Politika soċjali
Kif l-UE tikkoordina l-politiki għall-promozzjoni tad-drittijiet soċjali, bl-għan li tibni mudell soċjali Ewropew aktar ġust u inklużiv.
L-UE tappoġġa lill-istati membri tagħha fil-promozzjoni tal-impjiegi, fit-titjib tal-kundizzjonijiet tal-għajxien u tax-xogħol, fl-għoti ta' protezzjoni soċjali adegwata u fil-ġlieda kontra l-esklużjoni soċjali.
Il-politiki dwar l-impjiegi u l-inklużjoni soċjali huma primarjament ir-responsabbiltà tal-awtoritajiet nazzjonali.
Il-pilastru Ewropew tad-drittijiet soċjali
Il-pilastru Ewropew tad-drittijiet soċjali għandu l-għan li jappoġġa swieq tax-xogħol u sistemi ta' protezzjoni soċjali ġusti u li jiffunzjonaw tajjeb.
Il-pilastru jafferma mill-ġdid l-impenn tal-UE li tiżgura kundizzjonijiet tal-għajxien u tax-xogħol aħjar madwar l-UE, b'enfasi fuq l-impjiegi, il-ħiliet, l-opportunitajiet indaqs u l-inklużjoni soċjali.
Miri tal-UE għall-2030 dwar id-drittijiet soċjali
Fl-2021, il-Kummissjoni Ewropea adottat pjan ta' azzjoni li stabbilixxa l-pjan direzzjonali biex jiġu implimentati l-20 prinċipju tal-pilastru. Bl-adozzjoni tad-dikjarazzjoni ta' Porto, il-mexxejja tal-UE laqgħu wkoll tliet miri tal-UE dwar id-drittijiet soċjali li għandhom jintlaħqu sal-2030.
Titjib tal-kundizzjonijiet tax-xogħol
L-UE adottat regoli biex tagħmel il-kundizzjonijiet tax-xogħol aktar ġusti, tindirizza d-diskriminazzjoni fuq il-post tax-xogħol u tiżgura s-saħħa u s-sikurezza tal-ħaddiema.
Uħud mill-aktar inizjattivi politiċi reċenti jinkludu regoli dwar ix-xogħol fuq il-pjattaformi, pagi minimi adegwati u kundizzjonijiet tax-xogħol aktar trasparenti u prevedibbli.
Ugwaljanza
L-UE tippromwovi l-ugwaljanza fil-postijiet tax-xogħol, l-edukazzjoni, il-kura tas-saħħa, u l-ħajja pubblika.
L-inizjattivi tagħha jiffukaw fuq il-ġeneru, l-inklużjoni razzjali u etnika, id-drittijiet tal-persuni b'diżabilità u l-protezzjoni tal-LGBTQ+.
Il-prinċipju ta' paga ugwali għal xogħol ugwali bejn l-irġiel u n-nisa huwa minqux fit-Trattati tal-UE. Madankollu, għad hemm differenza fil-pagi bejn il-ġeneri fl-UE. Biex tgħin fit-tnaqqis ta' din id-differenza, l-UE adottat regoli ġodda dwar it-trasparenza fil-pagi.
L-UE stabbiliet korpi tal-ugwaljanza biex jippromwovu t-trattament ugwali u n-nondiskriminazzjoni fl-istati membri. Il-korpi joffru appoġġ indipendenti lill-vittmi ta' diskriminazzjoni, iwettqu stħarriġ, jippubblikaw rapporti, u jagħmlu rakkomandazzjonijiet dwar kwistjonijiet ta' diskriminazzjoni.
Investiment fl-edukazzjoni u t-taħriġ
Kulħadd għandu d-dritt għal edukazzjoni, taħriġ u tagħlim tul il-ħajja ta' kwalità u inklużivi sabiex iżomm u jakkwista ħiliet li jippermettulu jipparteċipa b'mod sħiħ fis-soċjetà u jimmaniġġa b'suċċess tranżizzjonijiet fis-suq tax-xogħol.
L-UE tippromwovi ż-Żona Ewropea tal-Edukazzjoni u trawwem il-kollaborazzjoni fost il-pajjiżi tal-UE fil-qasam tal-edukazzjoni, bl-għan li jinbnew sistemi nazzjonali tal-edukazzjoni u t-taħriġ aktar reżiljenti u inklużivi.
Barra minn hekk, l-UE qed taħdem fuq regoli ġodda biex ittejjeb il-kundizzjonijiet tax-xogħol għat-trainees u tiżgura li dawn ma jiġux sfruttati.
Inklużjoni soċjali
Sabiex tippromwovi l-inklużjoni soċjali fis-soċjetà, l-UE għamlitha illegali li ssir diskriminazzjoni kontra persuni abbażi tar-razza jew l-etniċità tagħhom.
Iċ-ċittadini tal-UE huma mħarsa wkoll mid-diskriminazzjoni fuq il-post tax-xogħol.
L-UE għandha l-għan li tagħmel diversi prodotti u servizzi aktar aċċessibbli għall-anzjani u għall-persuni b'diżabilità.
L-UE u l-istati membri tagħha qed jaħdmu biex jiżguraw li l-persuni kollha b'diżabilità jgawdu d-drittijiet tagħhom, ikunu jistgħu jipparteċipaw bis-sħiħ fis-soċjetà u fl-ekonomija u ma jesperjenzawx diskriminazzjoni.
L-aħħar aħbarijiet
L-aħħar spjegazzjonijiet
L-aħħar reviżjoni: 7 ta' Frar 2025