Kunsill Impjiegi, Politika Soċjali, Saħħa u Affarijiet tal-Konsumatur (Politika soċjali u saħħa), 21-22/06/2018, 21 u 22 ta' Ġunju 2018

Riżultati ewlenin

Impjiegi u politika soċjali - 21 ta’ Ġunju

Koordinazzjoni tas-sistemi tas-sigurtà soċjali

Il-Kunsill qabel dwar il-pożizzjoni ta' negozjar (l-approċċ ġenerali) tiegħu dwar il-koordinazzjoni tas-sistemi ta' sigurtà soċjali (reviżjoni tar-regolamenti 883/2004 u 987/2009).

L-abbozz ta' regolament emendatorju jiffoka fuq ħames oqsma: il-benefiċċji tal-qgħad, il-benefiċċji għall-kura fit-tul, l-aċċess għall-benefiċċji għall-persuni ekonomikament inattivi, il-benefiċċji marbutin mal-familja u l-leġislazzjoni applikabbli għall-ħaddiema stazzjonati u l-persuni li jaħdmu f'żewġ stati membri jew aktar. Huwa jinkludi għadd ta' emendi iżgħar oħra.

Abbażi ta' dan il-mandat, il-Presidenza tal-Kunsill ser tiftaħ negozjati mal-Parlament Ewropew ladarba dan ikun adotta l-pożizzjoni tiegħu.

Il-koordinazzjoni tas-sistemi ta' sigurtà soċjali għandha rwol ewlieni fl-iżgurar li fil-prattika, il-moviment liberu tal-persuni jaħdem tassew. Dan l-aġġornament tar-regoli ser jagħmilhom aktar ċari, aktar ġusti u aktar faċli biex wieħed jinfurzahom. Biser Petkov, Ministru għax-Xogħol u l-Politiki Soċjali tal-Bulgarija

Il-bilanċ bejn ix-xogħol u l-ħajja tal-familja għall-ġenituri u l-persuni li jindukraw

Il-Kunsill qabel dwar il-pożizzjoni ta' negozjar tiegħu (approċċ ġenerali) għad-direttiva dwar il-bilanċ bejn ix-xogħol u l-ħajja privata għal ġenituri u l-persuni li jindukraw.

L-għan ta' din il-proposta hu li jitjieb l-aċċess għall-arranġamenti dwar il-bilanċ bejn ix-xogħol u l-ħajja privata, pereżempju leave u arranġamenti ta' xogħol flessibbli għal ġenituri u l-persuni li jindukraw. Għandha żżid l-użu tal-leave b'rabta mal-familja mill-irġiel, li jgħin biex tiżdied il-parteċipazzjoni femminili fis-suq tax-xogħol.

Abbażi ta' dan il-mandat, il-Presidenza tal-Kunsill ser tiftaħ negozjati mal-Parlament Ewropew ladarba dan ikun adotta l-pożizzjoni tiegħu.

Kondizzjonijiet tax-xogħol trasparenti u prevedibbli

Il-Kunsill qabel dwar il-pożizzjoni ta' negozjar tiegħu (approċċ ġenerali) għad-direttiva dwar kondizzjonijiet tax-xogħol trasparenti u prevedibbli. Dan l-abbozz ta' direttiva jindirizza l-isfidi li ġabu magħhom l-iżviluppi fid-dinja tax-xogħol, inkluża l-flessibilizzazzjoni dejjem akbar tas-suq tax-xogħol.

Abbażi ta' dan il-mandat, il-Presidenza tal-Kunsill ser tiftaħ negozjati mal-Parlament Ewropew ladarba dan ikun adotta l-pożizzjoni tiegħu.

Stazzjonar ta' ħaddiema

Il-Kunsill adotta r-reviżjoni tad-direttiva dwar l-istazzjonar ta’ ħaddiema. L-għan tad-direttiva hu li tassigura pagi ġusti u kundizzjonijiet ugwali bejn kumpaniji lokali u ta' stazzjonar fil-pajjiż ospitanti filwaqt li jinżamm il-prinċipju tal-moviment liberu ta' servizzi.

