Kunsill Affarijiet Barranin, 03/03/2014, 3 ta' Marzu 2014

L-UE tikkundanna l-azzjonijiet tar-Russja fl-Ukraina, issejjaħ għal djalogu u tibqa' lesta għal aktar miżuri

Fit-3 ta' Marzu l-Ministri tal-UE għall-Affarijiet Barranin kellhom laqgħa straordinarja tal-Kunsill Affarijiet Barranin dwar is-sitwazzjoni fl-Ukraina.

L-Unjoni Ewropea kkundannat "il-ksur ċar tas-sovranità u l-integrità territorjali tal-Ukraina b'atti ta' aggressjoni mill-forzi armati Russi kif ukoll l-awtorizzazzjoni li ngħatat mill-Kunsill Federali tar-Russja fl-1 ta' Marzu għall-użu tal-forzi armati fit-territorju tal-Ukraina."

"Bla ebda dubju, dan huwa ksur tal-obbligi internazzjonali tar-Russja u tal-impenji tagħha," qalet Catherine Ashton, Rappreżentant Għoli tal-UE għall-Affarijiet Barranin u l-Politika ta' Sigurtà.

Appell għal soluzzjoni paċifika

"Aħna konvinti bis-sħiħ li jeħtieġ li jkun hemm soluzzjoni paċifika għal din is-sitwazzjoni bir-rispett sħiħ tad-dritt internazzjonali. Għalhekk aħna nappellaw lir-Russja biex tirtira minnufih it-truppi tagħha lejn iż-żoni fejn huma stazzjonati b'mod permanenti abbażi tal-ftehim dwar il-Flotta tal-Baħar l-Iswed stazzjonata fl-Ukraina," saħqet ir-Rappreżentat Għoli.

L-UE tibqa' lesta li timpenja ruħha fi djalogu kostruttiv mal-partijiet kollha u tilqa' l-missjoni ta' inkjesta possibbli tal-OSKE (Organizzazzjoni għas-Sigurtà u l-Kooperazzjoni fl-Ewropa) fl-Ukraina.

Sospensjoni tal-parteċipazzjoni fil-G8

L-UE u l-Istati tagħha li qed jieħdu sehem fil-G8 ddeċidew li għalissa jissospendu l-parteċipazzjoni tagħhom f'attivitajiet assoċjati mat-tħejjijiet għas-Summit tal-G8 f'Sochi f'Ġunju "sakemm jerġa' lura l-ambjent li fih il-G8 jkun jista' jkollu diskussjoni bis-sens."

Konsegwenzi possibbli għal relazzjonijiet bilaterali UE-Russja

"Fin-nuqqas ta' passi mir-Russja li jtaffu s-sitwazzjoni, l-UE ser tiddeċiedi dwar il-konsegwenzi għal relazzjonijiet bilaterali bejn l-UE u r-Russja," iddikjara l-Kunsill.

Il-miżuri jistgħu jinkludu s-sospensjoni ta' taħdidiet bilaterali dwar materji relatati mal-viża kif ukoll dwar il-Ftehim Ġdid. Barra dan, il-Kunsill iddeċieda "li jibqa' interessat b'mod permanenti [fil-kwistjoni], sabiex ikun f'pożizzjoni li jieħu l-miżuri kollha meħtieġa malajr".

Appoġġ għall-Ukraina

Il-Ministri kkonfermaw li l-UE tinsab lesta biex tappoġġa lill-pajjiż flimkien ma' istituzzjonijiet internazzjonali oħra, speċjalment il-FMI.

L-UE u l-membri tagħha "ser jagħtu l-appoġġ sħiħ tagħhom għal pakkett ta' għajnuna internazzjonali biex jiġu indirizzati l-ħtiġijiet urġenti tal-Ukraina, abbażi ta' impenn ċar għal riformi." Għal dan il-għan, il-Kummissjoni Ewropea diġà bdiet missjoni ta' inkjesta fi Kyiv, b'mod parallel mal-missjoni tal-FMI.

Il-Kunsill reġa' kkonferma l-offerta tiegħu tal-Ftehim ta' Assoċjazzjoni, inkluża Żona ta' Kummerċ Ħieles Approfondita u Komprensiva.

Il-konklużjonijiet jissottolinjaw ukoll il-ħtieġa għal riforma ġusta u kostituzzjonali fl-Ukraina u li jsiru elezzjonijiet presidenzjali ħielsa, ġusti u trasparenti bl-osservazzjoni tal-OSKE-ODIHR.

Laqgħa straordinarja tal-Kunsill Ewropew

Il-President tal-Kunsill Ewropew Herman Van Rompuy sejjaħ laqgħa straordinarja tal-mexxejja tal-UE li ser issir fis-6 ta' Marzu 2014 sabiex jiġu diskussi l-iżviluppi l-aktar reċenti fl-Ukraina u dwar kif is-sitwazzjoni għandha tittaffa.