenħtieġu ftit aktar sforzi mill-istati membri. Issa, aktar minn qatt qabel, huwa importanti li niffokaw fuq il-mira tat-tnaqqis tal-emissjonijiet tal-UE sal-2030. Hija r-responsabbiltà konġunta tagħna li nwettqu l-impenn komuni tagħna. Ninsab fiduċjuż li jista’ jintlaħaq kompromess matul il-presidenza Estonjana”.  

Dott. José A. Herrera, Ministru ta’ Malta għall-iżvilupp sostenibbli, l-ambjent u t-tibdil fil-klima

Is-setturi li ma jaqgħux taħt l-ETS huma parti mill-istrumenti prinċipali tal-UE għat-tnaqqis tal-emissjonijiet ta' gass b'effett ta' serra u għat-twettiq tal-impenji tal-UE skont il-Ftehim ta' Pariġi.

• Setturi li ma jaqgħux taħt l-ETS - Rapport ta' progress

Pjan ta’ azzjoni tal-UE għan-natura, għaċ-ċittadini u għall-ekonomija

Il-Kunsill adotta konklużjonijiet dwar il-pjan ta’ azzjoni tal-UE għan-natura, għaċ-ċittadini u għall-ekonomija. Il-pjan ser itejjeb l-implimentazzjoni tad-direttivi dwar in-natura sabiex jiġi sfruttat il-potenzjal sħiħ tagħhom.

Il-ministri esprimew appoġġ għall-pjan ta’ azzjoni tal-UE, li għandu l-għan li jindirizza diversi lakuni identifikati rigward l-implimentazzjoni permezz ta’ erba’ oqsma ta’ prijorità u 15-il azzjoni konkreta.

Dawn il-konklużjonijiet juru l-impenn qawwi tal-UE biex tipproteġi l-ispeċijiet u l-ħabitats naturali u biex tagħmel progress lejn il-mira tal-UE għall-2020 li jitwaqqaf u jitreġġa' lura t-telf tal-bijodiversità u tas-servizzi tal-ekosistema

• Konklużjonijiet tal-Kunsill dwar Pjan ta’ Azzjoni tal-UE għan-natura, għaċ-ċittadini u għall-ekonomija