Il-futur tas-saħħa fl-UE

Il-ministri ser jiddiskutu l-futur tas-saħħa fl-UE. L-istati membri enfasizzaw li l-azzjoni tal-UE li timmira lejn il-promozzjoni tas-saħħa hija partikolarment utli fejn ikun hemm dimensjoni transfruntiera jew meta din tiffaċilita t-titjib ta' miżuri nazzjonali fuq il-bażi ta' skambju tal-aħjar prassi. Huma ddeskrivew fil-qosor diversi oqsma fejn il-kooperazzjoni tal-UE tista' tkun ta' benefiċċju għall-istati membri bħall-iskambju tal-aħjar prassi fl-oqsma tal-prevenzjoni u l-mard li ma jitteħidx, it-theddid transfruntier għas-saħħa, is-sigurtà tal-pazjenti, ir-reżistenza għall-antimikrobiċi (AMR), is-saħħa elettronika, ir-riċerka, u l-kooperazzjoni bejn ċentri speċjalizzati jew il-kooperazzjoni volontarja bejn gruppi ta' stati membri rigward kwistjonijiet li huma importanti għalihom.

L-UE teħtieġ aktar viżibbiltà għal dawk il-politiki li huma ta' benefiċċju dirett għall-persuni: il-politika tas-saħħa hija waħda minnhom. Id-diskussjoni tal-lum issottolinjat dawk l-oqsma fejn il-kooperazzjoni fil-livell Ewropew tista' tagħti valur miżjud. Iddeskrivejna wkoll fil-qosor qafas għal azzjoni futura: politika dwar il-kura tas-saħħa mmexxija mill-istati membri, iffukata fuq qafas ta' benefiċċju għall-persuni u li tiggarantixxi l-kwalità tal-ħajja fil-kontinent tagħna. Kiril Ananiev, ministru għas-saħħa tal-Bulgarija

Saħħa - 22 ta' Ġunju

Valutazzjoni tat-teknoloġija tas-saħħa

Il-ministri kellhom dibattitu dwar ir-regolament propost dwar il-valutazzjoni tat-teknoloġija tas-saħħa, li pprovda gwida dwar modi possibbli biex titjieb il-kooperazzjoni attwali. Id-diskussjoni ffukat fuq l-għażla bejn approċċ obbligatorju u approċċ aktar volontarju bi flessibbiltà akbar għall-istati membri. Il-Presidenza kkonkludiet li d-dibattitu kien jindika preferenza prevalenti għal approċċ volontarju, li jkun jeħtieġ diskussjonijiet dwar soluzzjonijiet alternattivi, u indikat li d-diskussjonijiet fil-Kunsill ser jieħdu l-ħin.

Konklużjonijiet dwar "In-nutrizzjoni tajba għat-tfal: il-futur b'saħħtu tal-Ewropa"

Il-Kunsill adotta konklużjonijiet dwar "In-nutrizzjoni tajba għas-saħħa tat-tfal: Il-futur b'saħħtu tal-Ewropa".

Filwaqt li jinżamm preżenti li dieta li mhix tajba għas-saħħa hija fattur ta' riskju (evitabbli) li jwassal għal mard kroniku serju, il-konklużjonijiet jiffukaw fuq il-promozzjoni ta' dieti aktar tajbin għas-saħħa tat-tfal, bħala wieħed mill-aħjar investimenti għal ġenerazzjoni Ewropea żagħżugħa b'saħħitha.

Ir-Regolament 726/2004 bħala parti mill-Pakkett veterinarju

Il-ministru Ananiev enfasizza wkoll it-tmiem b'suċċess tan-negozjati dwar l-emendi għar-Regolament 726/2004 bħala parti mill-Pakkett veterinarju. Id-dossier kien prijorità għall-presidenza Bulgara. Il-ftehim fih għadd ta' tibdil bħal pereżempju l-adozzjoni tal-miżati għall-Aġenzija Ewropea għall-Mediċini bi proċedura leġislattiva ordinarja, enfasi ċara fuq il-ħtieġa għal approċċ "saħħa waħda" rigward l-AMR, kif ukoll l-adattament simultanju għat-Trattat ta' Lisbona ta' dispożizzjonijiet f'leġislazzjoni relatata.