Kunsill Impjiegi, Politika Soċjali, Saħħa u Affarijiet tal-Konsumatur, 06-07/12/2018, 6 u 7 ta' Diċembru 2018

Riżultati ewlenin

Kwistjonijiet ta' saħħa, 7 ta' Diċembru 2018

Il-Kunsill adotta rakkomandazzjoni dwar kooperazzjoni msaħħa kontra l-mard li jista’ jiġi evitat bit-tilqim.

Ir-rati tat-tilqim ivarjaw ħafna madwar l-UE. Jeħtieġ li nitgħallmu minn xulxin u naħdmu flimkien biex niġġieldu kontra l-eżitazzjoni għat-tilqim u nipprovdu liċ-ċittadini tagħna bl-informazzjoni preċiża dwar il-benefiċċji tat-tilqim. Beate Hartinger-Klein, Ministru Federali għax-Xogħol, l-Affarijiet Soċjali, is-Saħħa u l-Protezzjoni tal-Konsumatur tal-Awstrija

Id-dokument jistipula għadd ta’ azzjonijiet li għandhom jittieħdu mill-istati membri u l-Kummissjoni, fil-kompetenzi rispettivi tagħhom, b’mod partikolari fir-rigward ta’ pjanijiet ta’ tilqim, il-ħolqien ta’ sistema Ewropea għall-Kondiviżjoni tal-Informazzjoni dwar it-Tilqim, is-sorveljanza tal-benefiċċji u r-riskji tat-tilqim, u t-tisħiħ tal-provvista tat-tilqim, kif ukoll attivitajiet ta’ komunikazzjoni u edukazzjoni relatati mal-benefiċċji tat-tilqim u mal-ġlieda kontra l-eżitazzjoni għat-tilqim.

Il-ministri qasmu wkoll il-fehmiet tagħhom dwar l-Indirizzar tal-eżitazzjoni għat-tilqim fil-livell tal-UE u dak nazzjonali: Sfidi u possibiltajiet f'dinja diġitalizzata. Id-dibattitu kien ibbażat fuq nota ta’ gwida mill-presidenza li tistieden lill-ministri jaqsmu l-aħjar prattiki biex iżidu l-kopertura tat-tilqim, jikkunsidraw modi kif jiġġieldu d-diżinformazzjoni dwar il-vaċċini u t-tilqim b’mod partikolari fuq l-Internet u jagħtu l-fehmiet tagħhom dwar ir-raġunijiet għall-varjazzjonijiet fl-eżitazzjoni għat-tilqim bejn l-istati membri.

Affarijiet oħra

Il-ministri ħadu nota ta’ rapport ta’ progress mill-Presidenza dwar ir-Regolament propost dwar il-Valutazzjoni tat-Teknoloġija tas-Saħħa. Il-proposta tal-Kummissjoni toħloq qafas għal valutazzjoni konġunta fil-livell tal-UE mill-korpi tal-istati membri tal-effettività klinika relattiva ta’ ċerti mediċini u apparat mediku.

Il-Kummissjoni ppreżentat lill-ministri s-sejbiet ewlenin tar-rapport tagħha “Health at a Glance: Europe 2018”. Fit-22 ta’ Novembru 2018 il-Kummissjoni nediet it-tieni ċiklu dwar L-Istat tas-Saħħa fl-UE bil-pubblikazzjoni tar-rapport “Health at a Glance: Europe 2018”. Ir-rapport jippreżenta analiżi komparattiva tal-istatus tas-saħħa taċ-ċittadini tal-UE u kif qed jaħdmu s-sistemi tas-saħħa tat-28 stat membru tal-UE, il-ħames pajjiżi kandidati u t-tliet pajjiżi tal-EFTA.

Il-Kummissjoni pprovdiet informazzjoni dwar l-implimentazzjoni tad-Direttiva 2011/62/UE dwar il-prodotti mediċinali falsifikati li għandha tibda fid-9 ta’ Frar 2019. Minn din id-data l-operaturi ekonomiċi tul il-katina tal-provvista, inkluż l-ispiżeriji u l-isptarijiet, ser ikollhom bżonn jiskennjaw il-pakketti tal-mediċini biex jivverifikaw l-awtentiċità tagħhom.

Il-Presidenza Rumena li kien imiss ippreżentat il-programm ta' ħidma tagħha fil-qasam tas-saħħa.

Kwistjonijiet ta' Impjiegi u Politika Soċjali, 6 ta' Diċembru 2018

Il-Kunsill laħaq approċċ ġenerali (il-pożizzjoni tal-Kunsill) dwar proposta għal Regolament tal-Parlament Ewropew u tal-Kunsill dwar l-istabbiliment ta' Awtorità Ewropea tax-Xogħol (ELA). L-għan tar-regolament, propost mill-Kummissjoni f'Marzu, hu li joħloq korp ġdid li jappoġġa lill-istati membri fl-implimentazzjoni tal-leġislazzjoni tal-UE fl-oqsma tal-mobbiltà transkonfinali tal-forza tax-xogħol u tal-koordinazzjoni transkonfinali tas-sigurtà soċjali, inkluż il-moviment liberu tal-ħaddiema, l-istazzjonar ta' ħaddiema u s-servizzi mobbli ħafna.

