Kunsill Affarijiet Barranin, 10/02/2014, 10 ta' Frar 2014

Tiġi stabbilita formalment l-operazzjoni militari fir-Repubblika Ċentru-Afrikana

Imlaqqgħin fil-Kunsill Affarijiet Barranin, il-ministri tal-UE stabbilixxew formalment l-operazzjoni militari tal-UE fir-Repubblika Ċentru-Afrikana, li fetħet it-triq biex tintervjeni rapidament fil-ġimgħat li ġejjin.

Id-deċiżjoni tal-Kunsill Affarijiet Barranin adottata t-Tnejn l-10 ta' Frar toħloq il-bażi legali għall-operazzjoni fir-Repubblika Ċentru-Afrikana (RCA). L-operazzjoni militari l-ġdida, li ngħatat l-isem EUFOR RCA, ser tagħti appoġġ temporanju biex tiżgura ż-żona madwar il-belt kapitali, Bangui. Din ser tikkontribwixxi għall-isforzi internazzjonali eżistenti biex jiġu protetti l-popolazzjonijiet li l-aktar qegħdin f'riskju, waqt li tiżgura li l-għajnuna umanitarja tista' tilħaq lil dawk li jeħtiġuha. Il-Ministri ddiskutew ukoll is-sigurtà u l-kriżi umanitarja fir-RCA, u adottaw konklużjonijiet.

Ukoll, fil-Kunsill Affarijiet Barranin, il-ministri taw ħarsa lejn is-Sħubija tal-Lvant tal-UE, u b'mod partikolari ddiskutew l-avvenimenti reċenti fl-Ukraina. Il-Kunsill esprima t-tħassib tiegħu għall-kriżi politika li għadha għaddejja, u appella lill-atturi kollha biex joqogħdu lura mill-vjolenza u l-azzjoni radikali. Il-Kunsill esprima l-impenn tal-UE hi u tappoġġa r-riforma tal-Ukraina. Il-ministri ssottolinjaw ukoll li, abbażi ta' gvern Ukrain ġdid, l-UE ser tkun lesta biex tkompli tassisti lill-Ukraina biex issib mod sostenibbli kif toħroġ mis-sitwazzjoni ekonomika diffiċli tagħha.

EUFOR RCA

Il-kwartieri ġenerali tal-forza għall-operazzjoni militari tal-UE fir-Repubblika Ċentru-Afrikana ser tkun Bangui, il-kapitali tar-Repubblika Ċentru-Afrikana, bil-kwartieri ġenerali tal-operazzjoni f'Larissa, il-Greċja. L-ispejjeż komuni tal-operazzjoni, li ser tkun operazzjonali sa 6 xhur, huma stmati għal €25.9 miljun. L-operazzjoni ser tagħti appoġġ temporanju biex iż-żona madwar Bangui tkun sigura qabel ma tingħata f'idejn is-sħab Afrikani.

Suġġetti oħra fuq l-aġenda

Il-ministri adottaw id-direttivi ta' negozjati għal djalogu politiku u ftehim ta' kooperazzjoni ma' Kuba. Ftehim bilaterali jsaħħaħ ir-relazzjoni bejn l-UE u Kuba u jipprovdi qafas għal djalogu kostruttiv u kooperazzjoni mtejba.

Il-Kunsill Affarijiet Barranin iddiskuta u adotta wkoll il-konklużjonijiet dwar:

• Il-prijoritajiet tal-UE fil-fora tad-drittijiet tal-bniedem tan-NU qabel il-25 sessjoni tal-Kunsill tad-Drittijiet tal-Bniedem tan-NU fis-17 ta' Frar
• is-sitwazzjoni tas-sigurtà li sejra għall-agħar fl-Iraq
• L-Eġittu
• It-Tuneżija, wara l-adozzjoni tal-kostituzzjoni demokratika ġdida tagħhom
• Il-Jemen, wara l-konklużjoni tal-Konferenza tad-Djalogu Nazzjonali