Kunsill Affarijiet Barranin, 12/05/2016, 12 ta' Mejju 2016

Riżultati ewlenin

Sitt xhur wara s-Summit tal-Belt Valletta, ħadna rendikont tal-approċċ kombinat tagħna, l-UE u l-istati membri flimkien, mal-pajjiżi sħab tagħna. Permezz ta' djalogi ta' livell għoli dwar il-migrazzjoni b'mod partikolari, qed nibdew naraw riżultati, fi sħubija ta' benefiċċju għal kulħadd - il-pajjiżi ta' oriġini, ta' transitu u ta' destinazzjoni. Federica Mogherini, Rappreżentant Għoli għall-Affarijiet Barranin u l-Politika ta' Sigurtà.

Migrazzjoni u żvilupp

Il-ministri kkonċentraw fuq l-implimentazzjoni tal-pjan ta' azzjoni tal-Belt Valletta sitt xhur wara l-adozzjoni tiegħu. Huma ħadu nota tal-istat attwali tal-Fond Fiduċjarju ta' Emerġenza għall-Afrika. Diġà ġew approvati proġetti li jiswew aktar minn EUR 750 miljun favur ir-reġjuni tas-Saħel u tal-Lag Chad, kif ikoll il-Qarn tal-Afrika.

Huma analizzaw ukoll l-istat attwali tad-djalogi ta' livell għoli mal-pajjiżi sħab. Il-Kunsill iddiskuta wkoll il-persuni mċaqilqa internament u ċ-ċaqliq furzat, u kellu skambju ta' fehmiet dwar kif l-aħjar jingħataw appoġġ ir-refuġjati u l-persuni mċaqilqa fi kriżijiet li jdumu.

• Konklużjonijiet tal-Kunsill dwar l-approċċ tal-UE lejn iċ-ċaqliq sfurzat u l-iżvilupp
• It-tiftix ta’ soluzzjonijiet għal pressjonijiet migratorji (informazzjoni ġenerali)

Reviżjoni tal-kunsens Ewropew għall-iżvilupp

Il-Kunsill kellu dibattitu ta' orjentazzjoni dwar ir-reviżjoni tal-kunsens Ewropew għall-iżvilupp fid-dawl tal-implimentazzjoni tal-Aġenda 2030 għall-iżvilupp sostenibbli, u żewġ diskussjonijiet tematiċi, waħda fuq l-ipprogrammar konġunt u l-oħra fuq l-impenn tas-settur privat.

Ir-Rappreżentant Għoli enfasizzat li l-UE għandha tkompli tkun viżibbli u impenjata fl-implimentazzjoni tal-Aġenda 2030. Hija saħqet ukoll fuq l-importanza li naħdmu flimkien - l-UE u l-istati membri flimkien - biex l-istrumenti tal-iżvilupp isiru aktar effettivi fuq il-post. L-impenn tal-lum tal-Kunsill biex iżid l-ipprogrammar konġunt tal-assistenza fl-iżvilupp tal-UE u l-istati membri huwa progress kbir f'dan ir-rigward.

• Konklużjonijiet tal-Kunsill dwar it-tisħiħ tal-Ipprogrammar Konġunt
• Konklużjonijiet tal-Kunsill dwar katini ta’ valur mondjali responsabbli

Afganistan

Waqt l-ikla ta' nofsinhar, il-ministri għall-iżvilupp tal-UE ngħaqdu mal-Ministru għall-Finanzi Afgan, Eklil Ahmad Hakimi. Il-Ministru Hakimi ppreżenta l-qafas nazzjonali għall-iżvilupp Afgan ġdid li jiddeskrivi l-aġenda tal-gvern għar-riforma qabel il-Konferenza ta' Brussell dwar l-Afganistan fil-5 ta' Ottubru 2016. Il-ministri laqgħu l-progress li sar fir-riformi u inkoraġġew it-tkomplija tal-implimentazzjoni rapida tagħhom. Ir-Rappreżentant Għoli enfasizzat l-impenn kontinwu tal-UE fl-Afganistan, kemm politikament kif ukoll finanzjarjament b'livell għoli ta' assistenza għall-iżvilupp ta' EUR 200 miljun fis-sena sal-2020.

• Konklużjonijiet tal-Kunsill dwar l-Afganistan
• Konferenza ta’ Brussell dwar l-Afganistan, 4-5 ta' Ottubru 2016