Nilqa’ b’sodisfazzjon l-approċċ ġenerali li qbilna dwaru llum għall-ELA. Il-proposta tirrappreżenta bilanċ tajjeb bejn il-ħolqien ta’ korp effettiv biex jgħin lill-Istati Membri jimplimentaw il-leġislazzjoni tal-UE fl-oqsma tal-mobbiltà transkonfinali tal-forza tax-xogħol u tal-koordinazzjoni transkonfinali tas-sigurtà soċjali, u r-rispett tal-kompetenzi nazzjonali. Beate Hartinger-Klein, Ministru Federali għax-Xogħol, l-Affarijiet Soċjali, is-Saħħa u l-Protezzjoni tal-Konsumatur tal-Awstrija

Il-ministri kellhom ukoll dibattitu ta’ orjentazzjoni dwar is-Semestru Ewropew 2019, abbażi ta’ nota ta’ gwida mill-Presidenza.

B'rabta mad-dibattitu l-Kummissjoni ppreżentat:

• l-Istħarriġ Annwali dwar it-Tkabbir (SAT)
• ir-Rapport dwar il-Mekkaniżmu ta' Twissija (AMR)
• l-abbozz ta' Rapport Konġunt dwar l-Impjiegi (JER)
• abbozz ta' Rakkomandazzjoni tal-Kunsill dwar il-politika ekonomika taż-żona tal-euro

Il-Kunsill approva l-kontribut tiegħu għall-aspetti relatati mal-impjiegi u l-politika soċjali tar-Rakkomandazzjoni

Il-ministri approvaw il-messaġġi ewlenin imħejjija mill-Kumitat tal-Impjiegi (EMCO) u l-Kumitat tal-Protezzjoni Soċjali (KPS) wara l-eżamijiet tematiċi dwar “Aspetti Soċjali tad-Diġitalizzazzjoni” u “Diġitalizzazzjoni u Robotizzazzjoni tax-Xogħol”.

Approvaw ukoll il-messaġġi ewlenin tal-EMCO dwar l-implimentazzjoni tar-Rakkomandazzjoni dwar il-qgħad fit-tul.

Il-Kunsill laħaq il-pożizzjoni tiegħu (approċċ ġenerali) dwar proposta għal direttiva tal-Parlament Ewropew u tal-Kunsill li temenda d-Direttiva 2004/37/KE dwar il-protezzjoni tal-ħaddiema minn riskji relatati mal-espożizzjoni għal karċinoġeni jew mutaġeni fuq il-post tax-xogħol.

Il-proposta li ntlaħaq qbil dwarha llum hija pass deċiżiv ieħor lejn il-protezzjoni tas-saħħa tal-ħaddiema fl-UE. Din id-direttiva ser ittejjeb b’mod sinifikanti l-kondizzjonijiet tax-xogħol għal miljuni ta’ ċittadini tagħna u ser tevita għexieren ta’ eluf ta’ każijiet ta’ mard. Beate Hartinger-Klein, Ministru Federali għax-Xogħol, l-Affarijiet Soċjali, is-Saħħa u l-Protezzjoni tal-Konsumatur tal-Awstrija

Il-ministri laħqu qbil politiku dwar proposta għal rakkomandazzjoni tal-Kunsill dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom.

Waqt l-ikla ta' nofsinhar il-ministri kellhom dibattitu dwar is-suġġett li ġej: "Investiment tal-QFP fin-nies: kontribuzzjoni ta’ fondi u programmi tal-UE għal konverġenza, ġustizzja u kompetittività." Id-dibattitu kien ibbażat fuq nota ta' gwida tal-presidenza.

Il-Kunsill ħa nota wkoll ta’ rapport ta’ progress dwar il-proposta għal Regolament tal-Parlament Ewropew u tal-Kunsill dwar il-Fond Ewropew ta’ Aġġustament għall-Globalizzazzjoni (FEG). Il-proposta għandha l-għan li tiżgura li l-FEG ikompli jopera wara l-2020.

Il-ministri eżaminaw sett ta’ konklużjonijiet dwar l-Ugwaljanza bejn is-Sessi, iż-Żgħażagħ u d-Diġitalizzazzjoni.

Il-Presidenza kkonkludiet li t-test kien appoġġat minn 26 delegazzjoni inkluż il-Presidenza.

Il-konklużjonijiet tħejjew bħala parti mir-reviżjoni annwali tal-implimentazzjoni tal-Pjattaforma ta’ Azzjoni ta’ Beijing mill-UE u l-Istati Membri tagħha.

Il-ministri ħadu wkoll nota ta’ rapport ta’ progress dwar il-proposta għal Direttiva dwar it-trattament ugwali. Il-proposta tkopri r-reliġjon u t-twemmin, id-diżabbiltà, l-età u l-orjentazzjoni sesswali. Din tfittex li timla lakuna fil-leġislazzjoni tal-UE, billi testendi l-protezzjoni kontra d-diskriminazzjoni lil hinn mill-impjiegi, għal oqsma bħall-aċċess għall-prodotti u s-servizzi.

Affarijiet oħra

Il-ministri ngħataw informazzjoni mill-Presidenza u mill-Kummissjoni dwar ir-riżultat tas-Summit Soċjali Tripartitiku (16 ta’ Ottubru 2018, Brussell).

Il-Presidenza pprovdiet ukoll informazzjoni dwar il-progress f’għadd ta’ proposti leġislattivi li għaddejjin bħalisssa, kif ukoll dwar id-Dikjarazzjoni Konġunta “L-Ugwaljanza bejn is-Sessi bħala Prijorità tal-Unjoni Ewropea llum u fil-futur”.

Il-presidenza Rumena li kien jmiss ippreżentat il-programm ta' ħidma tagħha fil-qasam tal-Impjiegi u l-Politika Soċjali.