Kunsill Impjiegi, Politika Soċjali, Saħħa u Affarijiet tal-Konsumatur, 07-08/12/2017, 7 u 8 ta' Diċembru 2017

Riżultati ewlenin

Saħħa - 8 ta' Diċembru 2017

Il-ministri għas-saħħa ħadu kont tas-sitwazzjoni tal-politika dwar il-farmaċewtika fl-UE, li tiffoka fuq il-perspettivi futuri. Id-dibattitu wieġeb għall-ħtieġa li jissaħħaħ il-bilanċ fis-sistemi farmaċewtiċi fl-UE u l-Istati Membri tagħha.

Il-Kunsill adotta konklużjonijiet dwar l-aspetti transkonfinali tal-politika dwar l-alkoħol. Dawn il-konklużjonijiet jiffokaw fuq kwistjonijiet transkonfinali bħall-ittikkettar, ir-reklamar permezz tal-media soċjali u t-trasport transkonfinali ta' xorb alkoħoliku.

Ninsab kuntent li l-Istati Membri bagħtu messaġġ qawwi llum li s-saħħa pubblika tipprevali fuq l-interessi ekonomiċi. L-Ewropa għandha l-ogħla livelli ta’ konsum tal-alkoħol fid-dinja u bħala riżultat tbati l-iktar minn ħsara relatata mal-alkoħol. Ħafna mill-għodod biex din tiġi indirizzata huma f’idejn l-istati membri. Għalhekk iffukajna fuq kwistjonijiet transkonfinali li jistgħu jiġu indirizzati b’mod aktar effettiv permezz ta’ kooperazzjoni aħjar bejn l-istati membri. Jevgeni Ossinovski, President tal-Kunsill u ministru għas-Saħħa u x-Xogħol

Il-Kunsill adotta konklużjonijiet dwar is-"Saħħa fis-Soċjetà Diġitali – nagħmlu progress fl-innovazzjoni xprunata mid-data fil-qasam tas-saħħa".

Ħdimna qatigħ matul il-Presidenza Estonjana biex tissaħħaħ l-innovazzjoni diġitali fil-kura tas-saħħa. Billi nipprovdu servizzi-e ta' kwalità tajba u sikuri nistgħu ntejbu t-trattament tal-pazjenti u niżguraw li s-sistemi tas-saħħa tal-istati membri jkunu aktar effiċjenti u sostenibbli. Jevgeni Ossinovski, President tal-Kunsill u ministru għas-Saħħa u x-Xogħol

Impjiegi u politika soċjali, 7 ta' Diċembru 2017

Il-Kunsill qabel rigward il-pożizzjoni tiegħu (approċċ ġenerali) dwar id-direttiva dwar l-aċċessibbiltà. Din il-leġislazzjoni ser tagħmilha iktar faċli għall-persuni b’diżabilità biex jaċċessaw il-prodotti u s-servizzi.

Kulħadd fl-Ewropa għandu jkun jista' jgħix ħajtu b’mod sħiħ, u jkollu opportunitajiet indaqs biex iwettaq il-potenzjal tiegħu. L-impenn ta' llum ser jagħmilha possibbli għall-persuni b’diżabbiltà, kif ukoll il-persuni anzjani u dawk bi problemi ta’ saħħa temporanji, biex jaċċessaw il-prodotti u s-servizzi aktar faċilment. Bis-soluzzjonijiet teknoloġiċi intelliġenti disponibbli llum, is-soċjetajiet tagħna jistgħu jkunu ħafna aktar inklużivi u jiżguraw kwalità ta’ ħajja aħjar għal kulħadd. Kaia Iva, Ministru għall-Protezzjoni Soċjali tal-Estonja u l-President tal-Kunsill

• L-aċċessibbiltà għall-prodotti u s-servizzi: Il-Kunsill jaqbel dwar il-pożizzjoni tiegħu (stqarrija għall-istampa, 07/12/2017)

Il-Kunsill laħaq qbil parzjali dwar il-pożizzjoni tiegħu (approċċ ġenerali parzjali) dwar ir-regolament dwar il-koordinazzjoni ta’ sistemi tas-sigurtà soċjali. Dan il-ftehim ikopri l-kapitli dwar il-benefiċċji tal-kura fit-tul u l-benefiċċji tal-familja. Dan jiffaċilita l-mobilità tax-xogħol u jintroduċi salvagwardji aħjar tad-drittijiet taċ-ċittadini f’sitwazzjonijiet transkonfinali.

Il-Kunsill laħaq ukoll ftehim dwar direttiva dwar il-konvenzjoni tax-xogħol marittimu li ttejjeb il-kundizzjonijiet tax-xogħol tal-baħħara. Din tiffoka fuq il-protezzjoni tad-drittijiet tal-baħħara f’każ ta’ abbandun, u tipprovdi garanziji għal talbiet kuntrattwali f’każ ta’ mewt jew diżabbiltà fit-tul.

• Kondizzjonijiet tax-xogħol aħjar għall-baħħara: il-Kunsill japprova ftehim bejn is-sħab soċjali (stqarrija għall-istampa, 07/12/2017)

Il-Kunsill ivvaluta l-progress fid-direttivi dwar it-trattament indaqs u l-bilanċ bejn ix-xogħol u l-ħajja privata.

Il-ministri kellhom ukoll skambju ta' fehmiet dwar is-Semestru Ewropew tal-2018, wara l-preżentazzjoni tal-pakkett ekonomiku mill-Kummissjoni f'Novembru. Il-Kunsill approva l-aspetti soċjali u dawk marbutin mal-impjiegi tar-rakkomandazzjoni għaż-żona tal-euro.

Il-Kunsill adotta konklużjonijiet dwar: “Il-futur tax-xogħol: Tiġi ffaċilitata d-diġitalizzazzjoni (e-Easy)", "Tisħiħ tal-appoġġ ibbażat fuq il-komunità u kura għal għajxien indipendenti" u "Miżuri msaħħa biex titnaqqas is-segregazzjoni orizzontali bejn il-ġeneri fl-edukazzjoni u l-impjiegi."

Il-Kunsill adotta formalment id-direttiva dwar il-protezzjoni kontra karċinoġeni jew mutaġeni fil-post tax-xogħol sabiex tittejjeb il-protezzjoni tal-ħaddiema kontra l-espożizzjoni għal 13-il karċinoġenu.

• Karċinoġeni jew mutaġeni fil-post tax-xogħol: Il-Kunsill u l-Parlament Ewropew jilħqu qbil (stqarrija għall-istampa, 29/06/2017)